ބުދަ، 18 ނޮވެމްބަރު 2026
ދުނިޔެ

ކަނޑުމަތީގައި މިދިޔަ އަހަރު ރެކޯޑް އަދަދަކަށް ރޯހިންޔާ ރެފިއުޖީން މަރުވި: އދ

މި ހިނގާ 2026 ވަނަ އަހަރުގެ މިހާތަނަށްވެސް 2,800 އަށްވުރެ ގިނަ ރޯހިންޔާ މީހުން ވަނީ މެލޭޝިއާ ނުވަތަ އިންޑޮނޭޝިއާއަށް ދިއުމަށް ކަނޑުމަގުން ދަތުރުކޮށްފަ --- ފޮޓޯ: ރޮއިޓާސް
މި ހިނގާ 2026 ވަނަ އަހަރުގެ މިހާތަނަށްވެސް 2,800 އަށްވުރެ ގިނަ ރޯހިންޔާ މީހުން ވަނީ މެލޭޝިއާ ނުވަތަ އިންޑޮނޭޝިއާއަށް ދިއުމަށް ކަނޑުމަގުން ދަތުރުކޮށްފަ --- ފޮޓޯ: ރޮއިޓާސް

މިދިޔަ 2025 ވަނަ އަހަރަކީ ބެންގާލް ކަނޑާއި އަންޑަމަން ކަނޑު ހުރަސްކުރަން އުޅުމުގެ ތެރޭގައި އެންމެ ގިނަ އަދަދަކަށް ރޯހިންޔާ ރެފިއުޖީން މަރުވި ނުވަތަ ގެއްލުނު އަހަރު ކަމަށް އދ. ގެ ރެފިއުޖީ އެޖެންސީ (ޔޫއެންއެޗްސީއާރު) އިން ހާމަކޮށްފިއެވެ.

އެ އެޖެންސީން ބުނި ގޮތުގައި މިދިޔަ އަހަރު އެކަނިވެސް 900 އެއްހާ މީހުން ވަނީ ކަނޑުމަތީގައި މަރުވެ ނުވަތަ ގެއްލިފައެވެ.

ޔޫއެންއެޗްސީއާރުގެ ތަރުޖަމާނު ބާބަރު ބަލޯޗް ވިދާޅުވީ، އެ ސަރަހައްދުގެ ކަނޑުތަކަކީ އެތައް ހާސް ރޯހިންޔާ ރެފިއުޖީންގެ "ނަން ނެތް ގަބުރުސްތާނެއް" ކަމަށެވެ. އަދި ފާއިތުވި ދިހަ އަހަރުގެ ތެރޭގައި މިފަދަ ނުރައްކާތެރި ދަތުރުތަކުގައި 5,000 އެއްހާ މީހުން ކަނޑުވެ މަރުވެފައިވާ ކަމަށް ލަފާކުރެވޭ ކަމަށްވެސް އޭނާ ފާހަގަކުރެއްވިއެވެ.

މިޔަންމާގައި ހިންގި ނަސްލު ނައްތާލުމުގެ އަމަލުތަކާ ގުޅިގެން 2017 ވަނަ އަހަރުން ފެށިގެން އެތައް ލައްކަ ރޯހިންޔާ މީހުން ވަނީ ބަންގްލަދޭޝްގެ ރެފިއުޖީ ކޭމްޕްތަކަށް ހިޖުރަކޮށްފައެވެ. ނަމަވެސް އެ ކޭމްޕްތަކަށް ލިބޭ އިންސާނީ އެހީ މަދުވުމާއި، ތައުލީމާއި ވަޒީފާގެ ފުރުސަތުތައް ނެތުމުގެ ސަބަބުން ގިނަ ބަޔަކު ދަނީ ކަނޑުމަގުން އެހެން ގައުމުތަކަށް ދިއުމަށް މަސައްކަތް ކުރަމުންނެވެ.

މި ހިނގާ 2026 ވަނަ އަހަރުގެ މިހާތަނަށްވެސް 2,800 އަށްވުރެ ގިނަ ރޯހިންޔާ މީހުން ވަނީ މެލޭޝިއާ ނުވަތަ އިންޑޮނޭޝިއާއަށް ދިއުމަށް ކަނޑުމަގުން ދަތުރު ފަށާފައެވެ. މީގެ ތެރެއިން ދެބައިކުޅަ އެއްބަޔަކީ އަންހެނުންނާއި ކުޑަކުދިން ކަމަށްވާއިރު، މިއީ އިންސާނީ ވަގުފާރި ކުރާ މީހުންގެ ޝިކާރައަކަށް ވުމުގެ ބޮޑު ބިރެއް އޮތް ބައެކެވެ.

މިފަދަ އެންމެ ފަހުގެ ހިތާމަވެރި ހާދިސާ ހިނގާފައިވަނީ މި މަހުގެ 8 ވަނަ ދުވަހުއެވެ. 250 މީހުންނާއެކު ދަތުރުކުރި ބޯޓެއް އަންޑަމަން ކަނޑަށް ބަންޑުން ޖަހާލައި، އެތައް ސަތޭކަ މީހުން ވަނީ ގެއްލިފައެވެ. ބަންގްލަދޭޝްގެ ކޯސްޓްގާޑަށް މި ހާދިސާއިން ސަލާމަތް ކުރެވުނީ އެންމެ 9 މީހުންނެވެ.

ޔޫއެންއެޗްސީއާރުން ބުނީ މި ތަފާސްހިސާބުތައް ހާމަކުރުމުގެ ބޭނުމަކީ ރޯހިންޔާ މީހުން ތަހައްމަލު ކުރަމުންދާ ހިތްދަތި ހާލަތު ދުނިޔެއަށް ހަނދާންކޮށްދީ، މިފަދަ މަރުތައް ހުއްޓުވުމަށް ދާއިމީ ހައްލެއް ހޯދުމަށް ބައިނަލްއަގުވާމީ މުޖުތަމައަށް ބާރުއެޅުން ކަމަށެވެ.