އާ ޓާމިނަލް ހުޅުވުމުގެ ރަސްމިއްޔާތަށް ރައީސް ޔާމިން، ރައީސް ސޯލިހު ވަޑައިގަންނަވަން ކެރިދާނެތަ؟
ވެލާނާ އިންޓަނޭޝަނަލް އެއާޕޯޓުގެ (ވީއައިއޭ) އާ ޓާމިނަލް ހުޅުވުމުގެ ރަސްމިއްޔާތަށް ކުރީގެ ހުރިހާ ރައީސުންނަށް ދައުވަތު އަރުވަން މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ނިންމި ނިންމުމާއެކު، ރާއްޖޭގެ ސިޔާސީ މަޝްރަޙު ވަނީ އަނެއްކާވެސް ހޫނުވެފައެވެ.
އެންމެންގެ ސަމާލުކަން ހުއްޓިފައިވަނީ، މި ޕްރޮޖެކްޓްގެ މާޒީއާ ގުޅިފައިވާ ދެ ސިޔާސީ ލީޑަރުން ކަމަށްވާ ކުރީގެ ރައީސް އަބްދުﷲ ޔާމީން އަބްދުލްގައްޔޫމް އާއި ކުރީގެ ރައީސް އިބްރާހިމް މުހައްމަދު ސޯލިހު މި ރަސްމިއްޔާތަށް ވަޑައިގަންނަވާނެތޯއެވެ.
މިއީ ހަމައެކަނި ރަސްމިއްޔާތެއްގައި ބައިވެރިވުމަށްވުރެ މާ ބޮޑު ސިޔާސީ މާނައެއް އެކުލެވިގެންވާ ކަމެކެވެ.
Ads by BMLއާ ޓާމިނަލްގެ މަޝްރޫއަކީ ރައީސް ޔާމީންގެ ވެރިކަމުގައި، 2016 ވަނަ އަހަރު ފެށިގެން ދިޔަ "މެގަ ޕްރޮޖެކްޓް" ތަކުގެ ތެރެއިން އެންމެ މުހިންމު އެއް މަޝްރޫއެވެ.
އެމަނިކުފާނުގެ ސަރުކާރުން އޭރު ދެކެމުން އައީ، ރާއްޖޭގެ އިގްތިސާދީ މައި ދޮރޯށި ކަމަށްވާ އެއާޕޯޓު، ޒަމާނީ ފެންވަރަށް ތަރައްގީކޮށް، ރާއްޖޭގެ ފަތުރުވެރިކަން އިތުރު ހަރުފަތަކަށް ގެންދިއުމުގެ ހުވަފެނެކެވެ.
އެމަނިކުފާނުގެ ސަޕޯޓަރުން އަދިވެސް ދެކޭ ގޮތުގައި މިއީ "ރައީސް ޔާމީންގެ ޕްރޮޖެކްޓެކެވެ" އަދި މި މަޝްރޫއުގެ ޝަރަފާއި ކްރެޑިޓްގެ އެންމެ ބޮޑު ހައްގުވެރިޔަކީ ވެސް އެމަނިކުފާނެވެ.
2018 ވަނަ އަހަރު ވެރިކަން ބަދަލުވެ، ރައީސް އިބްރާހިމް މުހައްމަދު ސޯލިހުގެ ސަރުކާރު އައުމާއެކު، އާ ޓާމިނަލްގެ މަސައްކަތްތައް ކުރިއަށް ދިޔައީ ސިޔާސީ ގޮތުން ގިނަ ބަހުސްތަކަކާ އެކުގައެވެ.
ނަމަވެސް، މި ޕްރޮޖެކްޓް ކުރިއަށް ގެންދިއުމުގައި ރައީސް ސޯލިހުގެ ސަރުކާރުން ވަނީ މުހިންމު ދައުރެއް އަދާކޮށްފައެވެ. މިގޮތުން، ޕްރޮޖެކްޓަށް ބޭނުންވާ ފައިނޭންސިންގެ ބޮޑު ބައެއް ހަމަޖެއްސުމުގައި އެ ސަރުކާރުން އިސްނެގިއެވެ.
ސައުދީ ފަންޑުން 100 މިލިއަން ޑޮލަރު އަދި އަބޫދާބީ ފަންޑުން 80 މިލިއަން ޑޮލަރުގެ ފައިނޭންސިންގ ހަމަޖެއްސީ އެމަނިކުފާނުގެ ސަރުކާރުންނެވެ. އެހެންކަމުން، މަޝްރޫއު ހުއްޓުމެއްނެތި ކުރިއަށް ގެންގޮސް، ނިންމުމުގެ މަރުހަލާއަށް ގެނައުމުގައި އެ ސަރުކާރުގެ ހިއްސާ ބޮޑެވެ.
ޓާމިނަލް ހުޅުވުމުގެ ތާރީޚު ކައިރިވަމުން އައިއިރު، މި މަޝްރޫޢުގެ ޝަރަފު ހައްގުވަނީ ކޮން ބަޔަކަށްތޯއާ މެދު އުފެދިފައިވާ ސިޔާސީ ބަހުސް ވަނީ އިތުރަށް ހޫނުވެފައެވެ.
