ގޫގުލް ޑްރައިވް ފުރުނީމަ ޖާގަ ހުސްކުރުމަށް ދެން ހަދާނީ ކިހިނެއް؟
ގޫގުލް އެކައުންޓެއް ހުޅުވުމުން ކޮންމެ މީހަކަށްވެސް ހިލޭ ލިބެނީ 15 ޖީބީ (15GB) ގެ ޖާގައެވެ. ނަމަވެސް ގިނަ މީހުންނަށް އޮޅިފައި އޮންނަ ކަމަކީ، މި 15 ޖީބީ އަކީ ހަމައެކަނި "ގޫގުލް ޑްރައިވް" އަށް ދޭ ޖާގައެއް ކަމަށް ހީވުމެވެ. ހަގީގަތުގައި މި ޖާގަ ހިއްސާކުރަނީ ގޫގުލްގެ މައިގަނޑު 3 ޚިދުމަތަކަށެވެ. އެއީ؛ ގޫގުލް ޑްރައިވް، ޖީމެއިލް އަދި ގޫގުލް ފޮޓޯސް އެވެ.
ވީމާ، ޑްރައިވް ފުރިއްޖެނަމަ އީމެއިލް ލިބުމަށްވެސް ދަތިވާނެއެވެ. ތިރީގައި މިވަނީ ޖާގަ ސަލާމަތްކުރުމަށް އެޅިދާނެ މުހިންމު ފިޔަވަޅުތަކެވެ.
1. އެހެން މީހުން ޝެއާކުރާ ތަކެތި (Shared with me)
އެންމެ ފުރަތަމަ ކަމަކަށް، އެހެން މީހުން ތިބާއަށް ޝެއާކުރާ ފައިލްތަކާ މެދު ކަންބޮޑުވާކަށް ނުޖެހޭނެއެވެ. "Shared with me" ގައި ހުންނަ ފައިލްތަކުން ޖާގަ ނަގާނީ އެ ފައިލް ފޮނުވި މީހާގެ އެކައުންޓުންނެވެ. ތިބާގެ ސްޓޯރޭޖުން ޖާގަ ނަގާނީ ހަމައެކަނި ތިބާ އަމިއްލައަށް އަޕްލޯޑްކުރާ ނުވަތަ އެހެން މީހެއްގެ ފައިލެއް ތިބާގެ ޑްރައިވްއަށް "ކޮޕީ" ކޮށްފިނަމައެވެ.
Ads by BML2. ގޫގުލް ވަން ސްޓޯރޭޖް މެނޭޖާ ބޭނުންކުރުން
ޖާގަ ހުސްކުރުމަށް އެންމެ ފަސޭހަ ގޮތަކީ ގޫގުލްގެ ސްޓޯރޭޖް މެނޭޖްމަންޓް ޓޫލް (one.google.com/storage/management) ބޭނުންކުރުމެވެ. މި ޓޫލް އިން ތިރީގައިވާ ކަންކަން ފަސޭހައިން ކޮށްލެވޭނެއެވެ.
-
ބޭކާރު އީމެއިލްތައް: ޖީމެއިލްގެ "Spam" ފޯލްޑަރާއި "Trash" ގައި ހުރި އީމެއިލްތައް އެއްފަހަރާ ފޮހެލުން.
-
ބޮޑެތި ފައިލްތައް ދެނެގަތުން: ޑްރައިވް، ފޮޓޯސް އަދި ޖީމެއިލްގައި ހުރި އެންމެ ސައިޒުން ބޮޑެތި ފައިލްތައް ވަކިން ލިސްޓުކޮށްދޭނެއެވެ. މީގެ ތެރެއިން ބޭނުން ނުވާ ބޮޑެތި ވީޑިއޯ ނުވަތަ ފައިލްތައް ފޮހެލުމުން ވަރަށް ބޮޑު ޖާގައެއް ސަލާމަތް ކުރެވޭނެއެވެ.
