ބުދަ، 18 ނޮވެމްބަރު 2026
ޚަބަރު

ބަރުދަން ދަށްކުރުމުގެ ބެރިއަޓިކް ސާޖަރީ އައިޖީއެމްއެޗާއި ދަރުމަވަންތައިގައި ފަށައިފި

ބަރުދަން ދަށްކުރުމުގެ ބެރިއަޓިކް ސާޖަރީ އައިޖީއެމްއެޗާއި ދަރުމަވަންތައިގައި ފަށައިފި

ރާއްޖޭގައި އާދަޔާހިލާފަށް ބަރުދަން މަތިވެފައިވާ ފަރާތްތަކަށް ހާއްސަކޮށްގެން ބަރުދަން ދަށްކުރުމުގެ ބެރިއަޓިކް ސާޖަރީގެ ހިދުމަތް އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އާއި ދަރުމަވަންތަ ހޮސްޕިޓަލުގައި ރަސްމީކޮށް ފަށައިފިއެވެ. މި ހިދުމަތަކީ ބަރުދަނުގެ ސަބަބުން ދިމާވާ ސިއްހީ ގިނަ މައްސަލަތަކަށް ދާއިމީ ހައްލެއް ގެނެސްދިނުމަށް އެޅުނު މުހިންމު ފިޔަވަޅެކެވެ.

ބެރިއަޓިކް ސާޖަރީއަކީ ހަޖަމްކުރާ ނިޒާމު މަސައްކަތްކުރާ ގޮތަށާއި ގޮހޮރުގެ ސައިޒަށް ބަދަލު ގެނެސް، އާދަޔާހިލާފަށް ބޮޑަށް ބަރުދަން މަތިވެފައިވާ މީހުންގެ ބަރުދަން ދާއިމީ ގޮތެއްގައި ދަށްކުރުމަށް އެހީތެރިވުމަށް ކުރާ ކާމިޔާބު އޮޕަރޭޝަނެކެވެ. މިއީ ސިއްހީ ގޮތުން ދުޅަހެޔޮކަން އިތުރުކުރުމަށް އެހީތެރިވެދޭނެ އަދި ދިގު މުއްދަތަށް ހަށިގަނޑުގެ ބަރުދަން ކޮންޓްރޯލް ކުރުމަށް ފުރުސަތު ހުޅުވާލާ ހިދުމަތެކެވެ.

މި އޮޕަރޭޝަންތަކުން ހާސިލުވާ ފައިދާތަކުގެ ތެރޭގައި ބަލިމީހާއަށް ރަނގަޅު ސިއްހަތެއް ލިބިދިނުމާއެކު ނަފްސާނީ ދުޅަހެޔޮކަން ރަނގަޅުވެ، އަމިއްލަ ނަފްސަށް އޮންނަ އިތުބާރު އިތުރުވުން ހިމެނެއެވެ. މީގެ ސަބަބުން ބަލިމީހާގެ ހަޔާތަށް އުފާވެރިކަމާއި ހިތްހަމަޖެހުން އަލުން ގެނުވައިދިނުމަށް ބޮޑު އެހީތެރިކަމެއް ލިބިގެންދާނެއެވެ. މިއީ ހަށިގަނޑަށް ކުރާ އަސަރުގެ އިތުރުން މުޅި ހަޔާތަށް އަންނަ ފޮނި ބަދަލެކެވެ.

މީގެ އިތުރުން ކުރިން ބޭސްކުރަމުން އައި ގައިންގަޔަށް ނާރާ ބައެއް ބަލިތަކަށް ބޭސްކުރަން ނުޖެހުމަކީ މި އޮޕަރޭޝަންގެ މުހިންމު ފައިދާއެކެވެ. އޭގެ ތެރޭގައި ޓައިޕް 2 ހަކުރުބައްޔާއި، ލޭ މައްޗަށް ދިއުމާއި، ކޮލެސްޓެރޯލް މަތިވުމާއި، ހިތުގެ ބަލިތަކާއި ބައެއް ބާވަތުގެ ކެންސަރުން ރައްކާތެރިވުމަށް އެހީތެރިވުން ހިމެނެއެވެ. މި ބަލިތަކަކީ ރާއްޖޭގައި އާންމުވެފައިވާ ސިއްހީ ގިނަ މައްސަލަތަކެކެވެ.

މި އޮޕަރޭޝަންގެ ހިދުމަތް ގާއިމުވެގެން ދިއުމަކީ، އެ ބަލިތަކަށް ޒަމާންތަކެއް ވަންދެން ބޭސްކުރަމުން އަންނަ، އެކަށީގެންވާ ވަރަށްވުރެ ހަށިގަނޑުގެ ބަރުދަން މަތިވެ، އުއްމީދު ގެއްލިފައިވާ އެތައް ބަޔަކަށް ލިބިގެންދާނެ ވަރަށް އުއްމީދީ ހައްލެއް ކަމަށް އައިޖީއެމްއެޗާއި ދަރުމަވަންތަ ހޮސްޕިޓަލުން ވަނީ ބުނެފައެވެ.

މި ހިދުމަތާއެކު ރާއްޖޭގެ ސިއްހީ ދާއިރާއަށް އިތުރު ކުރިއެރުމެއް ލިބިގެންދާނެކަމަށް ވެސް ލަފާކުރެވެއެވެ.