އާރެއް ބާރެއް ނެތް މިންވަރަށް ހައްގުތައް ދިނުމުގެ ނަތީޖާ ރަނގަޅު ތަ؟ ގޯހުން ގޯހަށް ނުދަނީސް ހައްލު ހޯދާ!
ދިވެހިރާއްޖޭގެ ތަޢުލީމީ ދާއިރާގައި ދަރިވަރުންނަށް ދެވިފައިވާ ހައްޤުތަކާއި މިނިވަންކަމުގެ ސަބަބުން، އިޖުތިމާޢީ އަދި އަޚްލާޤީ ގޮތުން ނޭދެވޭ ނަތީޖާތަކެއް ފެންނަމުންދާ ކަމުގެ ކަންބޮޑުވުންތައް ދަނީ އިންތިހާއަށް އިތުރުވަމުންނެވެ. ސްކޫލް ދަރިވަރުންގެ ހައްޤުތަކުގެ ނަމުގައި ދެވިފައިވާ ބާރުގެ ނަތީޖާއެއްގެ ގޮތުން ދިވެހި މުޖުތަމަޢުގެ އަސާސީ މިންގަނޑުތަކަށް ބޮޑެތި ބަދަލުތަކެއް އަންނަމުންދާކަން ފާހަގަކުރެވެއެވެ. ދަރިވަރުންނަށް ލިބިފައިވާ މި ހައްޤުތަކުގެ ދަށުން، ޓީޗަރުންނާއި މައިންބަފައިންނާއި ވެރިންނަށް އިޙްތިރާމްކުރުމުގެ މިންގަނޑުތައް ވަރަށް ބޮޑަށް ދަށްވެ، އޭގެ ނޭދެވޭ އަސަރު މުޅި މުޖުތަމަޢަށް ދަނީ ކުރަމުންނެވެ.
މިކަމުގެ އެންމެ ހާމަ މިސާލެއް ފެނިގެންދިޔައީ ދާދިފަހުން ދެކުނުގެ ރަށެއްގެ ސްކޫލެއްގައި މަތީ ގްރޭޑެއްގެ ދަރިވަރަކާއި ބިދޭސީ ޓީޗަރަކާ ދެމެދު ހިނގި ހަމަނުޖެހުމުގެ ހާދިސާއިންނެވެ. މި ހާދިސާގެ ވީޑިއޯއިން ފެންނަ ގޮތުގައި، ދަރިވަރު ވަނީ ޓީޗަރުގެ ގައިގައި ޖަހައި، ހަމަލާދީފައެވެ. މިފަދަ އަމަލުތައް ހިންގުމަށް ދަރިވަރުން ފަސްނުޖެހުމުގެ މައިގަނޑު ސަބަބަކީ، ގަވާއިދުތަކާއި އުޞޫލުތައް ހެދިފައިވާ ގޮތުން، އެކުދިންނަށް އަދަބު ލިބުމުގެ ފުރުޞަތު ކުޑަވުމެވެ. ޚާއްޞަކޮށް، ޢުމުރުން 18 އަހަރު ނުވާ ކުދިންނަށް ޤާނޫނީ ގޮތުން ލިބިދޭ ހިމާޔަތުގެ ދަށުން، އެކުދިންގެ އަމަލުތަކަށް ޒިންމާދާރުކުރުވުމަށް ބޮޑެތި ދަތިތަކެއް ހުރިކަން ފާހަގަކުރެވެއެވެ.
މިފަދަ ހާދިސާތަކުގެ ސަބަބުން އިޖުތިމާޢީ ފޭރާން ވީދި، މުޖުތަމަޢުގެ އަސާސީ ނިޒާމުތަކަށް ބުރޫއަރަމުންދާކަން ވަރަށް ރަނގަޅަށް ހާމަވެއެވެ. ޓީޗަރަކަށް ދަރިވަރަކު ހަމަލާދިނުމުގެ ހާދިސާއާ ގުޅިގެން އާންމުންގެ ޚިޔާލުތައް ހުރިގޮތުން ވެސް މިކަމުގެ ސީރިއަސްކަން ދެނެގަނެވެއެވެ. ގިނަ ބަޔަކު ދެކޭގޮތުގައި، ދަރިވަރުންގެ ހައްޤުތައް ބޮޑުކަމުން، ޓީޗަރުންގެ ހައްޤުތަކަށް އަރައިގަނެވިފައިވާ ކަމަށާއި، މިކަމުގެ ސަބަބުން ދަރިވަރުންގެ އަޚްލާޤު ދުވަހެއް ދުވަހަކަށް ގޯސްވަމުންދާ ކަމަށެވެ. މިކަމުގެ ނަތީޖާއެއްގެ ގޮތުން، ދަރިވަރުންގެ ކިބައިގައި ހުންނަންޖެހޭ އަޚްލާޤީ މިންތަކާއި އިންތައް ނެތިދެއެވެ. ބޭނުން އެއްޗެއް، ބޭނުން މީހަކަށް ދިމާލަށް ބުނުމަށް އެކުދިން ފަސްނުޖެހެއެވެ. މައިންބަފައިންނާއި ޓީޗަރުންނާއި ވެރިންނާ ދިމާލަށް އެއްވެސް ލަދެއް ހަޔާތެއް ނެތި ބޭނުން އެއްޗެއް ކިޔާލަނީ، އެކުދިންނަށް އަދަބު ނުލިބޭނެކަމުގެ ޔަޤީންކަން އޮތުމުންނެވެ.