3. ވަކިވަކި އެޕްލިކޭޝަންތަކުން ޖާގަ ހުސްކުރުން
ހ. ގޫގުލް ފޮޓޯސް (Google Photos):
ގިނަ ފަހަރަށް ސްޓޯރޭޖް ފުރެން މެދުވެރިވަނީ ފޯނުން އޮޓޯއިން ބެކަޕް ކުރެވޭ ފޮޓޯ އާއި ވީޑިއޯގެ ސަބަބުންނެވެ.
-
ބޭނުން ނުވާ ސްކްރީންޝޮޓްތަކާއި، ވަޓްސްއެޕް އިން އަންނަ ބޭކާރު ފޮޓޯތައް ޑިލީޓްކުރާށެވެ.
-
"Storage Saver" މޯޑަށް ފޮޓޯ އަޕްލޯޑް ސެޓިންގ ބަދަލުކޮށްލުމުން، ފޮޓޯގެ ކޮލިޓީ މާބޮޑަށް ދަށްނުވެ ކުޑަ ޖާގައެއްގައި ފޮޓޯ ރައްކާކުރެވޭނެއެވެ.
ށ. ޖީމެއިލް (Gmail):
އީމެއިލް އެކަނި ހުރުމަކުން ޖާގައެއް ނުފުރޭނެއެވެ. ޖާގަ ފުރެނީ އީމެއިލްއާއެކު އަންނަ "އެޓޭޗްމަންޓް" (Attachments) ތަކުންނެވެ.
-
ޖީމެއިލްގެ ސާޗް ބާ ގައި has:attachment larger:10M މިހެން ލިޔެ ސާޗް ކޮށްލާށެވެ. އޭރުން 10 އެމްބީ އަށްވުރެ ބޮޑެތި ފައިލް ހުރި އީމެއިލްތައް ފެންނާނެއެވެ. މީގެ ތެރެއިން މުހިންމު ނޫން އީމެއިލްތައް ޑިލީޓް ކޮށްލާށެވެ.
ނ. ގޫގުލް ޑްރައިވް (Google Drive):
-
ޑްރައިވް އަށް ވަނުމަށްފަހު ފައިލް ލިސްޓުގެ ވައަތް ފަރާތުގައި އިންނަ "Storage" އަށް ފިތާލާށެވެ. އޭރުން އެންމެ ޖާގަ ބޮޑެތި ފައިލްތައް އެންމެ މައްޗަށް އަރާނެއެވެ. ބޭނުން ނުވާ ބޮޑެތި ފައިލްތައް ޑިލީޓް ކުރާށެވެ.
4. އެންމެ މުހިންމު ކަންތައް: "Trash" ހުސްކުރުން
ވަރަށް ގިނަ މީހުން ފައިލްތައް ޑިލީޓް ކުރުމަށްފަހު ހީކުރަނީ ޖާގަ ހުސްވީ ކަމަށެވެ. އެހެންނަމަވެސް، ފައިލެއް ޑިލީޓް ކުރުމުން އެ ފައިލް ދާނީ "Trash" ނުވަތަ "Bin" ފޯލްޑަރަށެވެ. އެތަނުގައި 30 ދުވަސް ވަންދެން ފައިލް އޮންނާނެއެވެ. އަދި އެތަނުގައި އޮންނައިރުވެސް ޖާގަ ނަގާނެއެވެ.
-
އެހެންކަމުން، ފައިލްތައް ޑިލީޓް ކުރުމަށްފަހު، ޑްރައިވް، ފޮޓޯސް އަދި ޖީމެއިލްގެ Trash/Bin އަށް ގޮސް "Empty Trash" ހަދަން ހަނދާން ނައްތާނުލާށެވެ.
މި ފިޔަވަޅުތައް އެޅުމުން، އިތުރު ޖާގަ ގަތުމަކާ ނުލައި، މިހާރު ހުރި 15 ޖީބީގެ ޖާގަ ރަނގަޅު ގޮތުގައި މެނޭޖްކުރެވޭނެއެވެ.
Ads by MACL
