"ޒަކާތު ބެނެފިޝަރީ ކާޑު" އަންނަ އަހަރު ތައާރަފުކުރަނީ: ފަގީރުންނަށް ފަސޭހަ ގޮތެއް!
ފަގީރުންގެ ދަފުތަރުގައި ރަޖިސްޓްރީވެފައިވާ ފަރާތްތަކަށް ޚާއްސަކޮށް "ޒަކާތު ބެނެފިޝަރީ ކާޑު"ގެ ނަމުގައި އާ ކާޑެއް އަންނަ އަހަރު ތައާރަފުކުރުމަށް މަސައްކަތް ކުރަމުންދާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ދައުލަތުގެ މީޑިއާ ޕީއެސްއެމް ނިއުސްގެ 'ރާއްޖެ މިއަދު' ޕްރޮގްރާމްގައި މިރޭވާހަކަ ދައްކަވަމުން މިނިސްޓަރު ވިދާޅުވީ، މި ކާޑުގެ މަގުސަދަކީ ފަގީރުންނަށް ޒަކާތުގެ ފައިސާ ލިބިގަތުމުގައި ދިމާވާ ދަތިތައް ކުޑަކޮށް، އެފަރާތްތަކަށް އިތުރު ފަސޭހަތަކެއް ހޯދައިދިނުން ކަމަށެވެ.
މި ކާޑު ދޫކުރުމަށް ހަމަޖެހިފައިވަނީ ބޭންކް އޮފް މޯލްޑިވްސް (ބީއެމްއެލް) އާއި ޒަކާތު ހައުސް ގުޅިގެން ކަމަށް މިނިސްޓަރު ޝަހީމް ވިދާޅުވިއެވެ. ފަގީރުންގެ ދަފުތަރުގައި ހިމެނޭ ފަރާތްތަކުގެ އަތުގައި މި ކާޑު އޮންނާނެއެވެ. އަދި ޒަކާތު ހައުސްއިން ކަނޑައަޅާފައިވާ އެހީ، ކޮންމެ އަހަރަކުވެސް މި ކާޑު މެދުވެރިކޮށް އެފަރާތްތަކަށް ލިބޭނެއެވެ. މި ނިޒާމުގެ ސަބަބުން، އެހީއަށް ބޭނުންވާ ފަރާތްތަކަށް ވަގުތުން އެހީތެރިކަން ފޯރުކޮށްދިނުމުގެ ފުރުސަތު އިތުރުވެގެންދާނެއެވެ.
Ads by BMLމި ކާޑު މަސައްކަތްކުރާނެ ގޮތުގެ މިސާލެއް ދެއްވަމުން މިނިސްޓަރު ޝަހީމް ވިދާޅުވީ، ކޮންމެ ފަގީރަކަށް މަހަކު 5،000 ރުފިޔާ ކަނޑައަޅާފައިވާނަމަ، ކާޑު ބޭނުންކުރެވޭ ފިހާރައަކަށް ގޮސް ކާޑު ދައްކާލުމުން، ކާޑުގައިވާ ފައިސާގެ އަދަދުން ކާބޯތަކެތި ލިބޭނެ ކަމަށެވެ. މީގެ ސަބަބުން ފައިސާ ނުލިބި ހިފާއްޓާލެވޭ ފަދަ ކަންކަން ހުއްޓުވައި، ޒަކާތުގެ ފައިސާ ބޭނުންކުރެވެނީ ޒަރޫރީ ބޭނުންތަކަށްކަން ކަށަވަރުކުރުމަށް އެހީތެރިވެދޭނެއެވެ.
ޒަކާތު ބެނެފިޝަރީ ކާޑު ތައާރަފުކުރުމަކީ ޒަކާތު ފަންޑުން ފަގީރުންނާއި މިސްކީނުންގެ ޒަރޫރީ ބޭނުންތަކަށް އެހީވުން ފުޅާކުރުމަށް މިހާރުވެސް ކުރިއަށްދާ މަސައްކަތުގެ ބައެކެވެ. މިނިސްޓަރު ޝަހީމް މީގެ ކުރިން ވިދާޅުވެފައިވާ ގޮތުގައި، ޒަކާތު ފަންޑުން އެހީވުން އިތުރުކުރާނެ ގޮތްތަކުގެ މައްޗަށް މިނިސްޓްރީން ކަރުދާހެއް ތައްޔާރުކުރުމުގެ މަސައްކަތް ކުރަމުންދާ ކަމަށާއި، އެ ކަރުދާސް ވަޒީރުންގެ މަޖިލީހަށް ހުށަހަޅާނެ ކަމަށެވެ.
މިނިސްޓަރު އިތުރަށް ހާމަކުރެއްވި ގޮތުގައި، މި އާ ތަސައްވުރުގެ ތެރޭގައި ބޭސްފަރުވާއާއި ތައުލީމާއި ބޯހިޔާވަހިކަމާއި އެފަދަ އެހެނިހެން ޒަރޫރީ ކަންތައްތަކުގައި ފަގީރުންނާއި މިސްކީނުންނަށް ޒަކާތު ފަންޑުން އެހީތެރިވުން ހިމެނެއެވެ. މިއީ ރާއްޖޭގައި ދެވަނައަށް ބޭއްވި ބައިނަލްއަގުވާމީ ޒަކާތު ކޮންފަރެންސް އިފްތިތާހުކުރުމަށް މިދިޔަ އޮގަސްޓު މަހު ބޭއްވި ރަސްމިއްޔާތުގައި ވެސް މިނިސްޓަރު ފާހަގަކުރައްވާފައިވާ ކަމެކެވެ. މިގޮތުން، ފަގީރުންނަށް ދިރިއުޅުމުގެ ފެންވަރު ރަނގަޅުކުރުމަށް ދެމެހެއްޓެނިވި އެހީތެރިކަމެއް ފޯރުކޮށްދިނުމަކީ މި މަސައްކަތުގެ މުހިންމު އަމާޒެކެވެ.
Ads by MACL
