އެފްޑީސީ ފްލެޓްތަކުގެ ފެން ބިލާމެދު ކަންބޮޑުނުވޭ: ބިލުކުރާނީ ހަވާލުވި ފަހުން ބޭނުންކުރި ފެނަށް އެކަނި
އެފްޑީސީން ހުޅުމާލެ ފޭސް 2 ގައި އިމާރާތް ކޮށްފައިވާ ފްލެޓްތަކުގައި ކުއްޔަށް ދިރިއުޅޭ ފަރާތްތަކުން ފެންބިލާ މެދު ކަންބޮޑުނުވުމަށް އެފްޑީސީން ބުނެފިއެވެ.
ހުޅުމާލެ ދެވަނަ ފިޔަވަހީގައި އިމާރާތްކޮށްފައިވާ އެފްޑީސީގެ ފްލެޓްތަކުގެ ފެން ބިލު ބޮޑުވެގެން އާންމުންގެ މެދުގައި އުފެދިފައިވާ ކަންބޮޑުވުންތަކަށް ޖަވާބުދެމުން، އެ ފްލެޓްތަކަށް ބިލުކުރާނީ ތަން ހަވާލުވި ފަހުން ބޭނުންކޮށްފައިވާ މިންވަރަށް ކަމުގެ ޔަގީންކަން މާލެ ވޯޓަރ އެންޑް ސުވެރޭޖް ކޮމްޕެނީ (އެމްޑަބްލިއުއެސްސީ) އިން ދީފިއެވެ.
އެފްޑީސީގެ އާ ޓަވަރުތަކުގައި ދިރިއުޅޭ ބައެއް ފަރާތްތަކުން، އެމީހުންގެ ނަމުގައި ބޮޑެތި އަދަދުން ފެން ބިލު ހަދާފައިވާ ކަމަށް ބުނެ ސޯޝަލް މީޑިއާގައި ކަންބޮޑުވުން ފާޅުކޮށްފައިވަނިކޮށް، އެމްޑަބްލިއުއެސްސީން ނެރުނު ބަޔާނެއްގައި ބުނެފައިވަނީ އެއީ އެރި އޮޅުމެއް ކަމަށެވެ. އެ ކުންފުނިން ހާމަކުރި ގޮތުގައި މިހާރު ފެންނަން ހުރި ބޮޑެތި ބިލުތަކަކީ، އެ ފްލެޓްތައް ކުއްޔަށް ދިނުމުގެ ކުރިން އެކި ބޭނުންތަކަށް ހިނގާފައިވާ ފެނަށް އެފްޑީސީގެ ނަމުގައި ހަދާފައިވާ ބިލުތަކެކެވެ.
Ads by BMLމި އޮޅުން އަރަން މެދުވެރިވި މައިގަނޑު ސަބަބެއް ކަމަށް އެ ކުންފުނިން ފާހަގަކުރަނީ، ފްލެޓްތަކުގެ ވެރިފަރާތްތަކުން އެމްޑަބްލިއުއެސްސީގެ މޯބައިލް އެޕްލިކޭޝަނަށް މީޓަރު ނުވަތަ އެކައުންޓް ނަންބަރު އެޅުމުން، ކުރީގެ ތާރީޚުތަކުގައި ހިނގާފައިވާ ބިލުތައް ވެސް ފެންނަން ހުރުމުންނެވެ. ނަމަވެސް އެއީ ފްލެޓް ލިބުނު ފަރާތްތަކުން ދައްކަންޖެހޭ ފައިސާއެއް ނޫންކަމަށް އެ ކުންފުނިން ވިދާޅުވިއެވެ.
އެމްޑަބްލިއުއެސްސީން ވަނީ ފްލެޓްތަކުގައި ދިރިއުޅޭ ފަރާތްތަކަށް، ބިލުކުރުމުގެ ކަންކަން ކުރިއަށްދާނެ ގޮތް ސާފުކޮށްދީފައެވެ. އެގޮތުން:
* ކުއްޔަށް ދިރިއުޅޭ ފަރާތްތަކަށް ބިލުކުރަން ފަށާނީ، އެ ފަރާތަކުން ފްލެޓާ ހަވާލުވިއިރު ނަގާފައިވާ މީޓަރު ރީޑިންގ އަށް ބަލައިގެންނެވެ.
* އެ ތާރީޚުގެ ފަހުން ބޭނުންކޮށްފައިވާ ފެނަށް މެނުވީ، ފްލެޓްގެ ވެރިފަރާތަށް ބިލު ނުކުރާނެއެވެ.
އެހެންކަމުން، އެޕްލިކޭޝަނުން ފެންނަން ހުރި ކުރީގެ ބިލުތަކާ މެދު ކަންބޮޑުނުވުމަށް އެ ކުންފުނިން ވަނީ އިލްތިމާސްކޮށްފައެވެ.
Ads by MACL
