ދުނިޔޭގެ މައްސަލަތަކަށް ފަސްދީ މަހުޖަނުންގެ ލޯ ހަނދަށާއި ޖައްވަށް!
ޖައްވީ ދާއިރާގެ މަހުޖަނުންނާއި ޓެކްނޮލޮޖީގެ ބޮޑެތި ވިޔަފާރިވެރިންގެ އަމާޒު ދުނިޔޭގެ ބިމުން ބޭރަށް ހުސްކޮށް، ކުރިއަށް އޮތް 2030 ގެ އަހަރުތަކުގެ ތެރޭގައި އިންސާނުން ހަނދުގައި ވަޒަންވެރިވެ މަސައްކަތްކުރަން ފަށާނެ ކަމަށް ބުނަން ފަށައިފިއެވެ.
ވޮޔޭޖަރ ޓެކްނޮލޮޖީސްގެ ސީއީއޯ ޑިލަން ޓޭލަރ އެމެރިކާގެ މީޑިއާތަކަށް ދެއްވި އިންޓަވިއުއެއްގައި ވިދާޅުވީ، 2030 ގެ ކުރީކޮޅު ހަނދުގައި ބޭސްއެއް ގާއިމުކޮށް، ދުނިޔެއިން ހަނދަށް ބަލައިލުމުން އެތަނުން އަލިކަން ފެންނަ މިންވަރަށް އިންސާނުން ދިރިއުޅެ މަސައްކަތް ކުރަން ފަށާނެ ކަމަށެވެ. މިއީ ހަމައެކަނި ތަމްރީނު ލިބިފައިވާ އެސްޓްރޮނޯޓުންނަށް އެކަނި އޮތް ފުރުސަތެއް ނޫން ކަމަށާއި، އާދައިގެ މީހުންނަށް ވެސް ހަނދުގައި މައުދަން ނެގުމާއި، ކަރަންޓު ގްރިޑް އެޅުމުގެ އިތުރުން ޖައްވީ ޑޭޓާ ސެންޓަރުތަކުގައި މަސައްކަތް ކުރުމުގެ ފުރުސަތު ލިބިގެންދާނެ ކަމަށް އޭނާ ދެކެއެވެ.
ޓޭލަރ އިތުރަށް ފާހަގަކުރެއްވި ގޮތުގައި، ދުނިޔެއަށް ދިމާވެދާނެ އެސްޓްރޮއިޑެއް ވެއްޓުން ފަދަ ބޮޑު ކާރިސާއަކުން ސަލާމަތްވުމަށްޓަކައި އެހެން ޕްލެނެޓަކަށް އިންސާނުން ފެތުރިގަތުމަކީ މުހިންމު ކަމެކެވެ. މިގޮތުން ހަނދަކީ ހަމައެކަނި ފެށުމެއް ކަމަށާއި، ދުނިޔެ ފިޔަވައި އިންސާނުންނަށް ދެވަނަ ގެއަކަށް ހެދެން އޮތީ މާސް (ރަތް ޕްލެނެޓް) ކަމުގައި ވިޔަސް، އެތަނުގައި ފުރިހަމަ ތަހުޒީބެއް ބިނާކޮށް ދިރިއުޅެވޭނެ މާހައުލެއް އުފެއްދުމަށް ބޮޑު ވަގުތެއް ނަގާނެ ކަމަށް އޭނާ އެއްބަސްވެއެވެ. ނަމަވެސް އެނބުރި ނާދެވޭ ގޮތަށް އެއްކޮޅު ޓިކެޓެއްގައި މާސްއަށް ގޮސް ކުޑަ ކޮލޮނީއެއް ފެށުމަށް ތައްޔާރަށް ތިބި އެތައް ބަޔަކު މިހާރުވެސް އެބަތިބި ކަމަށް އޭނާ ބުންޏެވެ.
