ބުދަ، 18 ނޮވެމްބަރު 2026
ޚަބަރު

ޑިސެމްބަރުގެ ފުރަތަމަ އަށް ދުވަހު ބައި ލައްކައަށްވުރެ ގިނަ ފަތުރުވެރިން ރާއްޖެއަށް

ޑިސެމްބަރުގެ ފުރަތަމަ އަށް ދުވަހު ބައި ލައްކައަށްވުރެ ގިނަ ފަތުރުވެރިން ރާއްޖެއަށް

މި ހިނގާ ޑިސެމްބަރު މަހުގެ ފުރަތަމަ އަށް ދުވަހު ރާއްޖެއަށް 51،000 އަށްވުރެ ގިނަ ފަތުރުވެރިން ޒިޔާރަތްކޮށްފައިވާކަމަށް ޓުއަރިޒަމް މިނިސްޓްރީގެ ތަފާސްހިސާބުތަކުން ހާމަވެއްޖެއެވެ.

މިއީ މިދިޔަ އަހަރުގެ މި މުއްދަތާއި އަޅާބަލާއިރު 10.5 އިންސައްތައިގެ ކުރިއެރުމެކެވެ.

ޓުއަރިޒަމް މިނިސްޓްރީން އާންމުކޮށްފައިވާ 'މޯލްޑިވްސް ޓުއަރިޒަމް އަޕްޑޭޓްސް' ރިޕޯޓްގައިވާގޮތުން، މިމަހުގެ ފުރަތަމަ އަށް ދުވަހު ޖުމްލަ 51,157 ފަތުރުވެރިން ރާއްޖެއަށް ޒިޔާރަތްކޮށްފައި ވެއެވެ. މިދިޔަ އަހަރުގެ މި މުއްދަތުގައި ޒިޔާރަތްކޮށްފައިވަނީ 46,302 ފަތުރުވެރިންނެވެ. މި ކުރިއެރުމަކީ ރާއްޖޭގެ ފަތުރުވެރިކަމުގެ ސިނާއަތަށް ލިބުނު ވަރަށް ބޮޑު ކާމިޔާބީއެއް ކަމަށް ވެއެވެ.

މި އަހަރުގެ މިހާތަނަށް ރާއްޖެއަށް ޖުމްލަ 2,073,218 ފަތުރުވެރިން ޒިޔާރަތްކޮށްފައި ވެއެވެ. މިއީ މިދިޔަ އަހަރުގެ މި މުއްދަތުގައި ޒިޔާރަތްކުރި 1,883,937 ފަތުރުވެރިންނާ އަޅާބަލާއިރު 10 އިންސައްތައިގެ އިތުރުވުމެކެވެ. މި އަދަދުތަކުން ދައްކަނީ ރާއްޖޭގެ ފަތުރުވެރިކަމަށް ދުނިޔޭގެ އެކި ކަންކޮޅުތަކުން ލިބެމުންދާ ތަރުހީބު ގިނަވެފައިވާ މިންވަރެވެ.

ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރާ ގައުމުތަކުގެ ލިސްޓުގެ އެންމެ ކުރީގައި އަދިވެސް އޮތީ ޗައިނާއެވެ. އެގޮތުން މިހާތަނަށް ޒިޔާރަތްކުރި ފަތުރުވެރިންގެ 15.3 އިންސައްތައަކީ ޗައިނާ ފަތުރުވެރިންނެވެ. އަދަދުން ބަލާނަމަ އެއީ 317,348 ފަތުރުވެރިންނެވެ. ލިސްޓުގެ ދެވަނައިގައި އޮތް ރަޝިޔާއިން މިހާތަނަށް 259,800 ފަތުރުވެރިން ޒިޔާރަތްކޮށްފައިވާއިރު އެއީ ރާއްޖެ ޒިޔާރަތްކުރި ފަތުރުވެރިންގެ 12.5 އިންސައްތައެވެ.

ރާއްޖެއަށް އެވްރެޖްކޮށް ދުވާލެއްގެ މައްޗަށް 6,062 ފަތުރުވެރިން ޒިޔާރަތްކުރާއިރު، ތަފާސްހިސާބުތައް ދައްކާގޮތުން، ފަތުރުވެރިން އެންމެ ގިނައިން ޗުއްޓީ ހޭދަކޮށްފައިވަނީ ރިސޯޓްތަކުގައެވެ. އެގޮތުން 1,525,352 ފަތުރުވެރިން ރިސޯޓްތަކުގައި ޗުއްޓީ ހޭދަކުރިއިރު، 448,873 ފަތުރުވެރިއަކު ގެސްޓްހައުސްތަކުގައި ޗުއްޓީ ހޭދަކޮށްފައި ވެއެވެ. މިއީ ރާއްޖޭގެ ފަތުރުވެރިކަމުގެ ސިނާއަތުގެ ތެރެއިން އެކި ބާވަތުގެ ތަންތަން ފަތުރުވެރިންނަށް ކަމުދާކަން ހާމަވާ ކަމެކެވެ.