ރިޝވަތުގެ ގޮތުގައި 325 މިލިއަން ޑޮލަރު ނެގި ޗައިނާގެ ކުރީގެ އޮފިޝަލަކު މަރަން ހުކުމްކޮށްފި
ވޭތުވެދިޔަ ތިން ދަހަރު (30 އަހަރު) އެކި ފަހަރުމަތިން ރިޝވަތުގެ ގޮތުގައި 325 މިލިއަން އެމެރިކާ ޑޮލަރު (ގާތްގަނޑަކަށް 2.2 ބިލިއަން ޔުއާން) ނެގިކަން ސާބިތުވެ، ޗައިނާގެ އިރުމަތީ ނަންޖިންގް ސިޓީގެ ކުރީގެ އިގްތިސާދީ ތަރައްގީއާ ބެހޭ އިސް އޮފިޝަލެއް ކަމަށްވާ ޔަންގް ޔޫލިން މަރަން އެގައުމުގެ ކޯޓަކުން ހުކުމްކޮށްފިއެވެ.
ޗައިނާގެ ޖިއަންގްސޫ ޕްރޮވިންސްގެ ޗަންގްޒޫ އިންޓަރމީޑިއަޓް ޕީޕަލްސް ކޯޓުން އިއްޔެ ކުރި މި ހުކުމަކީ، ފަހުގެ ތާރީޚެއްގައި އެގައުމުގައި ހިންގި އެންމެ ބޮޑު ކޮރަޕްޝަންގެ މައްސަލަތަކުގެ ތެރެއިން މައްސަލައެކެވެ.
ކޯޓުގެ ބަޔާނުގައިވާ ގޮތުން، ޔަންގް ޔޫލިން ވަނީ 1993 އިން 2023 އާ ދެމެދު އޭނާގެ މަގާމުގެ ނުފޫޒު ބޭނުންކޮށްގެން އެކި ކުންފުނިތަކަށް ބޮޑެތި ކޮންޓްރެކްޓްތަކާއި، ބިން ދޫކުރުމާއި، އަދި ވިޔަފާރީގެ އެކި ހުއްދަތައް ހޯދައިދިނުމުގެ ބަދަލުގައި نަގުދު ފައިސާ އާއި އަގުބޮޑު މުދާ ރިޝވަތުގެ ގޮތުގައި ގަވާއިދާ ޚިލާފަށް ހޯދާފައެވެ. ރިޝވަތު ހިފުމުގެ އިތުރުން، ދައުލަތުގެ ފައިސާއަށް ޚިޔާނާތްތެރިވުމާއި، މަނީ ލޯންޑްރިންގް (ގަވާއިދާ ޚިލާފަށް ފައިސާ ދައުރުކުރުން) އަދި މަގާމުގެ ނުފޫޒު ނާޖާއިޒު ގޮތުގައި ބޭނުންކުރުމުގެ ކުށް ވެސް އޭނާގެ މައްޗަށް ވަނީ ސާބިތުވެފައެވެ.
Ads by BMLމި މައްސަލައިގެ ޝަރީއަތުގައި 69 އަހަރުގެ ޔަންގް ވަނީ އޭނާގެ ކުށަށް އިއުތިރާފުވެ، އެކަމާ ހިތާމަކުރާކަން ހާމަކޮށްފައެވެ. ކޯޓުން ވަނީ އޭނާގެ އަމިއްލަ ހުރިހާ މުދަލެއް ދައުލަތަށް ހިފެހެއްޓުމަށާއި، ރިޝވަތުގެ ގޮތުގައި ހޯދި ހުރިހާ ފައިސާއެއް އަނބުރާ ހޯދުމަށް އަމުރުކޮށްފައެވެ.
މި ފިޔަވަޅަކީ ޗައިނާގެ ރައީސް ޝީ ޖިންޕިންގް ފަށްޓަވައިގެން އުޅުއްވާ ކޮރަޕްޝަނާ ދެކޮޅު ވަރުގަދަ ކެމްޕޭނުގެ ދަށުން އެޅި ފިޔަވަޅެކެވެ. ޗައިނާގައި ކޮރަޕްޝަނުގެ ބޮޑެތި މައްސަލަތަކުގައި މަރުގެ ހުކުމް އިއްވުމަކީ ކުރާ ކަމެއް ނަމަވެސް، އިގްތިސާދީ ކުށްތަކުގައި މިފަދަ ވަގުތުން ތަންފީޒުކުރާ މަރުގެ ހުކުމްތައް އަންނަނީ ވަރަށް މަދުން، މައްސަލައިގެ ނުރައްކާތެރިކަމަށް ބަލައިފައެވެ.
Ads by MACL
