ރައީސްގެ ދަތުރުފުޅުތަކުން ސަރުކާރަށް ތާއީދު ބޮޑު، ހާލަތު ބަދަލުކުރުމަށް އަޅުއްވަމުންދާ ފިޔަވަޅުތަކަށް ރައްޔިތުން ރުހޭ!
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ދިވެހިރާއްޖޭގެ މީހުން ދިރިއުޅޭ ހުރިހާ ރަށަކަށް ވަޑައިގަތުމަށް ވެވަޑައިގެންފައިވާ ރިޔާސީ ވަޢުދުފުޅު ފުއްދެވުމުގެ ގޮތުން ކުރައްވަމުން ގެންދަވާ ދަތުރުފުޅުތަކަކީ، ސަރުކާރާއި ރައްޔިތުންނާ ދެމެދު އޮންނަ ގުޅުން ބަދަހިކޮށް، ޤައުމުގެ ތަރައްޤީގެ ތަޞައްވުރުގައި ރައްޔިތުން ބައިވެރިކުރުމަށް އަޅުއްވަމުން ގެންދަވާ މުހިންމު ފިޔަވަޅުތަކެކެވެ. މި ދަތުރުފުޅުތަކުގައި އެމަނިކުފާނު ގެންދަވަނީ ރަށްރަށުގެ ކައުންސިލްތަކާއި، މުއައްސަސާތަކާއި، އަދި ޢާންމު ރައްޔިތުންނާ ސީދާ ބައްދަލުކުރައްވައި، އެމީހުންގެ ކަންބޮޑުވުންތައް އަޑުއައްސަވައި، އެކަންކަމަށް ހައްލު ހޯއްދަވައިދެއްވުމަށް މަސައްކަތް ކުރައްވަމުންނެވެ. މިގޮތުން، ރައްޔިތުންގެ ބޭނުންތަކަށް ސީދާ އިޖާބަދެއްވުމުން، ސަރުކާރަށް އޮތް އިތުބާރު ބޮޑުވެ، ރައްޔިތުންގެ ހިތްތަކުގައި އާ އުންމީދުތަކެއް އުފެދިގެންދެއެވެ.
މިކަމުގެ އަލިގަދަ މިސާލެއް ފެނިގެންދިޔައީ އއ. ތޮއްޑޫއަށް ކުރެއްވި ދަތުރުފުޅުންނެވެ. އެ ދަތުރުފުޅުގައި، ތޮއްޑޫގެ ތަރައްޤީއަށް އިންޤިލާބީ ބަދަލުތަކެއް ގެނެސްދޭނެ ގިނަ މަޝްރޫޢުތަކެއް ވަނީ އިޢުލާން ކުރައްވާފައެވެ. އޭގެ ތެރޭގައި، ޤައުމީ ޔުނިވަރސިޓީގެ "ފެކަލްޓީ އޮފް ފުޑް ސައިންސް" އެރަށުގައި ޤާއިމްކުރުމާއި، 30 އެނދުގެ ޒަމާނީ ހޮސްޕިޓަލެއްގެ މަސައްކަތް ފެށުން ހިމެނެއެވެ. މީގެ އިތުރުން، އަންނަ އަހަރުގެ ކުރީކޮޅު ސީޕްލޭންގެ ޚިދުމަތް ފެށުމާއި، ބީއެމްއެލް ބްރާންޗަކާއި ޑޮލަރު އޭޓީއެމް ޤާއިމްކުރުމަށް ނިންމެވުމަކީ ރަށުގެ އިޤްތިޞާދަށާއި ފަތުރުވެރިކަމަށް ލިބިގެންދާނެ ބޮޑު ކުރިއެރުމެކެވެ. އަދި އައު ފުލުސް އޮފީހަކާއި، ކައުންސިލް އިދާރާއަކާއި، އިންޑޯ ބެޑްމިންޓަން ކޯޓުތަކެއް ޤާއިމްކުރުން ފަދަ އުމްރާނީ މަޝްރޫޢުތައް ބާރު ސްޕީޑުގައި ކުރިއަށް ގެންދަވާނެކަމުގެ ޔަޤީންކަން ރައީސް ދެއްވުމުން، ތޮއްޑޫގެ ރައްޔިތުންގެ ފަރާތުން ފެނިގެންދިޔައީ ސަރުކާރަށް އޮތް ފުރިހަމަ ތާއީދާއި ޝުކުރުވެރިކަމެވެ.