Ads by BMLޖައްވު ފަތަހަކުރުމުގެ މި ފޯރީގައި އެހެން މަހުޖަނުން ވެސް އަންނަނީ ވާދަކުރަމުންނެވެ. އީލޮން މަސްކް މީގެ ކުރިން 2024 އާއި 2026 އާ ދެމެދު މާސްއަށް އިންސާނުން ފޮނުވާނެ ކަމަށް ބުނި ނަމަވެސް، މިހާރު އޭނާގެ އަމާޒަކީ 2031 އާއި 2033 އާ ދެމެދެވެ. އަދި ޖެފް ބޭޒޯސް 2045 ވަނަ އަހަރާ ހަމައަށް ދާއިރު އެތައް މިލިއަން މީހުން ޖައްވުގައި ދިރިއުޅޭނެ ކަމަށް އުއްމީދުކުރާއިރު، ސޭމް އޯލްޓްމަން ދެކޭގޮތުގައި ޔުނިވަރސިޓީ ނިންމާ ދަރިވަރުންނަށް ޖައްވުން ބޮޑު މުސާރަ ލިބޭ އާ ވަޒީފާތައް ކުރިމަގުގައި ތަނަވަސްވާނެއެވެ. ނަމަވެސް ދުނިޔޭގެ ބޮޑެތި ޖައްވީ އިދާރާތައް ކަމަށްވާ އެމެރިކާގެ ނާސާއިން ހަނދަށް މީހުން ފޮނުވުމަށް 2028 އަދި މާސްއަށް 2035 އާއި 2039 އާ ދެމެދު ރާވަމުންދާއިރު، ޗައިނާއިން ހަނދަށް އަމާޒު ހިފާފައިވަނީ 2029 އާއި 2030 އަށެވެ.
މިފަދަ ބިލިއަނަރުން ޖައްވީ ދަތުރުތަކަށް ބޮޑެތި ހޭދަތަކެއް ކުރަމުންދާއިރު، އާންމުންނާއި ފާޑުކިޔާ ފަރާތްތަކުގެ ކަންބޮޑުވުމަކީ ދުނިޔެމަތީގައި ހުރި ހަގީގީ މައްސަލަތަކަށް އެބޭފުޅުން އިސްކަން ނުދޭތީއެވެ. ހަނދުގައި ޑޭޓާ ސެންޓަރުތައް ހެދުމުގެ ބަދަލުގައި، ދުނިޔޭގައި ހިނގަމުންދާ ހަނގުރާމަތަކާއި ބަނޑުހައިހޫނުކަން ނައްތާލުމަށާއި، ސާފު ބޯފެނާއި އަސާސީ ތައުލީމު ފަދަ އިންސާނިއްޔަތަށް ކޮންމެހެން ބޭނުންވާ ކަންކަމަށް މިފަދަ ބޮޑެތި ވަސީލަތްތަކާއި ފައިސާ ހޭދަކުރި ނަމަ ދުނިޔެ މާ އަމާން އަދި ފާގަތި ތަނަކަށް ވާނެކަމަށް ގިނަ ބަޔަކު ދެކެއެވެ.
މާޒީގައި ޖައްވީ ދިރާސާތަކާއި ދަތުރުތަކަކީ ހަމައެކަނި ބޮޑެތި ބާރުތަކުގެ ސަރުކާރުތަކުގެ މެދުގައި ހިނގި ވާދަވެރިކަމެއް ނަމަވެސް، ފާއިތުވި އަހަރުތަކުގައި މި މަންޒަރު ވަނީ މުޅިން ބަދަލުވެފައެވެ. ޕްރައިވެޓް ސެކްޓަރ ނުވަތަ އަމިއްލަ ވިޔަފާރިވެރިން ޖައްވީ ސިނާއަތަށް ވަދެ، ސްޕޭސްއެކްސް، ބްލޫ އޮރިޖިން އަދި ވޮޔޭޖަރ ޓެކްނޮލޮޖީސް ފަދަ ކުންފުނިތަކުން ވަނީ އަލުން ބޭނުންކުރެވޭ ރޮކެޓް ޓެކްނޮލޮޖީއާއެކު ޖައްވަށް ދިއުމުގެ ޚަރަދު ވަރަށް ބޮޑަށް ކުޑަކޮށްފައެވެ. މީގެ ސަބަބުން ޖައްވީ ދަތުރުފަތުރަކީ ހަމައެކަނި ސައިންޓިފިކް ދިރާސާތަކަށް އޮތް ކަމެއްގެ ބަދަލުގައި، ފަތުރުވެރިކަމާއި ވިޔަފާރި އަދި މައުދަން ނެގުމުގެ އައު އިގްތިސާދީ މައިދާނަކަށް ވަނީ ބަދަލުވާން ފަށާފައެވެ.
