ދިވެހިރާއްޖެއަށް ހޯމް ސްކޫލިން ތައާރަފުކުރާކަށް އަދިވެސް ނުވޭތަ؟
ދިވެހިރާއްޖޭގެ ތަޢުލީމީ ނިޒާމާ މެދު ބަހުސްކުރެވޭ މިންވަރު އިތުރުވެފައިވާ މި ދަނޑިވަޅުގައި، ދުނިޔޭގެ އެހެން ޤައުމުތަކުގައި ކާމިޔާބުކަމާއެކު ބޭނުންކުރަމުންދާ ހޯމް ސްކޫލިން ނުވަތަ ގެއިން ކިޔަވައިދިނުމުގެ ނިޒާމަކީ ރާއްޖެއަށް ތަޢާރަފުކުރެވިދާނެ މުހިންމު ބަދަލެއްކަމަށް ގިނަ ބަޔަކު ދަނީ ދެކެމުންނެވެ. ހޯމް ސްކޫލިން އަކީ، ކުދިންނަށް ސްކޫލަށް ނުގޮސް، އެކުދިންގެ ބެލެނިވެރިންގެ ބެލުމުގެ ދަށުން ގޭގައި ތަޢުލީމު ދިނުމެވެ. މިއީ ބެލެނިވެރިން އިސްވެ ހިންގާ ގެއަށް ޚާއްޞަ ތަޢުލީމީ ނިޒާމެއް ކަމުގައިވާއިރު، މި ނިޒާމުގައި ކުއްޖާގެ ކިޔެވުމުގެ ޕްރޮގްރާމާއި، ކިޔަވައިދޭ މާއްދާތަކާއި، ކިޔަވައިދޭ ގޮތް ކަނޑައެޅުމުގެ ފުރިހަމަ މިނިވަންކަން ބެލެނިވެރިންނަށް ލިބިގެންވެއެވެ.
ހޯމް ސްކޫލިންގެ ސަބަބުން ކުއްޖާއަށާއި އާއިލާއަށް ލިބޭ އެންމެ ބޮޑު ފައިދާއަކީ ފިކުރީ މިނިވަންކަމެވެ. ކުއްޖާގެ ޤާބިލުކަމާއި ޝައުޤުވެރިކަމާ އެއްގޮތަށް ކިޔެވުމުގެ ސްޕީޑާއި މުޤައްރަރު ބަދަލުކުރުމުގެ ފުރުޞަތު މި ނިޒާމުގެ ތެރެއިން ފަހިވެގެންދެއެވެ. ހަމައެހެންމެ، ބެލެނިވެރިންނާއި ދަރިންނާ ދެމެދު އޮންނަ ގުޅުން ބަދަހިވެ، އާއިލާގެ އެއްބައިވަންތަކަން އިތުރުވުމަކީ ވެސް މި ނިޒާމުގެ މުހިންމު ސިފައެކެވެ. މީގެ އިތުރުން، ސްކޫލްތަކުގައި ދިމާވެދާނެ ނޭދެވޭ އަޚްލާޤީ މައްސަލަތަކުން ދުރުހެލިވެ، ރައްކާތެރި މާހައުލެއްގައި ކިޔެވުމުގެ ފުރުޞަތު ލިބުމާއި، ކުއްޖާގެ އަމިއްލަ ވިސްނުމާއި މައްސަލަ ހައްލުކުރުމުގެ ޤާބިލުކަން އިތުރުވެ، މުސްތަޤިއްލުކަން ބޮޑުވުމަށް ވެސް މި ނިޒާމު މަގުފަހިކޮށްދެއެވެ.
ހޯމް ސްކޫލިން ނިޒާމަކީ މިފަދަ ބޮޑެތި ފައިދާތަކެއް ހުރި ނިޒާމެއް ކަމުގައިވީ ނަމަވެސް، މި ނިޒާމުގައި ގޮންޖެހުންތަކެއް ވެސް ހުރިކަން ފާހަގަކޮށްލަންޖެހެއެވެ. މިގޮތުން ކިޔަވައިދިނުމަށް ބެލެނިވެރިން ގިނަ ވަގުތު ހޭދަކުރަން ޖެހުމާއި، ބައެއް ފަހަރު ވަޒީފާއިން ވަކިވާން ޖެހުމަކީ ދިމާވެދާނެ ދަތިތަކެވެ. އަދި ސްކޫލް މާހައުލުން ލިބޭ ފަދަ އިޖުތިމާޢީ ގުޅުންތައް މަދުވުމުގެ ފުރުޞަތު އޮތް ނަމަވެސް، އިތުރު ހަރަކާތްތަކުން މިކަން ހަމަޖެއްސިދާނެކަމަށް ތަޖުރިބާކާރުން ދެކެއެވެ. މީގެ އިތުރުން، ކިޔެވުމުގެ ހުރިހާ ޚަރަދެއް، އޭގެ ތެރޭގައި މުޤައްރަރާއި ފޮތްތަކާއި ޓިއުޝަން ފަދަ ކަންކަން ހިމެނޭހެން ބެލެނިވެރިން އަމިއްލައަށް ކުރަން ޖެހުމަކީ މާލީ ގޮތުން ބުރައަކަށް ވެދާނެ ކަމެކެވެ.
