އާއިލާއާއެކު މެސީ ބަލަންޑޯ ހަފުލާއަށް: މިފަހަރުގެ އެވޯޑް ހަފުލާ ހާއްސަވަނީ ކީއްވެ؟
މި މަހުގެ ފަހުކޮޅު އިނގިރޭސިވިލާތުގެ ލަންޑަނުގައި ބޭއްވުމަށް ހަމަޖެހިފައިވާ ޝަރަފުވެރި ބަލަންޑޯ އެވޯޑް ހަފުލާގައި، އާޖެންޓީނާގެ ލެޖެންޑް ލަޔޮނަލް މެސީ ބައިވެރިވާނެކަން މިވަނީ ޔަގީންކޮށްދީފައެވެ.
މި ހަފުލާއަށް މެސީ ދިއުމަށް ނިންމާފައިވަނީ ހަމައެކަނި އެކަންޏެއް ނޫނެވެ؛ އޭނާގެ އަންހެނުންނާއި ތިން ކުދިން ވެސް ގޮވައިގެންނެވެ. މިއީ މިފަހަރުގެ އެވޯޑް ހަފުލާ އާދަޔާ ހިލާފަށް ހާއްސަވެގެންދާނެ ކަމުގެ ބޮޑު އިޝާރާތެކެވެ.
ރެކޯޑް އަދަދެއް ކަމަށްވާ އަށް ފަހަރު މި އެވޯޑް ހާސިލްކޮށްފައިވާ މެސީއަކީ މި ފަހަރު ވެސް މި ޝަރަފުވެރި އިނާމަށް ވާދަކުރާ ކުޅުންތެރިއެކެވެ.
Ads by BMLދުނިޔޭގެ ގައުމީ ޓީމުތަކުގެ ކޯޗުންނާއި، ކެޕްޓަނުންގެ އިތުރުން ހޮވާލެވޭ ނޫސްވެރިންގެ ވޯޓުން ހޮވާ މި އިނާމަށް މެސީއާ އެކު މިފަހަރު އެންމެ ވާދަކުރާނެ ކަމަށް ބެލެވެނީ ބަޔާން މިއުނިކްގެ އިނގިރޭސި ކެޕްޓަން ހެރީ ކޭން، ރެއާލް މެޑްރިޑަށް ކުޅެމުންދާ ފްރާންސްގެ ކެޕްޓަން ކީލިއަން އެމްބާޕޭ އަދި ބާސެލޯނާގެ ސްޕޭން ފޯވާޑް ލަމީން ޔަމާލްއެވެ. ނަމަވެސް ގިނަ ބައެއްގެ ރޭންކިންތަކަށް ބަލާއިރު، މިފަހަރު މެސީ ހިމެނުން ގާތީ މި ޒުވާން ކުޅުންތެރިންގެ ފަހަތުންނެވެ.
މި މަހުގެ 26 ވަނަ ދުވަހު ބާއްވާ މި ހަފުލާގައި މެސީ ބައިވެރިވާއިރު، މިއީ އެވޯޑް އިންތިޒާމުކުރާ ފްރާންސް ފުޓުބޯޅަ ޖަމްއިއްޔާއިން އޭނާގެ ފުޓުބޯޅަ ކެރިއަރުގެ އަގުވަޒަންކުރާނެ ހާއްސަ ދަނޑިވަޅެކެވެ.
މެސީއަށް ހާއްސަ "ސުޕަ ބަލަންޑޯ" އެއް އެރުވުމާ މެދު މީގެ ކުރިން މަޝްވަރާތަކެއް ކުރެވުނު ނަމަވެސް، ފްރާންސް ފުޓުބޯޅައިން އެކަމާ ބެހޭގޮތުން އަދި ވަކި އެއްޗެއް ހާމަކޮށްފައެއް ނުވެއެވެ. ނަމަވެސް އާއިލާއާ އެކު މެސީ މި ހަފުލާއަށް ހާޒިރުވުމަކީ ފަހަރުގައި ބޮޑު ސަޕްރައިޒެއް ފެނިގެންދާނެ ކަމެއްގެ ގޮތުގައި ގިނަ ބަޔަކު ގަބޫލުކުރެއެވެ.
ނިމިދިޔަ ޖުލައި މަހު އޮތް ވޯލްޑް ކަޕަށް ފަހު، އުމުރުން 39 އަހަރުގެ މެސީ ވަނީ އާޖެންޓީނާގެ ގައުމީ ޓީމަށް ކުޅުން ހުއްޓާލާފައެވެ. ކެރިއަރުގައި ތިން ފަހަރު ވޯލްޑް ކަޕް ފައިނަލް ކުޅެ، 2022 ވަނަ އަހަރުގެ މުބާރާތުގެ ތަށި އާޖެންޓީނާއަށް ހޯދައިދިން ފޯވާޑް ވަނީ ގައުމީ ޓީމަށް 208 މެޗު ކުޅެދީ 126 ގޯލު ޖަހައިދީފައެވެ.
ބާސެލޯނާގައި ކެރިއަރުގެ ބޮޑުބައެއް ހޭދަކުރުމަށްފަހު 2021 ވަނަ އަހަރު ފްރާންސްގެ ޕީއެސްޖީއަށް ބަދަލުވި މެސީ، އޭގެ ދެ އަހަރު ފަހުން ފެށިގެން ކުޅެމުންދަނީ އެމެރިކާގެ މޭޖަރ ލީގު ސޮކާގެ އިންޓަ މިއާމީ އަށެވެ. ގައުމީ ޓީމުން ރިޓަޔާކުރުމަށްފަހު މެސީ ބާއްވާ ފުރަތަމަ ބަލަންޑޯ ހަފުލާއަށް ވުމުން، މިއީ އޭނާގެ ފުޓުބޯޅަ ހަޔާތުގެ ތާރީޚީ ރެއަކަށް ވެގެންދާނެއެވެ.
Ads by MACL