މިފަދަ ބޮޑު ތާއީދެއް ފެނިގެންދިޔައީ ހަމައެކަނި ތޮއްޑޫއަކުން އެކަންޏެއް ނޫނެވެ. މިފަހުން ރައީސް ނ. އަތޮޅަށާއި، ރ. އަތޮޅަށާއި، އަދި ބ. އަތޮޅަށް ކުރެއްވި ދަތުރުފުޅުތަކުގައި، ކޮންމެ ރަށަކުންވެސް އެމަނިކުފާނަށް މަރުޙަބާ ދެންނެވުމަށް ރައްޔިތުން ނިކުމެތިބިލެއް ގިނަކަމުން، އެއީ ސަރުކާރުގެ ސިޔާސަތުތަކަށް އެމީހުން ތާއީދުކުރާ މިންވަރު ދައްކުވައިދިން ހެއްކެކެވެ. ޒުވާނުންނާއި، އަންހެނުންނާއި، ދޮށީ އުމުރުގެ މީހުން ގިނަ ޢަދަދަކަށް ބައިވެރިވެ، ދިދަތަކާއި ބެނާތަކުން ރަށްތައް ޒީނަތްތެރިކޮށްފައިވުމުން ދޭހަވަނީ، ރައީސްގެ ޒަޢާމަތާއި ސަރުކާރުގެ "ޕްރޯ-މޯލްޑިވްސް" ސިޔާސަތުތަކަށް ރައްޔިތުންގެ ހިތްތަކުގައި އޮތް ޤަދަރާއި ލޯތްބެވެ. މި ދަތުރުފުޅުތަކުގައިވެސް ރަށްރަށުގެ ތަރައްޤީއަށް ބޭނުންވާ މަޝްރޫޢުތައް ފުއްދަވައިދެއްވާނެކަމުގެ ޔަޤީންކަން ރައީސް ވަނީ ދެއްވާފައެވެ.
Ads by BMLސަރުކާރުގެ ތަރައްޤީގެ ތަޞައްވުރުގެ މުހިންމު އަނެއް ބަހާއަކީ، ރައްޔިތުންނަށް ބޭނުންވާ ޒަރޫރީ ޚިދުމަތްތައް މާލެއަށް ދަތުރުނުކޮށް، އެމީހުން ދިރިއުޅޭ ސަރަހައްދުން ފަސޭހަކަމާއެކު ލިބޭނެ ގޮތް ހެދުމެވެ. މި ސިޔާސަތުގެ އަމަލީ ތަންފީޒެއްގެ ގޮތުން، އއ. ރަސްދޫގައި ޕާސްޕޯޓާއި އައިޑީކާޑުގެ ޚިދުމަތް ރަސްމީކޮށް ފެށިގެން ދިއުމަކީ ރައްޔިތުންނަށް ލިބުނު ވަރަށް ބޮޑު ފަސޭހައެކެވެ. މިހާރު ރާއްޖޭގެ 28 ރަށެއްގައި އައިޑީކާޑުގެ ޚިދުމަތް ދެމުންދާއިރު، މިސަރުކާރުގެ އަމާޒަކީ އަހަރު ނިމުމުގެ ކުރިން ހުރިހާ އަތޮޅެއްގައި މި ޚިދުމަތް ޤާއިމްކުރުމެވެ. ހަމައެއާއެކު، 13 އަތޮޅެއްގައި ޕާސްޕޯޓުގެ ޚިދުމަތް ދިނުމާއި، ރާއްޖެއިން ބޭރުގައި (މެލޭޝިއާގައި) ވެސް މި ޚިދުމަތް ފެށުމުން، ސަރުކާރުން ރައްޔިތުންގެ ލާބަޔާއި މަންފާއަށްޓަކައި މަސައްކަތްކުރާ މިންވަރު ހާމަވެއެވެ.

ޚުލާޞާކޮށް ދަންނަވާނަމަ، ރައީސުލްޖުމްހޫރިއްޔާގެ ދަތުރުފުޅުތަކުން ސާބިތުވަމުންދަނީ އެއީ ހަމައެކަނި ސިޔާސީ ހަރަކާތްތަކެއް ނޫންކަމާއި، އެއީ ޤައުމު ބިނާކުރުމުގެ ޢަމަލީ މަސައްކަތްތަކެއް ކަމެވެ. ތަރައްޤީގެ ބޮޑެތި މަޝްރޫޢުތަކާއި، ލާމަރުކަޒުކުރެވޭ ޚިދުމަތްތަކާއި، އަދި އެންމެ މުހިންމުކޮށް، ރައްޔިތުންގެ ފަރާތުން ސަރުކާރަށް ލިބެމުންދާ ހޫނު ތަރުޙީބާއި ބޮޑު ތާއީދަކީ، ޤައުމުގެ ހާލަތު ބަދަލުކުރުމަށް ސަރުކާރުން އަޅުއްވަމުންދާ ފިޔަވަޅުތަކަށް ރައްޔިތުން ރުހި، ޤަބޫލުކުރާކަމުގެ އަލިގަދަ ހެކިތަކެކެވެ. މިކަމުން ދޭހަވަނީ، ދިވެހިރާއްޖެއަށް އުފާވެރި މުސްތަޤުބަލެއް ގެނެސްދިނުމަށް ސަރުކާރުން ކުރަމުންދާ މަސައްކަތަށް ރައްޔިތުންގެ ފުރިހަމަ އެއްބާރުލުން ލިބެމުންދާ ކަމެވެ.
Ads by MACL
