ދުނިޔޭގެ ފެންވަރުގައި ކޮރަޕްޝަނާ ދެކޮޅަށް ބާއްވާ އެންމެ ބޮޑު މަހާސިންތާއަށް ރާއްޖޭގެ ވަފުދެއް ގަތަރަށް
އ.ދ.ގެ ކޮރަޕްޝަނާ ދެކޮޅަށް އެކުލަވާލާފައިވާ މުއާހަދާ ނުވަތަ 'އުންކެކް' ގެ ބައިވެރިންގެ 11 ވަނަ ބައްދަލުވުން (ކޮސްޕް11) ގައި ބައިވެރިވުމަށް ރާއްޖޭގެ އެންޓި-ކޮރަޕްޝަން ކޮމިޝަން (އޭސީސީ) އިން ނިންމައިފިއެވެ.
ގަތަރުގެ ދޯހާގައި ބާއްވާ މި ބައްދަލުވުމަކީ ބައިނަލްއަޤްވާމީ މައިދާނުގައި ކޮރަޕްޝަނާ ދެކޮޅަށް ކުރެވޭ މަސައްކަތްތައް ހަރުދަނާކުރުމަށް ލިބޭ ވަރަށް މުހިންމު ފުރުސަތެކެވެ.
މި ކޮންފަރެންސް ކުރިއަށްދާނީ މި މަހުގެ 15 އިން 19 ގެ ނިޔަލަށެވެ. މިއީ އދ.ގެ ޑްރަގްސް އެންޑް ކްރައިމް (ޔޫއެންއޯޑީސީ) އާއި ގަތަރު ސަރުކާރު ގުޅިގެން، ކޮންމެ ދެ އަހަރަކުން އެއްފަހަރު އިންތިޒާމުކުރާ، އަދި އުންކެކްއާ ގުޅޭ މައިގަނޑު ނިންމުންތައް ނިންމުމަށް ބާއްވާ އެންމެ އިސް ފޯރަމެވެ.
Ads by BMLމި ބައްދަލުވުމުގައި ދައުލަތްތަކާއި، ބައިނަލްއަޤްވާމީ ޖަމްޢިއްޔާތަކުގެ އިތުރުން މަދަނީ ޖަމިއްޔާތަކުން ބައިވެރިވެ، ކޮރަޕްޝަން ހުއްޓުވުމަށް އަޅާފައިވާ ފިޔަވަޅުތައް މުރާޖަޢާކުރާނެއެވެ. އަދި އެންމެ ރަނގަޅު އުސޫލުތައް ހިއްސާކޮށް، ކުރިމަގުގައި ގެންގުޅޭނެ ސްޓްރެޓެޖީތަކާއި ޤަރާރުތައް ފާސްކުރުމަށްވެސް ވަނީ ހަމަޖެހިފައެވެ. މީގެ އިތުރުން، ފަންނީ އެހީތެރިކަން ބަދަލުކުރުމާއި ޤާބިލުކަން އިތުރުކުރުމަށް މި ކޮންފަރެންސްގެ ތެރެއިން ފުރުސަތުތައް ފަހިވެގެންދާނެއެވެ.
މި މުހިންމު ބައްދަލުވުމުގައި ރާއްޖެ ތަމްސީލުކުރުމަށް އޭސީސީގެ އިތުރުން މިނިސްޓްރީ އޮފް ފިނޭންސް އެންޑް ޕްލޭނިންގ އަދި ކަމާގުޅޭ އެންޖީއޯތަކުގެ ބޭފުޅުންވެސް ބައިވެރިވެވަޑައިގަންނަވާނެއެވެ.
މި ދަތުރުގެ މައިގަނޑު މަޤްޞަދަކީ ކޮރަޕްޝަނާ ދެކޮޅަށް ރާއްޖެއިން ކުރަމުންދާ މަސައްކަތްތައް ބައިނަލްއަޤްވާމީ މުޖުތަމަޢާ ހިއްސާކުރުމާއި، ބޭރު ދުނިޔޭގެ އެހީތެރިކަމާއެކު ރާއްޖޭގެ ނިޒާމު އިތުރަށް ހަރުދަނާކޮށް، ގުޅުން ބަދަހިކުރުން ކަމަށް އޭސީސީން މަޢުލޫމާތު ދެއެވެ.
Ads by MACL
