ސަރުކާރުގެ ހާއްސަ ފިޔަވަޅުތަކާއިއެކު ޑޮލަރު ތިރިވާން ފަށައިފި، މިހާރު 19 އަށް!
ދިވެހިރާއްޖޭގެ މާލީ ބާޒާރަށާއި ބޭރު ފައިސގެ މުއާމަލާތްތަކަށް ދިމާވެފައިވާ ގޮންޖެހުންތަކުން އަރައިގަތުމަށް ސަރުކާރާއި މަރުކަޒީ ބޭންކް، މޯލްޑިވްސް މޮނިޓަރީ އޮތޯރިޓީ (އެމްއެމްއޭ) ގުޅިގެން ފެށި ހާއްސަ އިސްލާހީ މަސައްކަތްތަކުގެ ހެޔޮ ނަތީޖާ ފެންނަން ފަށައިފިއެވެ. ވިޔަފާރިވެރިންނާއި އިގްތިސާދީ މާހިރުން ފާހަގަކުރާ ގޮތުގައި، ކަޅުބާޒާރުގައި މީގެކުރިން މަތީގައި ހުރި ޑޮލަރުގެ ރޭޓު މިހާރު ވަނީ 19 ރުފިޔާއަށް ތިރިވާން ފަށާފައެވެ. މި ބަދަލަކީ ރާއްޖޭގެ ބޭރު ފައިސާގެ ބާޒާރު ހަމައަކަށް އެޅުވުމަށްޓަކައި ގާނޫނީ އަދި އިދާރީ ގޮތުން އެޅި ހަރުދަނާ ފިޔަވަޅުތަކުގެ ސަބަބުން ލިބުނު ބޮޑު ކުރިއެރުމެކެވެ.
މި ކުރިއެރުން ހޯދުމުގައި އެންމެ މުހިންމު ދައުރެއް އަދާކުރީ ދާދިފަހުން ރައްޔިތުންގެ މަޖިލީހުން ފާސްކޮށް، ރައީސުލްޖުމްހޫރިއްޔާ ތަސްދީގު ކުރެއްވި ބޭރު ފައިސާއާ ބެހޭ ގާނޫނަށް ގެނައި އިސްލާހުތަކެވެ. މި އާ ގާނޫނުގެ ދަށުން، ރާއްޖޭގެ ފަތުރުވެރިކަމުގެ ދާއިރާއިން ލިބޭ ބޭރު ފައިސާގެ ބޮޑު އިންސައްތައެއް ބޭންކިން ނިޒާމުގެ ތެރެއަށް ވަދެ، ރާއްޖޭގައި މާލީ މުއާމަލާތްތައް ހިންގަންވާނީ އެމްއެމްއޭއިން ކަނޑައަޅާ ވަކި ރޭޓެއްގެ ތެރޭގައިކަން ވަނީ ލާޒިމްކޮށްފައެވެ. މިގޮތުން، ރާއްޖެއަށް ވަންނަ ޑޮލަރު ބޭންކުތަކަށް މާރުކުރަން ޖެހޭ މިންވަރު މަތިކުރުމުން، ރަސްމީ ބޭންކިން ނިޒާމުގައި ޑޮލަރުގެ ތާށިކަން ކުޑަވެ، ކަޅުބާޒާރަށް އޮތް ބާރު ވަނީ ވަރަށް ބޮޑަށް ދަށްވެފައެވެ.
މީގެ އިތުރުން، އެމްއެމްއޭއިން ކަނޑައަޅާފައިވާ ރަސްމީ ރޭޓަށްވުރެ ބޭރުގައި، ނުވަތަ ކަޅުބާޒާރުގެ ރޭޓުތައް އިޝްތިހާރު ކުރުމާއި، އެ ރޭޓުތަކުގައި ޑޮލަރު ގަނެވިއްކާ ފަރާތްތަކާމެދު ބޮޑެތި ޖޫރިމަނާތަކެއް ކަނޑައެޅުން ވެގެންދިޔައީ ބާޒާރުގެ ނާޖާއިޒު ފައިދާ ނަގަމުންދިޔަ ފަރާތްތަކަށް ލިބުނު ބޮޑު ހުއްޓުމަކަށެވެ. ގާނޫނާ ހިލާފަށް ޑޮލަރުގެ އަގު މަތިކޮށްގެން ވިޔަފާރިކުރާ މަނީ އެކްސްޗޭންޖަރުންނަށް ފިޔަވަޅު އަޅަން ފެށުމުން، ބާޒާރުގައި ޑޮލަރުގެ ސަޕްލައި ހަމަހަމަވެ، އަގުތައް ވަނީ ކޮންޓްރޯލް ކުރެވިފައެވެ. މި ފިޔަވަޅުތަކުގެ ސަބަބުން އާންމު ވިޔަފާރިވެރިންނަށް ބޭނުންވާ ޑޮލަރު ރަސްމީ ނިޒާމުގެ ތެރެއިން ލިބޭނެ މަގު ތަނަވަސްވަމުންދާކަން ފާހަގަކުރެވެއެވެ.
