ބުދަ، 18 ނޮވެމްބަރު 2026
ލައިފްސްޓައިލް

ޒުވާނުން ކައިވެނި ލަސްކުރަނީ ބައިވެރިޔާ އިޚްތިޔާރު ކުރުމުގައި ބޮޑަށް ވިސްނާތީ: ވީޑިއޯއެއް ވައިރަލްވެއްޖެ

ޒުވާނުން ކައިވެނި ލަސްކުރަނީ ބައިވެރިޔާ އިޚްތިޔާރު ކުރުމުގައި ބޮޑަށް ވިސްނާތީ: ވީޑިއޯއެއް ވައިރަލްވެއްޖެ

ޒުވާނުން ކައިވެނި ކުރުން ލަސްކުރަނީ ނުވަތަ ކައިވެނި ނުކޮށް ތިބެނީ ކައިވެނިދެކެ ބިރުން ނޫން ކަމަށާއި، ނަމަވެސް އުމުރުން 30 އަހަރާއި 35 އަހަރާ ދެމެދުގެ ޒުވާނުން ބޮޑަށް ބިރުގަންނަނީ ދިރިއުޅުމުގެ ބައިވެރިޔާ އިޚްތިޔާރު ކުރުމުގައި ގޯސް ނިންމުމެއް ނިންމިދާނެތީ ކަމަށް ބުނެ އިންސްޓަގްރާމްގައި އާންމުކުރި ވީޑިއޯއެއް ގިނަ ބައެއްގެ ސަމާލުކަމަށް އަތުވެއްޖެއެވެ.

"އިންސްޓާ އަންކަލް" ގެ ނަމުން މަޝްހޫރުވެފައިވާ ދުވަސްވީ ކޮންޓެންޓް ކްރިއޭޓަރެއް ކަމަށްވާ ވިނޯދު ކުމާރު ޝަރުމާ ހިއްސާކުރި މި ވީޑިއޯއާ އެކު، މި ޒަމާނުގެ ޒުވާނުން ކައިވެނި ލަސްކުރާ ސަބަބުތަކާ މެދު ސޯޝަލް މީޑިއާގައި ބޮޑު ބަހުސެއް ވަނީ ފެށިފައެވެ.

ޝަރުމާ ފާހަގަކުރި ގޮތުގައި މިހާރުގެ ޒުވާނުންނަށް ވަނީ އެމީހުންގެ ކުރީގެ ޖީލުތަކުގެ މީހުން އުފާވެރިކަމެއް ނެތް ކައިވެނިތަކެއްގައި، ހަމައެކަނި ދިރިއުޅުން "އެޖަސްޓް" ކޮށްގެން، އަދި އެނބުރި ދާނެ އެހެން މަގެއް ނެތުމުން މަޖުބޫރުވެގެން އުޅޭ މަންޒަރު ވަރަށް ގާތުން ފެނިފައެވެ. އެހެންކަމުން، މުޖުތަމައު ގަބޫލުކުރާ ވަކި އުމުރަކަށް ދިއުމުން ކައިވެނިކުރުމުގެ ބަދަލުގައި، ޒުވާނުން މިހާރު ބޮޑަށް އިސްކަންދެނީ ނަފްސާނީ ދުޅަހެޔޮކަމަށާއި ދެމީހުންގެ މެދުގައި އޮންނަ ވިސްނުމާއި ގުޅުމަށް ކަމަށް އޭނާ ބުންޏެވެ.

ދިރިއުޅުމަކީ ދިގު ދަތުރެއް ކަމަށާއި، ގޯސް ނިންމުމެއްގެ ސަބަބުން އެ ދަތުރު މާ ދިގުވެފައި ވޭންދެނިވި އެއްޗަކަށް ވެގެންދާނެކަން ފާހަގަކުރަމުން އޭނާ ބުނީ، ކައިވެނިކުރާނެ ވަކި ޚާއްޞަ އުމުރެއް އޮންނަ ކަމަށް ގަބޫލުކުރުން މިހާރު ބަދަލުވެއްޖެ ކަމަށެވެ. އަދި މަޖުބޫރުވެގެން ނުވަތަ ޕްރެޝަރާ ހުރެ އަވަސްއަރުވާލައިގެން ކައިވެނި ކުރުމަށްވުރެ، އެކަށީގެންވާ ރަނގަޅު ބައިވެރިއަކު ފެންނަންދެން މަޑުކުރުމަކީ މާ ބުއްދިވެރި ގޮތެއް ކަމަށްވެސް އޭނާ ޒުވާނުންނަށް ނަސޭހަތްތެރިވިއެވެ.

މި ވީޑިއޯއަށް ކޮމެންޓް ކުރި ގިނަ ބަޔަކު ވަނީ އޭނާގެ ވާހަކަތަކަށް ތާއީދުކޮށް، މިއީ މިހާރުގެ ޒުވާނުންގެ މެދުގައި ކައިވެންޏާ މެދު ވިސްނުން ބަދަލުވެފައިވާ ގޮތް ވަރަށް ފުރިހަމައަށް ހާމަކޮށްދޭ ވީޑިއޯއެއް ކަމަށް ބުނެފައެވެ.

ޒުވާނުން މިހާރު ކައިވެނިން ދުރުވަނީ ކައިވެނީގެ ނިޒާމަށް އިންކާރު ކުރާތީ ނޫން ކަމަށާއި، ނަމަވެސް އެއީ މުޅި އުމުރަށް ކުރެވޭ ސީރިއަސް ކަމަކަށް ވާތީ ވިސްނުންތެރިކަމާއެކު ނިންމުންތައް ނިންމަން ބޭނުންވާތީ ކަމަށްވެސް ގިނަ ބަޔަކު ފާހަގަކުރިއެވެ.

 


 

ލައިފްސްޓައިލް

އިތުރަށް ←