އައްޑޫގައި މަސްތުވާތަކެތީގެ ވިޔަފާރިކުރާ ބޮޑު ނެޓްވޯކެއްގެ އިސް މީހުން ހައްޔަރުކޮށްފި
މަސްތުވާތަކެއްޗާ ދެކޮޅަށް ފުލުހުން ކުރަމުންދާ މަސައްކަތުގެ ތެރެއިން، އައްޑޫ ސިޓީގައި އެންމެ ފުޅާ ދާއިރާއެއްގައި މަސްތުވާތަކެތީގެ ވިޔަފާރި ކުރަމުން އައިސްފައިވާ ބޮޑު ނެޓްވޯކެއްގެ އިސް ބަޔަކު، އިއްޔެ ރޭ ހިންގި "އޮޕަރޭޝަން އަލިމަގު" ގެ ދަށުން ހައްޔަރުކޮށްފިއެވެ.
މި ނެޓްވޯކްގެ މަސްތުވާތަކެތި ޓްރެފިކްކުރުމާއި މަނީ ލޯންޑަރ ކުރުމުގެ ތަހުގީގެއް މި އަހަރުގެ މާރޗް މަހުން ފެށިގެން ކުރިއަށްގެންދާއިރު، ފާއިތުވި ފަސް އަހަރުގެ ތެރޭގައި އެމީހުންގެ ބޭންކް އެކައުންޓްތަކުގައި 19 މިލިއަނަށް ވުރެ ގިނަ ދިވެހި ރުފިޔާ ދައުރުކޮށްފައިވާކަން ފުލުހުން ހާމަކޮށްފައިވެއެވެ.
ފުލުހުން ހާމަކުރެއްވި ގޮތުގައި، މި އޮޕަރޭޝަން ކުރިއަށް ގެންގޮސްފައިވަނީ "އޮޕަރޭޝަން އަލިމަގު" ގެ ނަމުގައެވެ. މި އޮޕަރޭޝަންގެ ދަށުން މަސްތުވާތަކެތި ޓްރެފިކްކުރުމާއި މަނީ ލޯންޑަރ ކުރުމުގެ ތުހުމަތުގައި މި ނެޓްވޯކްގެ އިސް ފަރާތްތަކަށް އަމާޒުކޮށް ތަހުގީގު ފަށާފައިވަނީ މި އަހަރުގެ މާރޗް މަހުން ފެށިގެންނެވެ.
Ads by BMLތަހުގީގަށް އެނގިފައިވާ ގޮތުގައި، މި ނެޓްވޯކްގެ ތެރެއިން 2017 ވަނަ އަހަރުން ފެށިގެން ދިގު މުއްދަތެއްގައި މަސްތުވާތަކެތީގެ ވިޔަފާރި ކުރަމުންދާކަން ވަނީ ހޯދިފައެވެ. މިއީ ދިގު މުއްދަތެއްގައި ހިންގާފައިވާ ކުށުގެ ޢަމަލުތަކެއްކަން ފާހަގަކުރެވޭ ކަމަށް ފުލުހުން ވިދާޅުވިއެވެ.
މި ނެޓްވޯކްގެ މާލީ މުޢާމަލާތްތަކަށް ބަލާއިރު، ފާއިތުވި ފަސް އަހަރުގެ ތެރޭގައި މި ނެޓްވޯކްގެ އިސް ހަތަރު މީހެއްގެ ބޭންކް އެކައުންޓްތަކުގައި 19 މިލިއަނަށް ވުރެ ގިނަ ދިވެހި ރުފިޔާ ދައުރުކޮށްފައިވާކަން ފުލުހުން ވަނީ ހޯދާފައެވެ. މި ބޮޑެތި މާލީ މުޢާމަލާތްތަކަކީ މަސްތުވާތަކެތީގެ ވިޔަފާރިއާ ގުޅުންހުރި ކަންކަން ކަމަށް ތުހުމަތުކުރެވެއެވެ.
ފުލުހުން އިތުރަށް ހާމަކުރެއްވި ގޮތުގައި، މި އޮޕަރޭޝަނަކީ މިހާރުވެސް ކުރިއަށްދާ އޮޕަރޭޝަނެކެވެ. އަދި މި މައްސަލައިގެ ތަހުގީގު ކުރިއަށްދާ މިންވަރަކުން އިތުރު މައުލޫމާތު އާންމުކުރަމުންދާނެ ކަމަށް ފުލުހުން ބުނެފައިވެއެވެ. މިއީ ރާއްޖެއިން މަސްތުވާތަކެތި ނައްތާލުމަށް ކުރަމުންދާ މަސައްކަތަށް ލިބުނު ކާމިޔާބީއެއް ކަމަށް ފުލުހުން ސިފަކުރެއެވެ.
Ads by MACL