ހަނދާއި މާސްއަށް އަމާޒު ހިފައިގެން ކުރިއަށްދާ މަސައްކަތްތަކުގައި އެމެރިކާގެ ނާސާއިން ކުރިއަށްގެންދާ 'އާޓެމިސް' ޕްރޮގްރާމާއި، ޗައިނާއިން އިސްނަގައިގެން ކުރިއަށްގެންދާ 'އިންޓަނޭޝަނަލް ލޫނަރ ރިސާޗް ސްޓޭޝަން' އަކީ މިހާރު ދުނިޔޭގެ ބޮޑެތި ބާރުތަކުގެ މެދުގައި އޮތް އެންމެ ވާދަވެރި ޕްރޮޖެކްޓްތަކެވެ. މި ޕްރޮގްރާމްތަކުގެ މައިގަނޑު ބޭނުމަކީ ހަނދުގެ ދެކުނު ތަނޑީގައި ހުރި ފެނާއި ގަނޑުފެނުގެ ވަސީލަތްތައް ބޭނުންކޮށްގެން ދާއިމީ ބޭސްތައް ގާއިމުކުރުމާއި، އެތަން ބޭނުންކޮށްގެން މާސް ފަދަ ދުރު ޕްލެނެޓްތަކަށް ދަތުރުކުރުމުގެ މަރުކަޒަކަށް ހަނދު ހެދުމެވެ. މިކަމުގައި ސަރުކާރުތަކުން އަމިއްލަ ވިޔަފާރި ކުންފުނިތަކުގެ އެހީތެރިކަން ހޯދަމުންދާއިރު، މިއީ ޖިއޯޕޮލިޓިކަލް ގޮތުން ދުނިޔޭގެ ބާރުވެރިކަން ދެއްކުމުގެ އައު މައިދާނަކަށް ވަނީ ވެފައެވެ.
މިފަދަ ބިޔަ މަޝްރޫއުތަކަށް ބިލިއަނުން ޑޮލަރު ހޭދަކުރަމުންދާއިރު، ދުނިޔޭގެ އިޖުތިމާއީ އަދި އިގްތިސާދީ މާހައުލުގައި މިކަމާމެދު ދަނީ ބޮޑެތި ބަހުސްތަކެއް ކުރެވެމުންނެވެ. މޫސުމީ ބަދަލުތަކުގެ ސަބަބުން ދުނިޔެ ހޫނުވެ ތިމާވެށީގެ ކާރިސާތައް އިތުރުވަމުންދާ ދަނޑިވަޅެއްގައާއި، ފަގީރުކަމާއި ބަނޑުހައިހޫނުކަން އިންތިހާއަށް އޮތް ދުނިޔެއެއްގައި، މަހުޖަނުން އެމީހުންގެ މުއްސަނދިކަން ބޭނުންކޮށްގެން ދުނިޔެ ދޫކޮށް ދިއުމަށް ރޭވުމަކީ އަޚުލާގީ ގޮތުން ސުވާލު އުފެދޭ ކަމެއްގެ ގޮތުގައި ގިނަ ފަރާތްތަކުން ދެކެއެވެ.
އެހެންކަމުން މިއީ ޓެކްނޮލޮޖީގެ ކުރިއެރުމާއި އިންސާނިއްޔަތުގެ އަސާސީ އިސްކަންދޭ ކަންކަމާ ދެމެދު އުފެދިފައިވާ ވަރަށް ފުޅާ ދެބަސްވުމެކެވެ.
Ads by MACL
