ރާއްޖޭގެ ކުޅިވަރަށް އާ ބާބެއް، "އޯޝަންމޭން މޯލްޑިވްސް" އިފުތިތާހުކޮށްފި
ރާއްޖޭގެ ކުޅިވަރުގެ ތާރީޚުގައި އާ ބާބެއް ލިޔަން ފަށައި، ދުނިޔޭގެ މަޝްހޫރު ފްރެންޗައިޒް "އޯޝަންމޭން ގްލޯބަލް" ގެ ބައިނަލްއަގުވާމީ މުބާރާތް، "އޯޝަންމޭން މޯލްޑިވްސް" މިއަދު ރަސްމީކޮށް އިފުތިތާހުކޮށްފިއެވެ.
ކ. މާފުށީގައި މިއަދު ބޭއްވި ކުލަގަދަ ރަސްމިއްޔާތެއްގައި މި ތާރީޚީ މުބާރާތް ފައްޓަވައިދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިއުއެވެ.
ރާއްޖޭގެ އަމިއްލަ ޖަމިއްޔާއެއް ކަމަށްވާ 'ސްވިމް މޯލްޑިވްސް' އިން އިސްނަގައިގެން އިންތިޒާމުކުރާ މި ބޮޑު ހަރަކާތުގައި ދުނިޔޭގެ 40 ގައުމަކުން 500 އަށްވުރެ ގިނަ ފެތުންތެރިން ބައިވެރިވެއެވެ. މިއީ ބައިނަލްއަގުވާމީ ކުޅިވަރު މުބާރާތްތައް ރާއްޖެއަށް ގެނައުމަށް ސަރުކާރުން ގެންގުޅޭ ތަސައްވުރުގެ ދަށުން އެޅުނު ވަރަށް މުހިންމު ފިޔަވަޅެއްކަން ފާހަގަކުރައްވައި ވަޒީރު ވިދާޅުވީ، މި މުބާރާތަކީ ދުނިޔޭގެ ކުޅިވަރު ޗާޓުގައި ރާއްޖެ ހަލުވިކަމާއެކު ކުރިއަރަމުން އަންނަ ކަމުގެ އަލިގަދަ ހެއްކެއް ކަމަށެވެ.
Ads by BMLމިއީ ހަމައެކަނި ކުޅިވަރުގެ ހަރަކާތެއް ނޫންކަން ފާހަގަކުރައްވަމުން މިނިސްޓަރު ވިދާޅުވީ، މިއީ ރާއްޖޭގެ ޖަޒީރާ ރަށްތަކުގެ ހިތްގައިމުކަމާއި ގުދުރަތީ ރީތިކަން، އަދި ސާފު ނޫ ކަނޑުތައް މުޅި ދުނިޔެއަށް ދައްކާލަން ލިބޭ ރަނގަޅު ފުރުސަތެއް ކަމަށެވެ. ސަރުކާރުގެ އަމާޒަކީ ރާއްޖެއަކީ ހަމައެކަނި ޗުއްޓީ ހޭދަކޮށްލާ މަންޒިލެއްގެ ބަދަލުގައި، ބައިނަލްއަގުވާމީ ކުޅިވަރުގެ މުހިންމު ހަބަކަށް ހެދުން ކަމަށާއި، މިފަދަ މުބާރާތްތަކުގެ ސަބަބުން ލޯކަލް ޓޫރިޒަމަށާއި މުޅި އިގުތިސާދަށް ބޮޑު ކުރިއެރުމެއް ލިބިގެންދާނެ ކަމަށްވެސް އެމަނިކުފާނު ވިދާޅުވިއެވެ.
ދުނިޔޭގެ ފެންވަރުގެ އެތުލީޓުން ރާއްޖޭގައި ވާދަކުރާތަން ފެނުމަކީ ދިވެހި ޒުވާނުންނަށް ކުޅިވަރުގެ މައިދާނުގައި ކުރިއަށްދިޔުމަށް ލިބޭނެ ވަރަށް ބޮޑު ހިތްވަރެއްކަން ވަޒީރު ފާހަގަކުރެއްވިއެވެ. އަދި މި މުބާރާތް ބޭއްވުމުގައި މާފުށިން ދިން ފުރިހަމަ އެއްބާރުލުމަށް ޝުކުރު އަދާކުރައްވަމުން، ކުޅިވަރު ކުރިއެރުވުމާއެކު ތިމާވެށި ހިމާޔަތްކުރުމަށް ސަރުކާރުން ޚާއްސަ އިސްކަމެއް ދެއްވާކަންވެސް އެމަނިކުފާނު ފާހަގަކުރެއްވިއެވެ.
"މިއީ ހަމައެކަނި ފެށުމެއް. އަޅުގަނޑުމެންގެ އުންމީދަކީ ރާއްޖެއަކީ އޯޕަން ވޯޓާ ސްވިމިން އާއި މޫދުގެ އެހެނިހެން ކުޅިވަރުތަކުގެ މައި ހަބަކަށް ހެދުން،" ރާފިއު ވިދާޅުވިއެވެ.
މީގެ އިތުރުން، ކުރިއަށް އޮތް ތަނުގައިވެސް ބައިނަލްއަގުވާމީ މިފަދަ އިތުރު ބޮޑެތި މުބާރާތްތައް ރާއްޖެއަށް ގެންނަވާނެ ކަމުގެ ޔަގީންކަން ވަޒީރު ވަނީ ދެއްވާފައެވެ.
Ads by MACL
