ދެކުނަށް މޫސުން ގޯސްވެ، ދިވެހި ޕްރިމިއާ ލީގުގައި ނިއު އާއި ގައްދޫ ކުޅެން އޮތް މެޗު ކެންސަލްކޮށްފި
ރާއްޖޭގެ ދެކުނުގެ ސަރަހައްދުތަކަށް މޫސުން ވަރަށް ބޮޑަށް ގޯސްވުމުގެ ސަބަބުން، ދިވެހި ޕްރިމިއާ ލީގުގައި މިއަދު ހަވީރު ކުޅުމަށް ތާވަލުކުރި މެޗު ކެންސަލްކޮށްފިއެވެ.
މިއަދު ހަވީރު ގދ. ގައްދޫ ރަސްމީ ފުޓްބޯޅަ ދަނޑުގައި ކުޅުމަށް ހަމަޖެހިފައި އޮތީ ދިވެހި ޕްރިމިއާ ލީގުގެ އަވޭ މެޗުގައި ގައްދޫ ޓީމާއި ނިއުރޭޑިއަންޓް ސްޕޯޓްސް ކްލަބް ބައްދަލުކުރަން އޮތް ފޯރިގަދަ މެޗެވެ.
މި މެޗު ކެންސަލްކުރަން ޖެހުނީ ވިއްސާރަވެ، ދަނޑުގައި ފެންބޮޑުވެ ކުޅެވޭ ފަދަ ހާލަތެއް ނެތުމުގެ ސަބަބުންނެވެ.
Ads by BMLއަދި ވައިގަދަވެ ވިއްސާރަވުމުގެ ސަބަބުން ދަތުރުފަތުރު ކުރުމަށާއި، ކުޅުންތެރިންގެ ސަލާމަތާއި ރައްކާތެރިކަމަށް ބަލައި މެޗު ފަސްކުރުމަށް މެޗު ކޮމިޝަނަރާއި ރެފްރީންގެ ޓީމުން ވަނީ ނިންމާފައެވެ.
މޫސުމާ ބެހޭ ގައުމީ އިދާރާއިން ވެސް ވަނީ ދެކުނުގެ އަތޮޅުތަކަށް މޫސުން ގޯސްވާނެ ކަމަށް ލަފާކޮށް ވިއްސާރައިގެ އިންޒާރު ނެރެފައެވެ.
އެފްއޭއެމުން މައުލޫމާތު ދޭ ގޮތުގައި މޫސުން ރަނގަޅުވުމުން މި މެޗު ދެން ކުޅޭނެ ތާރީޚެއް ފަހުން އިއުލާނު ކުރާނެއެވެ.
Ads by MACL
