ބުދަ، 18 ނޮވެމްބަރު 2026
ޚަބަރު

ކައުންސިލް އިންތިޚާބު: 133 ރަށަކަށް 3 ކައުންސިލަރުން، 46 ރަށަކަށް 5 ކައުންސިލަރުން ހޮވަނީ

ކައުންސިލް އިންތިޚާބު: 133 ރަށަކަށް 3 ކައުންސިލަރުން، 46 ރަށަކަށް 5 ކައުންސިލަރުން ހޮވަނީ

ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީ (ޑަބްލިޔުޑީސީ) އިންތިޚާބުގެ އިންތިޚާބީ ދާއިރާތައް ކަނޑައެޅުމާބެހޭ ވަގުތީ ރިޕޯޓު އިލެކްޝަންސް ކޮމިޝަނުން މިއަދު ޢާންމުކޮށްފިއެވެ.

އަންނަ އަހަރުގެ އެޕްރީލް މަހުގެ 4 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ މި އިންތިޚާބަށް ގިނަ ބަދަލުތަކެއް އަންނައިރު، ރިޕޯޓާ ގުޅޭގޮތުން ޝަކުވާ ހުށައެޅުމުގެ ފުރުޞަތު މި މަހުގެ 15 ވަނަ ދުވަހުގެ ނިޔަލަށް ވަނީ ހުޅުވާލާފައެވެ.

އިލެކްޝަންސް ކޮމިޝަނުން ނިންމާފައިވަނީ ލޯކަލް ކައުންސިލްތަކުގެ އިންތިޚާބާއި ޑަބްލިޔުޑީސީ އިންތިޚާބު އަންނަ އަހަރުގެ އެޕްރީލް މަހުގެ 4 ވާ ހޮނިހިރު ދުވަހު ބޭއްވުމަށެވެ. ވަގުތީ ރިޕޯޓުގައިވާ ގޮތުން، މި ދެ އިންތިޚާބުން ޖުމުލަ 1362 މެންބަރުން އިންތިޚާބުކުރަންޖެހެއެވެ. އޭގެތެރެއިން 681 މެންބަރުންނަކީ ލޯކަލް ކައުންސިލްތަކަށް އިންތިޚާބުކުރާ މެންބަރުން ކަމަށްވާއިރު، އަނެއް 681 މެންބަރުންނަކީ ޑަބްލިޔުޑީސީއަށް އިންތިޚާބުކުރާ މެންބަރުންނެވެ. ލޯކަލް ކައުންސިލްތަކަށް ޖުމުލަ 226 ދާއިރާއަށް މެންބަރުން އިންތިޚާބުކުރެވޭނެއެވެ. މީގެތެރެއިން 179 ދާއިރާއަކީ ރަށު ކައުންސިލްތަކުގެ ދާއިރާތައް ކަމަށްވާއިރު، 47 ދާއިރާއަކީ ސިޓީ ކައުންސިލްތަކުގެ ދާއިރާތަކެވެ.

މިފަހަރުގެ ލޯކަލް ކައުންސިލް އިންތިޚާބު އޮންނާނީ ބޮޑު ބަދަލަކާއެކުއެވެ. ޤާނޫނުތަކަށް ގެނައި އިޞްލާޙުތަކާ ގުޅިގެން 2000 މީހުންނަށްވުރެ ކުޑަ އާބާދީ ހިމެނޭ ރަށްރަށަށް 3 ކައުންސިލަރުން އިންތިޚާބުކުރާނެއެވެ. 2000 މީހުންނަށްވުރެ ބޮޑު އާބާދީއެއް ހުރި ރަށްރަށަށް 5 ކައުންސިލަރުން އިންތިޚާބުކުރާނެއެވެ. މީގެ އިތުރުން، މި އިންތިޚާބަށްފަހު އަތޮޅު ކައުންސިލްތައް އުވިގެންދާނެއެވެ. ފުރަތަމަ ފަހަރަށް އައްޑޫ ސިޓީގެ ހުޅުދޫއާއި މީދޫއަށް ވަކި ކައުންސިލްތަކެއް ލިބިގެންދާނެއެވެ.

ވަގުތީ ރިޕޯޓުގައިވާ ގޮތުން، 2000 އަށްވުރެ އާބާދީ ކުޑަ 133 ރަށުގައި 3 ކައުންސިލަރުން ތިބޭނެއެވެ؛ އެއީ ކައުންސިލްގެ ރައީސް އަދި 1 އަންހެން ކައުންސިލަރު ހިމެނޭ ގޮތަށެވެ. މި ރަށްރަށުގެ ޑަބްލިޔުޑީސީއަށްވެސް 3 މެންބަރުން އިންތިޚާބުކުރާނެއެވެ. އަދި 2000 އަށްވުރެ އާބާދީ ބޮޑު 46 ރަށުގައި 5 ކައުންސިލަރުން ތިބޭނެއެވެ؛ އެއީ ކައުންސިލްގެ ރައީސް އަދި 2 އަންހެން ކައުންސިލަރުން ހިމެނޭ ގޮތަށެވެ. މި ރަށްރަށުގެ ޑަބްލިޔުޑީސީއަށްވެސް 5 މެންބަރުން އިންތިޚާބުކުރާނެއެވެ. އާބާދީ ކަނޑައަޅާފައިވަނީ މިދިޔަ ސެޕްޓެމްބަރު މަހުގެ 30 ވަނަ ދުވަހުގެ ނިޔަލަށް ރަށްރަށުގައި ތިބި އާބާދީއަށް ބެލުމަށްފަހުއެވެ.