Ads by BMLސަރުކާރުގެ އަމާޒަކީ މިހާރު ފެށިފައިވާ އިސްލާހީ ފިޔަވަޅުތަކާއެކު، ކުރިއަށް އޮތް ތަނުގައި ކަޅުބާޒާރު އެއްކޮށް ނައްތާލައި، ރާއްޖޭގެ ރަސްމީ ބޭންކް ރޭޓުގައި ކޮންމެ މީހަކަށްވެސް ޑޮލަރު ލިބޭނެ އިންތިޒާމު ހަމަޖެއްސުމެވެ. ޑޮލަރުގެ އަގު 19 ރުފިޔާއަށް ތިރިވުމަކީ ރާއްޖެއަށް މުދާ އިމްޕޯޓްކުރާ ވިޔަފާރިވެރިންނަށް ލިބޭނެ ބޮޑު ލުޔަކަށްވާއިރު، މީގެ ސަބަބުން ބާޒާރުގައި ތަކެތީގެ އަގު އުފުލުން ހުއްޓުވުމަށް ވެސް ބޮޑު އެހީއަކަށް ވެގެންދާނެއެވެ. ލޯކަލް ބޭންކުތަކުގެ ރިޒާވް ވަރުގަދަވަމުންދާ ވަރަކަށް، ކުރިއަށް އޮތް ފަތުރުވެރިކަމުގެ ހައި ސީޒަނާއެކު އިގްތިސާދީ ދާއިރާއަށް އިތުރު ހެޔޮ ބަދަލުތަކެއް އަންނާނެ ކަމަށް މާލީ އިދާރާތަކުން ލަފާކުރެއެވެ.
އިގްތިސާދީ މާހިރުން ދެކޭގޮތުގައި ޑޮލަރުގެ އަގަށް އައި މި ބަދަލާއެކު، ރާއްޖޭގެ ކުދި އަދި މެދުފަންތީގެ ވިޔަފާރިތަކަށް ކުރިމަތިވެފައި އޮތް އެންމެ ބޮޑު އެއް ހުރަސް ވަނީ ނެތިގެން ގޮސްފައެވެ. މީގެކުރިން ބޭރުން މުދާ ގެނައުމަށްޓަކައި ކަޅުބާޒާރުން އަގުބޮޑުކޮށް ޑޮލަރު ގަންނަން ޖެހުމުގެ ސަބަބުން ވިޔަފާރިތަކުގެ ހިންގުމުގެ ހަރަދު އިންތިހާއަށް ބޮޑުވެ، އޭގެ ނޭދެވޭ އަސަރު އާންމު ރައްޔިތުންނަށް ކުރަމުންދިޔައެވެ. ނަމަވެސް ޑޮލަރުގެ ރޭޓު ހިފެހެއްޓި، ރަސްމީ ނިޒާމަށް ބާރުލިބެން ފެށުމުން ބާޒާރުގައި ވާދަވެރިކަން އުފެދި، މުދަލާއި ހިދުމަތްތަކުގެ އަގުތައް ހަމައަކަށް އެޅުމަށް ވަނީ މަގުފަހިވެފައެވެ.
މި އިސްލާހީ ފިޔަވަޅުތަކުގެ ދެމެހެއްޓެނިވިކަން ކަށަވަރުކުރުމަށްޓަކައި، ދައުލަތުގެ މާލީ އިދާރާތަކުން ދަނީ ބޭރު ފައިސާގެ ބާޒާރު ހިނގާނުހިނގާގޮތް ވަރަށް ގާތުން މޮނިޓަރ ކުރަމުންނެވެ. ބޭންކިން ނިޒާމުން ބޭރުގައި ހިންގާ ނުގަވާއިދު މުއާމަލާތްތައް ހުއްޓުވުމަށް ފުލުހުންނާއި ކަމާބެހޭ އެހެނިހެން މުއައްސަސާތައް ގުޅިގެން ހާއްސަ އޮޕަރޭޝަންތަކެއް ކުރިއަށް ގެންދާއިރު، މިއީ ގައުމުގެ މާލީ ސިނާއަތަށް އާންމުންނާއި ބޭރުގެ އިންވެސްޓަރުން ކުރާ އިތުބާރު ބޮޑުވެގެންދާނެ ކަމެކެވެ. ކުރިއަށް އޮތް މަސްތަކުގައި އިގްތިސާދީ ދުވެލި އިތުރަށް ހަލުވިވެ، ދިވެހި ފައިސާގެ ގަދަރު ބާޒާރުގައި ހިފެހެއްޓޭނެ ކަމުގެ ފެންމަތިވަމުންދާ އުންމީދުތައް މިހާރު ވަނީ ވަރަށް ބޮޑަށް އާވެފައެވެ.
Ads by MACL