ކުރީގެ ރައީސް ޞާލިޙަށް ތާއީދުކުރާ ފަރާތްތަކުން ދެކޭގޮތުގައި، ޓާމިނަލްގެ އެތެރެއާއި ބޭރުގެ ހުރިހާ ރީތިކަމެއްގެ ކްރެޑިޓް ހައްގުވަނީ އެމަނިކުފާނަށެވެ. އެއީ ރައީސް ޔާމީންގެ ވެރިކަމުގައި ޓާމިނަލްގެ ބޭރު ޑިޒައިން ހުރީ "ކޮންޓެއިނަރެއް"ހެން ކަމަށާއި، ރާއްޖެއާ އެކަށީގެންނުވާ އެ ސިފަ ބަދަލުކޮށް، ޒަމާނީ ފަރުމާއަކަށް މަޝްރޫޢު ގެންދެވީ ރައީސް ޞާލިޙް ކަމަށްވާތީއެވެ.
މި ވާހަކައަށް ރައްދު ދެއްވަމުން، ކުރީގެ ރައީސް ޔާމީން ވަނީ ރައީސް ޞާލިޙްގެ ސަރުކާރަށް ކޮރަޕްޝަންގެ ތުހުމަތުތަކެއް ކުރައްވާފައެވެ. އެމަނިކުފާނު ވިދާޅުވާ ގޮތުގައި، ޓާމިނަލަށް ބަދަލު ގެނައުމުގެ ނަމުގައި ރައީސް ޞާލިޙްގެ ސަރުކާރުން 300 މިލިއަން ޑޮލަރު އިތުރުކުރީ ކޮރަޕްޝަން ހިންގުމަށެވެ.
އަދި، މި މަސައްކަތުގައި ރައީސް މުއިއްޒުގެ 10 ޕަސެންޓުގެ ހިއްސާވެސް ނެތްކަމަށް ވިދާޅުވެ، މުޅި މަޝްރޫޢުގެ އަސްލު ވެރިފަރާތަކީ އެމަނިކުފާނުކަން ވަނީ ހާމަކުރައްވާފައެވެ.
މި ހުރިހާ ދެބަސްވުންތަކުގެ މެދުގައި، މިހާރުގެ ރައީސް ޑރ. މުޙައްމަދު މުއިއްޒު ހުންނެވީ ސާބިތުކަމާއެކުގައެވެ. އެމަނިކުފާނު މިކަން ސިފަކުރައްވަނީ "ކުޑަކުދިން އުޅޭ ގޮތެއް" ކަމަށެވެ.
އެމަނިކުފާނު ވިދާޅުވާ ގޮތުގައި، މިއީ އެއްވެސް ބަޔަކަށް އެކަނި ކްރެޑިޓް ނެގޭނެ ކަމެއް ނޫނެވެ. ރައީސް ނާސިރުގެ ދައުރުގައި ފެށި، ރައީސް މައުމޫނުގެ ދައުރުގައި ތަރައްގީވެ، ރައީސް ޔާމީންގެ ދައުރުގައި އާ ޓާމިނަލްގެ މަސައްކަތް ފެށި، އަދި ރައީސް ޞާލިޙްގެ ދައުރުގައި އެ މަސައްކަތް ކުރިއަށްގޮސް، މިހާރު މި ސަރުކާރުން އެ މަސައްކަތް ނިންމާ ހުޅުވުމަކީ، ހުރިހާ ވެރިންނަށް ވެސް އޭގެ ޝަރަފު ހައްގުވާ ކަމެކެވެ.
އެމަނިކުފާނު ކަންބޮޑުވެވަޑައިނުގެން، ގައުމީ މަސައްކަތެއްގެ ގޮތުގައި މިކަން ދެކެވަޑައިގަތުމުން، ސިޔާސީ ވާދަވެރިކަމަށްވުރެ ގައުމީ ތަރައްގީ މުހިންމުކަން އެއިން އެނގެއެވެ.
އާ ޓާމިނަލަކީ ރާއްޖޭގެ ތަރައްގީއަށް ލިބުނު ބޮޑު ކުރިއެރުމެއް ނަމަވެސް، އޭގެ ތާރީޚު ވަނީ ރާއްޖޭގެ ހޫނު ސިޔާސީ ވާދަވެރިކަމާ ވަރަށް ބޮޑަށް ގުޅިފައެވެ.
އެހެންކަމުން، މި ރަސްމިއްޔާތުގެ ދައުވަތު ރައީސް ޔާމީން އާއި ރައީސް ސޯލިހު ގަބޫލުފުޅު ކުރައްވައި، އެއް މޭޒެއްގެ ދޮށަށް ވަޑައިގެންފިނަމަ، އެ ވާނީ ގައުމީ މަސްލަހަތު ސިޔާސީ ފިކުރުތަކަށްވުރެ އިސްކުރެއްވި ކަމުގެ ވަރުގަދަ ހެއްކަކަށެވެ.
އެއާ ޚިލާފަށް، ދެ ބޭފުޅުންކުރެ އެއްވެސް ބޭފުޅަކު ވަޑައިނުގެންފިނަމަ، އެއިން ދޭހަވާނީ ރާއްޖޭގެ ސިޔާސީ ފުށުއެރުންތައް އަދިވެސް ކިހާ ބޮޑުކަމެވެ. މުޅި ގައުމުގެ ލޯތައް މިހާރު ހުއްޓިފައިވަނީ މި ސުވާލުގެ ޖަވާބަށެވެ.
Ads by MACL