Ads by BMLދުނިޔޭގެ ފެންވަރުގައި ބަލާއިރު، ހޯމް ސްކޫލިންއަކީ ގިނަ ޤައުމުތަކެއްގައި ޤާނޫނީ ގޮތުން ހުއްދަ، އަދި ވަރަށް މަޤުބޫލު ނިޒާމެކެވެ. ޚާއްޞަކޮށް އެމެރިކާ، ކެނެޑާ، އޮސްޓްރޭލިއާ، އަދި އިނގިރޭސިވިލާތް ފަދަ ޤައުމުތަކުގައި ހޯމް ސްކޫލިންގެ ވަރަށް ބޮޑު މުޖުތަމަޢެއް އުފެދިފައިވާ އިރު، އެކަމަށް ޚާއްޞަ ވަސީލަތްތަކާއި ޤާނޫނުތައް ވެސް ވަނީ އެކުލަވާލާފައެވެ. މި ޤައުމުތަކުގެ ތަޖުރިބާތަކުން ދައްކާ ގޮތުގައި، ހޯމް ސްކޫލްކުރާ ކުދިން ޢާންމުކޮށް ސްކޫލްތަކުން ކިޔަވާ ކުދިންނަށް ވުރެ އިމްތިޙާނުތަކުން ރަނގަޅު ނަތީޖާ ހޯދައެވެ.
ދިވެހިރާއްޖޭގެ ތަޢުލީމީ ނިޒާމުގައި ހުރި ބައެއް މައްސަލަތަކަށް ޙައްލެއް ހޯދުމަށް ހޯމް ސްކޫލިން ތަޢާރަފުކުރުން މުހިންމުކަމަށް ފާހަގަކުރައްވަމުން، ކުރީގެ މިނިސްޓަރ ރާޝިދާ ޔޫސުފް ވިދާޅުވެފައިވާ ގޮތުގައި، މިހާރުގެ ސްކޫލް ނިޒާމަކީ "މުބާރާތަކަށް ވެފައިވާ" ނިޒާމެކެވެ. ކިޔެވުމާއި، އިތުރު ހަރަކާތްތަކާއި، ދުވަސްތައް ފާހަގަކުރުން ވެސް މުބާރާތަކަށް ވެ، ސްކޫލުތަކުގައި ހުސް މުބާރާތްތައް އޮންނަހެން ހީވާ ކަމަށް އެކަމަނާ ފާހަގަކުރެއްވިއެވެ. މިފަދަ މާހައުލެއްގައި ދަރިވަރުންނަށް ހަމަޖެހިލައިގެން ނޭވާލާނެ ވަގުތު ނުލިބޭ ކަމަށާއި، ކިޔެވުން ވިޔަފާރިއަކަށް ވެ، ކުދިން ކިޔަވަނީ ހަމައެކަނި ހިތުދަސްކޮށްގެން ކަމަށް ވެސް ރާޝިދާ ވިދާޅުވިއެވެ.
މިކަންކަމުގެ ނަތީޖާއެއްގެ ގޮތުން، ސްކޫލް ނިންމާ ނިކުންނަ ދަރިވަރުންގެ ކިބައިގައި ސިޓީއެއް ލިޔަން ނޭނގުމާއި، ދިވެހިން ވާހަކަ ދައްކަން ނޭނގުން ފަދަ މައްސަލަތައް ހުރިކަން ފާހަގަކުރެވިފައިވެއެވެ. ވީމާ، ހޯމް ސްކޫލިން ތަޢާރަފުކުރުމުން، މިފަދަ މައްސަލަތަކަށް ޙައްލެއް ލިބި، ކުދިންގެ އަޚްލާޤީ ތަރުބިއްޔަތާއި، ދިވެހިވަންތަ ޘަޤާފަތް ދިރުވުމަށް ބެލެނިވެރިންނަށް އިތުރު ފުރުޞަތު ލިބިގެންދާނެއެވެ. އަދި ދިވެހިރާއްޖެއަކީ ކުދި ރަށްތަކެއްގެ މައްޗަށް އެކުލެވިފައިވާ ޤައުމަކަށް ވުމާއެކު، ރަށްރަށުގައި ސްކޫލްތަކުގެ ވަސީލަތްތައް މަދުވުމުގެ މައްސަލައަށް ވެސް މިއީ ރަނގަޅު ހައްލަކަށް ވެދާނެއެވެ.
މި ނިޒާމު ރާއްޖެއަށް ތަޢާރަފުކުރާ ނަމަ، ބެލެނިވެރިންގެ ޤާބިލުކަން ކަށަވަރުކުރުމަށްޓަކައި، އެހެން ޤައުމުތަކުގައި ޢަމަލުކުރާ ފަދައިން، ރަޖިސްޓްރީކޮށް، ވަކި މުޤައްރަރަކަށް ކިޔަވައިދޭކަން ކަށަވަރުކުރުމުގެ މޮނިޓަރިންގ ނިޒާމެއް ޤާއިމުކުރަން ޖެހޭނެއެވެ. މިހާރު ރާއްޖޭގައި ފުރިހަމަ ހޯމް ސްކޫލިން ޤާނޫނީ ގޮތުން ހުއްދަ ނޫން ނަމަވެސް، ޤާނޫނަކަށް ފައްތައިގެން ވިޔަސް މި ނިޒާމު ތަޢާރަފުކުރުމަކީ މުހިންމު ކަމެކެވެ.
ޚުލާޞާކޮށް ބުނާނަމަ، ހޯމް ސްކޫލިންއަކީ ސްކޫލްތަކުގެ މުބާރާތުގެ މާހައުލުން ދަރިވަރުން ސަލާމަތްކޮށް، އެކުދިންގެ އަމިއްލަ ޤާބިލުކަމާ އެއްގޮތަށް ތަޢުލީމު ޙާޞިލުކުރުމުގެ ފުރުޞަތު ފަހިކޮށްދޭނެ މުހިންމު ނިޒާމެކެވެ.
Ads by MACL
