ޓްރަމްޕްގެ އިންޒާރުތަކާއެކު ހޮރްމޫޒްގެ ނުތަނަވަސްކަން ބޮޑުވެ، އެމެރިކާ-އީރާން ސުލްހައިގެ ވާހަކަތަކަށް ހުރަސްއެޅިއްޖެ
އެމެރިކާގެ ރައީސް ޑޮނަލްޑް ޓްރަމްޕް އީރާނަށް ދެއްވި ހަރުކަށި ހަމަލާގެ އިންޒާރުތަކާއި، ހޮރްމޫޒް ކަނޑުއޮޅި ބަންދުކުރުމާ ގުޅިގެން އުފެދުނު ބޮޑު ނުތަނަވަސްކަމާއެކު، ސްވިޓްޒަލޭންޑްގެ ބާގަންސްޓޮކް ރިސޯޓުގައި ދެގައުމުގެ ދެމެދުގައި ކުރިއަށްދާ ސުލްހައިގެ މަޝްވަރާތައް ދެވަނަ ދުވަހަކަށް ދެމިގެން ހިނގައްޖެއެވެ.
މަސްރަހު މިހާ ބޮޑަށް ހޫނުވީ ފޮކްސް ނިއުސްއަށް ދެއްވި އިންޓަވިއުއެއްގައި ޓްރަމްޕް ވިދާޅުވި ބަސްފުޅުތަކަކާ ގުޅިގެންނެވެ. އޭނާ ވިދާޅުވީ ހޮރްމޫޒް ކަނޑުއޮޅި ބަންދުކޮށްފިނަމަ އެ ސަރަހައްދުގައި ގައުމެއް އޮތްކަމުގެ ނިޝާނެއް ވެސް ނުބާއްވާނެ ކަމަށާއި، އެމެރިކާއިން އެ ކަނޑުއޮޅީގެ ކޮންޓްރޯލް އަތުލައި އަމިއްލަ ފީއެއް ނަގަން ފަށާފާނެ ކަމަށެވެ.
މި ވާހަކަތަކަށް ރައްދުދީ، ބިރުދެއްކުންތަކަށް އީރާނުން އެއްވެސް ފަރުވާލެއް ނުބަހައްޓާނެ ކަމަށް ބުނެ އެގައުމުގެ އިސް މަންދޫބު މުހައްމަދު ބާގިރު ގާލީބާފް ވަނީ މަޝްވަރާ ބައްދަލުވުން ދޫކޮށް ނުކުމެ އިހުތިޖާޖުކޮށްފައެވެ. މި ހަމަނުޖެހުންތަކުގެ ސަބަބުން ސީދާ ބައްދަލުވުންތައް މެދުކެނޑުނު ނަމަވެސް، މެދުވެރިންގެ ގޮތުގައި ހަރަކާތްތެރިވާ ގަތަރާއި ޕާކިސްތާނު މެދުވެރިކޮށް މެސެޖުތައް ބަދަލުކުރުމުގެ ޑިޕްލޮމެޓިކް މަސައްކަތްތައް ރޭގަނޑު ދަންވަންދެން ކުރިއަށްދިޔަކަމަށް އެމެރިކާގެ އޮފިޝަލުންނާ ހަވާލާދީ ރިޕޯޓުތައް ބުނެއެވެ.
Ads by BMLމި މަޝްވަރާތަކުގެ އަސްލު މަގްސަދަކީ މިދިޔަ ހަފުތާގައި ދެގައުމުން ސޮއިކުރި އެއްބަސްވުމުގެ ދަށުން، އޭޕްރިލް މަހުން ފެށިގެން އަމަލުކުރަމުން އައި ހަމަލާބަދަލުކުރުން ހުއްޓާލުމުގެ މުއްދަތު މަދުވެގެން 60 ދުވަހަށް އިތުރުކޮށް، ދާއިމީ ސުލްހައަކަށް ވާސިލްވުމެވެ. އެމެރިކާގެ ފަރާތުން މި ބައްދަލުވުންތަކުގައި އިސްކޮށް ބައިވެރިވެވަޑައިގަންނަވަނީ ނައިބު ރައީސް ޖޭޑީ ވެންސްއެވެ.
ނިއުކްލިއާ މައްސަލަތަކާ ބެހޭ ވާހަކަތައް ކުރިއަށް ގެންދިއުމަށް އީރާނުން ޝަރުތުކުރަނީ، އެމެރިކާއިން ކުރިން އެއްބަސްވެފައިވާ ގޮތަށް އެގައުމުގެ ހިފަހައްޓާފައިވާ ފައިސާތައް ދޫކޮށްލުމާއި، ތެލުގެ ވިޔަފާރިއަށް އަޅާފައިވާ ދަތިކުރުމުގެ ފިޔަވަޅުތަކަށް ލުއިދިނުމުންނެވެ. އަދި ހޮރްމޫޒް ކަނޑުއޮޅި ބަންދުކުރަން ޖެހުނީ އިޒްރޭލުން ލުބުނާނަށް ދެމުންދާ ހަމަލާތަކާ ގުޅިގެން ކަމަށް ވެސް އީރާނުން ހާމަކުރެއެވެ.
މަޝްވަރާތައް މިހާ ހައްސާސް މަރުހަލާއެއްގައި އޮތްއިރު، ދެ ފަރާތުން ވެސް ބޭނުންވަނީ ހަމަނުޖެހުންތައް އިތުރަށް ބޮޑުނުވެ ސިޔާސީ ހައްލެއް ހޯދުމަށެވެ. ނަމަވެސް ދެގައުމުގެ ހަރުކަށި ސްޓޭންޑްތަކުގެ ސަބަބުން ކުރިއަށް އޮތް ދުވަސްތަކުގައި މަސްރަހު އިތުރަށް ގޯސްވެދާނެ ކަމުގެ ބިރު ބައިނަލްއަގުވާމީ މުޖުތަމައުގައި ބޮޑުވެ، މުޅި ދުނިޔޭގެ ސަމާލުކަން މިހާރު ވަނީ މި ބައްދަލުވުންތަކަށް ހުއްޓިފައެވެ.
Ads by MACL
