ސްރީލަންކާއަށް އެހީވުމަށް އެޗްޑީސީން 100،000 ރުފިޔާ ހަދިޔާކޮށްފި
ސްރީލަންކާއަށް ކުރިމަތިވެފައިވާ ގިނަ ކާރިސާތަކުން އަރައިގަތުމަށް އެހީތެރިވުމުގެ ގޮތުން ރާއްޖޭގައި ކުރިއަށްގެންދާ ”ސިލޯނާއެކު ދިވެހީން“ ޓެލެތޯނަށް، ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން 100،000 (އެއްލައްކަ) ރުފިޔާ ހަދިޔާކޮށްފިއެވެ. މި އެހީތެރިކަމަކީ އެޗްޑީސީގެ މުވައްޒަފުންގެ ފަރާތުން ފޯރުކޮށްދިން ހަދިޔާއެކެވެ.
ލަންކާއަށް އެހީވުމުގެ ގޮތުން ކުރިއަށްގެންދާ 16 ގަޑިއިރުގެ މި ޓެލެތޯނަށް، ސަރުކާރުގެ އެކި އިދާރާތަކާއި، ސަރުކާރު ހިއްސާވާ ކުންފުނިތަކުގެ އިތުރުން އަމިއްލަ ކުންފުނިތަކުންވެސް އަންނަނީ އެހީތެރިކަން ފޯރުކޮށްދެމުންނެވެ. މި ޓެލެތޯންގެ މައިގަނޑު މަޤްޞަދަކީ ލަންކާގެ ދުވެލި ހުއްޓުވާލާފައިވާ އިޤްތިޞާދީ އަދި އިޖްތިމާޢީ ކާރިސާތަކުން އަރައިގަތުމަށް އެހީތެރިވުމެވެ.
ރާއްޖޭގެ ގިނަ ކުންފުނިތަކުގައި ސްރީލަންކާއަށް ނިސްބަތްވާ މުވައްޒަފުން މަސައްކަތްކުރަމުންދާތީ، އެ ކުންފުނިތަކުން މި ޓެލެތޯނުގައި ބައިވެރިވެ، އެކުގައި މަސައްކަތްކުރާ މުވައްޒަފުންނާއި، ލަންކާގެ ރައްޔިތުންނާ މި ހިތާމަވެރި ވަގުތުގައި ބައިވެރިވުމުގެ ގޮތުން ދަނީ އެހީތެރިކަން ފޯރުކޮށްދެމުންނެވެ. މިއީ ދެ ޤައުމުގެ ގުޅުން އިތުރަށް ބަދަހިކުރުމަށް ލިބިގެންދާ ފުރުސަތެކެވެ.
Ads by BML”ސިލޯނާއެކު ދިވެހީން“ ޓެލެތޯނަކީ ޕަބްލިކް ސަރވިސް މީޑިއާ (ޕީއެސްއެމް) އިން އިސް ނަގައިގެން ރާއްޖޭގެ 37 މީޑިއާއާ ގުޅިގެން ކުރިއަށްގެންދާ ކެމްޕޭނެކެވެ. މި ޓެލެތޯން މިހާރު ފަށާފައިވާއިރު، މިރޭ މެންދަމު 1:00 ޖެހުމާ ހަމައަށް ކުރިއަށް ދާނެއެވެ. މި ޓެލެތޯނުގައި ބައިވެރިވުމުގެ ފުރުސަތު ހުރިހާ ދިވެހި ރައްޔިތުންނަށާއި، ޖަމްޢިއްޔާ، ޖަމާޢަތް، ކްލަބްތަކާއި، އޮފީސްތައް ފަދަ ހުރިހާ ތަންތަނަށްވެސް ވަނީ ހުޅުވާލާފައެވެ.
މި ޓެލެތޯންގެ ދަށުން މިހާތަނަށް 2.3 މިލިޔަނަށްވުރެ ގިނަ ރުފިޔާ އަދި 38،000 އަށްވުރެ ގިނަ އެމެރިކާ ޑޮލަރު އެހީގެ ގޮތުގައި ވަނީ ލިބިފައެވެ. މި އަދަދުތަކުން ދައްކުވައިދެނީ، ދިވެހި ރައްޔިތުންނާއި ކުންފުނިތަކުގެ ހިތްތަކުގައި ލަންކާއަށްޓަކައި އޮތް އަޅާލުމާއި ހެޔޮއެދުމެވެ. މިކަމުން ދެކުނު އޭޝިއާ ސަރަހައްދުގައި އޮތް ގުޅުންތަކުގެ ބާރުވެސް ދައްކުވައިދެއެވެ.
ސްރީލަންކާއަކީ ޒަމާނުއްސުރެ ދިވެހިރާއްޖެއާ ވަރަށް ގާތް ރަޙުމަތްތެރި ޤައުމެކެވެ. އަދި އެ ޤައުމުގެ ރައްޔިތުންނަކީ ދިވެހިންނާ ވަރަށް ގާތްގުޅުންތަކެއް ބާއްވާ އެކުވެރި ބައެކެވެ. ރާއްޖެއިން ބޭރުގައި އެންމެ ގިނަ ދިވެހިން ދިރިއުޅެމުން އަންނަ އެއް ޤައުމަކީވެސް އަވަށްޓެރި އެކުވެރި ސްރީލަންކާއެވެ. އެހެންކަމުން ލަންކާއަށް ކުރިމަތިވެފައިވާ މި ދަތި ވަގުތުގައި ދިވެހިންގެ ފަރާތުން އެހީތެރިކަން ފޯރުކޮށްދިނުމަކީ ވަރަށް މުހިންމު ކަމެކެވެ.
Ads by MACL
