ބުދަ، 18 ނޮވެމްބަރު 2026
ލައިފްސްޓައިލް

ކެއްސާތީ ދޭ ބޭހެއްގެ ސަބަބުން ކަމަށް ބެލެވޭ ގޮތަށް އިންޑިއާގައި އިތުރު ކުޑަކުދިންތަކެއް މަރުވެއްޖެ

ކެއްސާތީ ދޭ ބޭހެއްގެ ސަބަބުން ކަމަށް ބެލެވޭ ގޮތަށް އިންޑިއާގައި އިތުރު ކުޑަކުދިންތަކެއް މަރުވެއްޖެ

ނުރައްކާތެރި ކެއްސާ ބޭހެއްގެ ސަބަބުން ކަމަށް ބެލެވޭ ގޮތަށް އިންޑިއާގައި އިތުރު ކުޑަކުދިންތަކެއް މަރުވެއްޖެ އެވެ. މިއާއެކު، މި ބޭސް ބޭނުންކުރުމަށްފަހު މަރުވި ކުދިންގެ ޖުމްލަ އަދަދު 12 އަށް އަރާފައިވާ ކަމަށް ރަސްމީ މަސްދަރުތަކުން ބުނެ އެވެ. މި ހާދިސާތަކާއި ގުޅިގެން، ބޭހުގެ ސާމްޕަލްތައް ތަހުލީލުކުރި ނަމަވެސް، މަރުވި ސީދާ ސަބަބެއް އަދި ހޯދިފައެއް ނުވެ އެވެ.

މަދިޔަ ޕްރަދޭޝް އާއި ރާޖަސްތާންގައި ރިޕޯޓްކުރެވިފައިވާ މި މަރުތައް ގުޅިފައިވަނީ "ކޮލްޑްރިފް" ނަމަކަށް ކިޔާ ކެއްސާ ސިރަޕަކާ އެވެ. މި ކުދިން މަރުވެފައިވަނީ ބޭސް ބޭނުންކުރުމަށްފަހު ކިޑްނީގައި އިންފެކްޝަން އުފެދި، ކިޑްނީ ފެއިލްވުމުގެ ސަބަބުން ކަމަށް ރިޕޯޓްތައް ބުނެ އެވެ.

ނަމަވެސް، ހެލްތު އެންޑް ފެމިލީ ވެލްފެއާ މިނިސްޓްރީން ބުނެފައިވަނީ، ބޭހުގެ ލެބޯޓްރީ ޓެސްޓްތަކުން، ކިޑްނީއަށް ގެއްލުންދޭ ކެމިކަލްތަކެއް ކަމަށްވާ ޑައިތިލީން ގްލައިކޯލް (ޑީއީޖީ) އާއި އެތިލީން ގްލައިކޯލް (އީޖީ) ގެ އެއްވެސް އަސަރެއް ފެނިފައި ނުވާ ކަމަށެވެ.

ޗިންދްވާރާ ޑިސްޓްރިކްޓް ކަލެކްޓަރު ޝީލަންދްރަ ސިންގް ވިދާޅުވީ، މަރުވި ކުދިންގެ ކިޑްނީ ޓިޝޫ އެނަލިސިސް އިން ހެދި ބަޔޮޕްސީ ރިޕޯޓުގައި، އެ ބޭހަކީ ޑީއީޖީ އިން ތަޣައްޔަރުވެފައިވާ އެއްޗެއް ކަމަށް ބެލެވިފައިވާ ކަމަށެވެ. މިކަން ކަށަވަރުކުރުމަށްޓަކައި، މި ބޭހުގެ އިތުރު ބެޗްތަކުން ސާމްޕަލް ނަގައި ޓެސްޓުކުރަމުން އަންނަ ކަމަށް އޭނާ ވިދާޅުވި އެވެ.

މި މައްސަލައިގެ ހަގީގަތް ހޯދުމަށްޓަކައި، ގިނަ އަދަދެއްގެ މާހިރުން ހިމެނޭ ޓީމެއް އަންނަނީ ދިރާސާތައް ކުރަމުންނެވެ.

މި ޓީމުގައި ނޭޝަނަލް ސެންޓަ ފޯ ޑިޒީޒް ކޮންޓްރޯލް (އެންސީޑީސީ)، ނޭޝަނަލް އިންސްޓިޓިއުޓް އޮފް ވައިރޮލޮޖީ (އެންއައިވީ)، އިންޑިއަން ކައުންސިލް އޮފް މެޑިކަލް ރިސާޗް (އައިސީއެމްއާރް)، އެއިމްސް ނާގްޕޫރު، ސެންޓްރަލް ޑްރަގްސް ސްޓޭންޑާޑް ކޮންޓްރޯލް އޯގަނައިޒޭޝަން (ސީޑީއެސްސީއޯ) އަދި ސްޓޭޓްތަކުގެ ކަމާ ބެހޭ އިދާރާތައް ހިމެނެ އެވެ. މި ޓީމުން ދިރާސާ ކުރަމުންދަނީ، ތަޣައްޔަރުވެފައިވާ ފެނާއި، ބަލިތައް އުފުލާ ވެކްޓާސް (ޖަނަވާރު ނުވަތަ އެހެނިހެން ދިރުންތައް) އަދި ނޭވާލާ ނިޒާމުގެ ބަލިތައް ފަދަ ސަބަބުތަކެއްގެ ސަބަބުން މި މަރުތައް ހިނގާފައިވުމުގެ ފުރުސަތުތަކެވެ.

މި ހާދިސާ އާއި ގުޅިގެން މުޅި އިންޑިއާގައި ކުޑަކުދިންގެ އާއްމު ސިއްހަތުގެ ކަންބޮޑުވުންތައް އިތުރުވެފައިވެ އެވެ.

ލައިފްސްޓައިލް

އިތުރަށް ←