ސިޓީތަކަށް އިންތިޚާބުކުރާ ގޮތަށް ބަލާއިރު، ކުޅުދުއްފުށި ސިޓީ (އާބާދީ 11,110) އަދި ތިނަދޫ ސިޓީ (އާބާދީ 10,453) އަށް ލާމަރުކަޒީ ޤާނޫނުގައިވާ ގޮތުގެ މަތިން ކައުންސިލްގެ މޭޔަރާއި 6 މެންބަރުން (2 އަންހެން މެންބަރުން ހިމެނޭގޮތަށް) އިންތިޚާބުކުރާނެއެވެ. އެ ސިޓީތަކުގެ ޑަބްލިޔުޑީސީއަށްވެސް 7 މެންބަރުން (ރައީސްއާއި 6 ދާއިރާއިން 1 މެންބަރު) އިންތިޚާބުކުރާނެއެވެ. ފުވައްމުލައް ސިޓީ (އާބާދީ 13,802) އަކީ 8 އަވަށެއްގެ މައްޗަށް އެކުލެވޭތީ، މޭޔަރާއި 8 މެންބަރުން (3 އަންހެން މެންބަރުން ހިމެނޭގޮތަށް ކޮންމެ އަވަށަކަށް 1 ގޮނޑި) އިންތިޚާބުކުރާނެއެވެ. ފުވައްމުލައް ޑަބްލިޔުޑީސީއަށްވެސް 9 މެންބަރުން (ރައީސްއާއި 8 މެންބަރުން) އިންތިޚާބުކުރާނެއެވެ.

އައްޑޫ ސިޓީ (ހުޅުދޫއާއި މީދޫ ނުލައި އާބާދީ 28,800) އަށް މޭޔަރާއި 10 މެންބަރުން (3 އަންހެން މެންބަރުން ހިމެނޭގޮތަށް) އިންތިޚާބުކުރެވޭނެއެވެ. އަދި އައްޑޫ ސިޓީ ޑަބްލިޔުޑީސީއަށްވެސް ރައީސްއާއި 10 މެންބަރުން އިންތިޚާބުކުރާނެއެވެ. މާލެ ސިޓީ (އާބާދީ 83,813) އަށް ރައްޔިތުންގެ މަޖިލީހުގެ 17 ދާއިރާއަށް ބަލައި މޭޔަރާއި 17 މެންބަރުން (6 އަންހެން މެންބަރުން ހިމެނޭގޮތަށް) އިންތިޚާބުކުރެވޭނެއެވެ. މާލެ ސިޓީ ޑަބްލިޔުޑީސީއަށްވެސް ރައީސްއާއި 17 މެންބަރުން އިންތިޚާބުކުރާނެއެވެ.

ކައުންސިލްތަކުގެ ނައިބު ރައީސުންނާއި ސިޓީތަކުގެ ޑެޕިއުޓީ މޭޔަރުން އިންތިޚާބުކުރާނީ ކައުންސިލްގައި ހިމެނޭ މެންބަރުންގެ މެދުގައި ނެގޭ ސިއްރު ވޯޓަކުންނެވެ. އިލެކްޝަންސް ކޮމިޝަނުން ހާމަކުރެއްވި ގޮތުގައި، މި ވަގުތީ ރިޕޯޓަށް ޝަކުވާ ހުށައެޅުމުގެ ފުރުޞަތު މި މަހުގެ 15 ވަނަ ދުވަހުގެ ނިޔަލަށް، ހުކުރު ދުވަސް ފިޔަވައި ކޮންމެ ދުވަހަކު ހެނދުނު 9:00 އިން މެންދުރުފަހު 3:00 އަށް އަދި ހުކުރު ދުވަހު މެންދުރުފަހު 3:00 އިން ހަވީރު 5:00 އަށް ހުޅުވާލާފައިވެއެވެ.

ޝަކުވާތައް އިލެކްޝަންސް ކޮމިޝަނުގެ އިދާރާއަށް ނުވަތަ މެއިލް މެދުވެރިކޮށް ހުށައެޅޭނެއެވެ. ލޯކަލް ކައުންސިލް އަދި ޑަބްލިޔުޑީސީ އިންތިޚާބަކީ ކޮންމެ ފަހަރަކުވެސް އެންމެ ގިނަ ކެންޑިޑޭޓުން ވާދަކުރާ އިންތިޚާބެވެ.