ސިޔާސީ މަންފާ ހާސިލް ކުރަންވެސް ގައުމީ ސަލާމަތަށް ނުރައްކާވާ ގޮތަށް ދޮގު ވާހަކަ ނުފަތުރަމާ!
ކޮންމެ ގައުމެއްގެ ވެސް އެންމެ މުހިންމު ބަހާއަކީ އެ ގައުމެއްގެ ސަލާމަތާއި ރައްކާތެރިކަމެވެ. ދިވެހިރާއްޖެއަކީ އިސްލާމީ އުސޫލުތަކާއި، ވަރުގަދަ ސަގާފީ އަދި އިޖުތިމާއީ ހަމަތަކެއްގެ މައްޗަށް ބިނާވެފައިވާ ގައުމެކެވެ. ނަމަވެސް، ފަހަކަށް އައިސް ސިޔާސީ ވާދަވެރިކަމުގެ ތެރެއިން، އަމިއްލަ ނުވަތަ ޕާޓީގެ މަންފާއަށްޓަކައި ގައުމީ ސަލާމަތަށް ނުރައްކާވެދާނެ ފަދަ މައުލޫމާތާއި ވާހަކަތައް ފެތުރުން މިވަނީ އިތުރުވެފައެވެ. މިއީ ގައުމުގެ ހަމަޖެހުމާއި، މިނިވަންކަމަށް އޮތް ބޮޑު ގޮންޖެހުމެކެވެ.
ސިޔާސީ ދާއިރާގައި ހަރަކާތްތެރިވާ ފަރާތްތަކުން ތާއީދު ހޯދުމަށްޓަކައި ތަފާތު ސިޔާސީ އުކުޅުތައް ބޭނުންކުރެ އެވެ. ނަމަވެސް، މި އުކުޅުތަކުގެ ތެރެއިން ގައުމުގެ ދިފާއީ ބާރުތަކާއި، ބޭރު ގައުމުތަކާއެކު އޮންނަ ހައްސާސީ ގުޅުންތަކާއި، އަދި ދާހިލީ ސަލާމަތާ ގުޅޭ ދޮގު މައުލޫމާތު ފެތުރުމަކީ ބަލައިގަނެވޭނެ ކަމެއް ނޫނެވެ. ކިތަންމެ ބޮޑު ސިޔާސީ ކުރިއެރުމެއް ލިބުނު ކަމުގައިވިޔަސް، ގައުމުގެ އަސާސްތަކަށް ގެއްލުންވާނަމަ އެއީ މުޅި މުޖުތަމައަށް ލިބޭ ނިކަމެތިކަމެކެވެ.
ޒަމާނީ ޓެކްނޮލޮޖީއާއި ސޯޝަލް މީޑިއާގެ ސަބަބުން ކޮންމެ ވާހަކައެއްވެސް ހަލުވިކަމާއެކު ފެތުރިގެންދެއެވެ. ގައުމީ ސަލާމަތާ ގުޅުންހުރި ކަންކަމުގައި ހަގީގަތާ ހިލާފު ވާހަކަ ފެތުރުމުން ރައްޔިތުންގެ މެދުގައި ބިރުވެރިކަން އުފެދި، ދައުލަތުގެ މުއައްސަސާތަކަށް އޮންނަ އިތުބާރު ގެއްލިގެންދެއެވެ. މީގެ އިތުރުން، ބައިނަލްއަގުވާމީ މައިދާނުގައި ގައުމުގެ އަގުވެއްޓި، އިގްތިސާދީ އަދި ސިޔާސީ ގޮތުން ދަތިތަކާ ކުރިމަތިލާން ޖެހިދާނެއެވެ.
Ads by BMLއިސްލާމީ ނަޒަރަކުން ބަލާއިރު، އިސްލާމްދީން ބާރުއަޅަނީ ތެދުވެރިކަމާއި، އަމާނާތްތެރިކަމަށެވެ. ފިތުނަ ފަސާދަ އުފެއްދުމާއި، ދޮގު ވާހަކަ ފެތުރުމަކީ ދީނީ ގޮތުން ނަހީކުރައްވާފައިވާ ކަންކަމެވެ. ކީރިތި ގުރުއާނުގައި، މީހަކު ޚަބަރެއް ގެނެސްފިނަމަ އެއީ ތެދު ޚަބަރެއްތޯ ބެލުމަށް އަންގަވާފައިވެ އެވެ. އެހެންކަމުން، ގައުމުގެ މަސްލަހަތު ހިމެނޭ ކަންކަމުގައި ޒިންމާދާރުކަމާއެކު ބަސްބުނުމަކީ ކޮންމެ މުސްލިމެއްގެ މައްޗަށް އޮތް ވާޖިބެކެވެ.
ސިޔާސީ ލީޑަރުންނާއި، މީޑިއާތަކާއި، އަދި އާންމު ރައްޔިތުންވެސް މިކަމުގައި ޒިންމާދާރުވާންޖެހެ އެވެ. ސިޔާސީ ވާދަވެރިކަމުގައި "ރަތް ރޮނގު" ހުރަސްކޮށްގެން ނުވާނެއެވެ. ގައުމީ ސަލާމަތަކީ ހަމައެކަނި ސަރުކާރުގެ ނުވަތަ ސިފައިންނާއި ފުލުހުންގެ ޒިންމާއެއް ވެސް ނޫނެވެ. އެއީ ކޮންމެ ދިވެހި ފަރުދެއްގެ ކޮނޑުގައި އެޅިފައިވާ ގައުމީ ވާޖިބެކެވެ. މަޝްޢޫލިއްޔަތެކެވެ.
ސިޔާސީ މަންފާ އަކީ ވަގުތީ އެއްޗެކެވެ. ނަމަވެސް ގައުމުގެ ސަލާމަތާއި ހަމަޖެހުމަކީ ދާއިމީ ގޮތެއްގައި ދަމަހައްޓަންޖެހޭ އަގުބޮޑު ނިއުމަތެކެވެ. އެހެންކަމުން، ސިޔާސީ މަގުސަދުތައް ހާސިލްކުރުމަށްޓަކައި ގައުމީ ސަލާމަތަށް ބުރޫއަރާ ފަދަ ވާހަކަތައް ނުފެތުރުމަށާއި، ގައުމީ މަސްލަހަތު އިސްކުރުމަށް އެންމެހާ ފަރާތްތަކަށް އިލްތިމާސްކުރަމެވެ. އަޅުގަނޑުމެންގެ އެއްބައިވަންތަކަމާއި ސަލާމަތްތެރިކަން އޮތީ، ހަގީގަތުގެ މައްޗަށް ބިނާވެފައިވާ ތެދުވެރި މުޖުތަމައެއް ބިނާކޮށްގެންނެވެ.
Ads by MACL
