އަތޮޅު ކައުންސިލް އުވުނަސް އަތޮޅު ފިހާރަތައް ނުހުއްޓޭނެ، މުވައްޒަފުން ވަކިވެސް ނުކުރާނެ: އެލްޖީއޭ
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް ގެނެވުނު 17 ވަނަ އިޞްލާޙާއެކު، އަތޮޅު ކައުންސިލްތައް އުވާލުމަށް ނިންމާފައިވާ ނިންމުމަކީ ރާއްޖޭގެ އިދާރީ އޮނިގަނޑަށް ގެނެވޭ ވަރަށް ބޮޑު ބަދަލެކެވެ. މި ބަދަލާ ގުޅިގެން އަތޮޅު ކައުންސިލްތަކުގެ ބެލުމުގެ ދަށުން ހިންގަމުންދާ އަތޮޅު ފިހާރަތަކާއި، އެ ތަންތަނުގައި މަސައްކަތްކުރާ މުވައްޒަފުންގެ މުސްތަޤުބަލާ މެދު އުފެދިފައިވާ ސުވާލުތަކަށް ލޯކަލް ގަވަރމަންޓް އޮތޯރިޓީ (އެލްޖީއޭ) އިން މިހާރު ވަނީ ސާފު ޖަވާބެއް ދީފައެވެ.
އެލްޖީއޭއިން ހާމަކޮށްފައިވާ ގޮތުގައި، އަތޮޅު ކައުންސިލްތައް އުވާލި ނަމަވެސް، އެ ކައުންސިލްތަކުން ހިންގަމުން އައި އަތޮޅު ފިހާރަތަކުގެ ވިޔަފާރި އެއްވެސް މެދުކެނޑުމެއް ނެތި ކުރިއަށްދާނެއެވެ. މި ފިހާރަތަކަކީ އަތޮޅުތަކުގެ އިޤްތިޞާދީ ކުރިއެރުމަށާއި ރައްޔިތުންނަށް ބޭނުންވާ ޚިދުމަތްތައް ފޯރުކޮށްދިނުމަށް މުހިންމު ދައުރެއް އަދާކުރާ ތަންތަނަށް ވާތީ، އެ ތަންތަން ހިންގުމުގެ އައު އިންތިޒާމުތަކެއް ސަރުކާރުން މިހާރު ދަނީ ރާވަމުންނެވެ.
މި ބަދަލާއެކު އެންމެ ބޮޑު ކަންބޮޑުވުމެއް އޮތީ އަތޮޅު ފިހާރަތަކުގައި މަސައްކަތްކުރާ މުވައްޒަފުންގެ ވަޒީފާއާ މެދުގައި ކަމަށް ވީ ނަމަވެސް، އެއްވެސް މުވައްޒަފަކު ވަޒީފާއިން ވަކިނުކުރާނެ ކަމުގެ ފުރިހަމަ ޔަޤީންކަން އެލްޖީއޭއިން ވަނީ ދީފައެވެ. މީގެ އިތުރުން މުވައްޒަފުންގެ މުސާރަ އާއި އެހެނިހެން އިނާޔަތްތައް މެދުނުކެނޑި ލިބޭނެ އިންތިޒާމު ހަމަޖައްސާފައިވާއިރު، އަތޮޅު ފިހާރަތައް ހިންގުމަށް އެކުލަވާލާ އައު "ބިޒްނަސް މޮޑެލް" ގެ ދަށުން މުވައްޒަފުންގެ ޚިދުމަތް ކުރިއަށްދާނެ ގޮތްތަކެއް ސަރުކާރުން ވަނީ ކަނޑައަޅާފައެވެ.
Ads by BMLއިދާރީ ގޮތުން ގެނެވޭ ބަދަލުތަކަށް ބަލާއިރު، އަތޮޅު ކައުންސިލްތަކުގެ މިހާރުގެ ދައުރު 31 ޑިސެމްބަރު 2025 ގައި ހަމަވާއިރު، އަތޮޅު ފިހާރަތަކުގެ ހިންގުން 13 ޖެނުއަރީ 2026 އިން ފެށިގެން އައު އިންތިޒާމެއްގެ ދަށަށް ބަދަލުވާނެ ކަމަށް އެލްޖީއޭގެ ސިޓީއަކުން ވަނީ ކަށަވަރުކޮށްދީފައެވެ. މި އިންތިޤާލީ މުއްދަތުގެ ތެރޭގައި މުވައްޒަފުންގެ މުސާރަ އާއި އިދާރީ އެންމެހާ ކަންކަން ބެލެހެއްޓުމުގެ ޒިންމާ އުފުލާނީ ލޯކަލް ގަވަރމަންޓް އޮތޯރިޓީންނެވެ.
އަތޮޅު ކައުންސިލްތައް އުވާލުމަކީ ލާމަރުކަޒީ ނިޒާމަށް ގެނެވޭ ބޮޑު އިޞްލާޙީ ބަދަލެއް ކަމުގައި ވިޔަސް، މި ބަދަލުގެ ސަބަބުން އަތޮޅު ފިހާރަތަކުގެ ޚިދުމަތަށް ބުރޫނާރާނެ ކަމަށާއި މުވައްޒަފުންގެ ވަޒީފާގެ ރައްކާތެރިކަން ދަމަހައްޓާނެ ކަމަށް ސަރުކާރުން ބުނުމަކީ އެ ދާއިރާގައި މަސައްކަތްކުރާ ފަރާތްތަކަށް ލިބުނު ބޮޑު ހިތްހަމަޖެހުމެކެވެ.
Ads by MACL