Ads by BMLދަރިވަރުންގެ ކަންކަން މިހިސާބަށް ގޮސްފައިވާއިރު، އެކުދިން އިސްލާޙުކުރުމުގެ ގޮތުން މައިންބަފައިން ނަސޭހަތްދިނުމަށް ނުވަތަ އަދަބު ދިނުމަށް މަސައްކަތްކުރާ ހާލަތްތަކުގައި ވެސް މައިންބަފައިންނަށް ވަނީ ގޮންޖެހުންތަކާ ކުރިމަތިލާން ޖެހިފައެވެ. ޖެންޑަރ މިނިސްޓްރީ ނުވަތަ ފުލުހުން ފަދަ އިދާރާއަކުން މައްސަލަ ބަލާއިރު، އޮންނަނީ ދަރީގެ ހައްޤުތަކަށް މައިންބަފައިން އަރައިގަނެވިފައި ކަމަށް ބެލެވި، މައިންބަފައިންނަށް ދިގު މުއްދަތުގެ ޙުކުމްތައް އަންނަ ހާލަތްތައް ވެސް ދިމާވެއެވެ. މިފަދަ ޤާނޫނީ އޮނިގަނޑެއްގެ ތެރޭގައި، މައިންބަފައިންނަށް ދަރިން ތަރުބިއްޔަތުކުރުމުގެ ބާރު ކެނޑި، އެކުދިންގެ އަމަލުތައް އިސްލާޙުކުރުމަށް ހުރަސް އެޅިފައިވާކަން ފާހަގަކުރެވެއެވެ. ނަތީޖާއެއްގެ ގޮތުން، ދަރިވަރުންގެ އަމަލުތައް މިވަނީ އެއްވެސް ބާރެއް ނެތް މިންވަރަށް ގޯހުން ގޯހަށް ގޮސްފައެވެ.
މީގެ އިތުރުން، ޓީޗަރުންގެ ހިމާޔަތް ނެތި، ދަރިވަރުންގެ އަމަލުތައް ބާރުގަދަވުމަކީ ވެސް ކަންބޮޑުވާންޖެހޭ މައްސަލައެކެވެ. ޓީޗަރަކަށް ދަރިވަރަކު ހަމަލާދިނުމުގެ ހާދިސާގައި، އެޑިއުކޭޝަން މިނިސްޓްރީން ވަނީ ޓީޗަރު ސަސްޕެންޑުކޮށްފައެވެ. މިއީ، ދަރިވަރުގެ އަމަލު ގޯސްކަމަށް ފެންނަން އޮތް ނަމަވެސް، ފުރަތަމަ ފިޔަވަޅެއްގެ ގޮތުގައި ޓީޗަރަށް އަދަބު ދިނުމުގެ ސަގާފަތެއް ޤާއިމުވެފައިވާކަން ދައްކުވައިދޭ ކަމެކެވެ. މިކަމުގެ ސަބަބުން ޓީޗަރުންގެ ހިތްވަރު އެލި، ދަރިވަރުންގެ އަޚްލާޤީ މައްސަލަތަކަށް އެއްވެސް ފިޔަވަޅެއް އެޅުމަށް ޓީޗަރުން ބިރުގަނެއެވެ. ނަތީޖާއެއްގެ ގޮތުން، ދަރިވަރުންގެ ނޭދެވޭ އަމަލުތައް އިތުރަށް ބާރުގަދަވެ، ސްކޫލްތަކުގެ ތެރޭގައި ޓީޗަރުންނާއި ދަރިވަރުންނާ ދެމެދު ހަމަނުޖެހުންތައް އިތުރުވުމުގެ ފުރުޞަތު ބޮޑުވެއެވެ.
ޚުލާޞާކޮށް ދަންނަވާނަމަ، ދިވެހިރާއްޖޭގެ ސްކޫލް ދަރިވަރުންނަށް ދެވިފައިވާ ހައްޤުތަކާއި މިނިވަންކަން، އެކުދިންގެ އަޚްލާޤީ މިންގަނޑުތަކަށް ބުރޫއަރާ މިންވަރަށް ގޮސްފައިވާކަން ފާހަގަކުރެވެއެވެ. މިކަމުގެ ސަބަބުން އިޖުތިމާޢީ ފޭރާން ވީދި، މައިންބަފައިންނާއި ޓީޗަރުންނަށް ދަރިން ތަރުބިއްޔަތުކުރުމަށް ހުރަސްތަކެއް ކުރިމަތިވެފައިވެއެވެ. މި ހާލަތުން އަރައިގަތުމަށްޓަކައި، ދަރިވަރުންގެ ހައްޤުތަކާއި، މައިންބަފައިންނާއި ޓީޗަރުންގެ ޒިންމާތަކާއި ބާރުތަކުގެ މެދުގައި ހަމަޖެހޭ ގުޅުމެއް ޤާއިމުކުރުމަށްޓަކައި، ޤާނޫނީ އަދި އިދާރީ އޮނިގަނޑުތައް އަލުން މުރާޖަޢާކޮށް، ހައްލު ހޯދުން މުހިންމެވެ.
Ads by MACL
