ބުދަ، 18 ނޮވެމްބަރު 2026
ދުނިޔެ

ޖަޕާނުގައި ސަތޭކަ އަހަރުވީ ބޮޑެތި ގަސްތައް ނުކަނޑައި އެހެން ތަންތަނަށް ބަދަލުކުރަނީ

ޖަޕާނުގައި ސަތޭކަ އަހަރުވީ ބޮޑެތި ގަސްތައް ނުކަނޑައި އެހެން ތަންތަނަށް ބަދަލުކުރަނީ

ޢާންމުކޮށް މަގުތަކާއި، ރޭލު މަގުތަކާއި، އަދި އައު ޢިމާރާތްތައް ބިނާކުރުމުގެ ތަރައްޤީގެ މަޝްރޫޢުތައް ކުރިއަށްދާއިރު، އެންމެ ފުރަތަމަ ގުރުބާންކޮށްލަން ޖެހެނީ އެތައް ސަތޭކަ އަހަރެއްވެފައިވާ ބޮޑެތި ގަސްތަކެވެ.

ނަމަވެސް، ޖަޕާނުން އަންނަނީ މިފަދަ އަގުބޮޑު ގަސްތަކަށް ދެވަނަ ފުރުޞަތެއް ދީ، ގަސްތައް ކަނޑާލުމުގެ ބަދަލުގައި އެހެން ތަނަކަށް ބަދަލުކުރުމުގެ އުނދަގޫ އަދި އެހާމެ ފުރިހަމަ ޚާއްޞަ މަސައްކަތްތަކެއް ކުރަމުންނެވެ.

ތަރައްޤީގެ މަގުގައި ހުރި ކޮންމެ ގަހެއް މިގޮތަށް ބަދަލެއް ނުކުރެއެވެ. މި ޚާއްޞަ ފުރުޞަތު ދެވެނީ ތާރީޚީ، ސަގާފީ ނުވަތަ ތިމާވެށީގެ ގޮތުން ބޮޑު އަހައްމިއްޔަތުކަމެއް ދެވިފައިވާ ގަސްތަކަށެވެ. މިފަދަ ގަސްތައް ގިނައިން ފެންނަނީ ބުދު ފައްޅިތަކާއި، ޒިޔާރަތްތަކާއި، ޤަދީމީ ބަގީޗާތަކާއި ޕާކުތަކުންނެވެ. މިއީ އެ ސަރަހައްދެއްގެ ސަގާފީ ތަރިކައިގެ ބައެއްގެ ގޮތުގައި ބެލެވޭ ދިރުންތަކެއް ރައްކާތެރިކޮށް، ޖައިވީ ސިންގާފަތް ދެމެހެއްޓުމަށް އެހީވާ ކަމެކެވެ.

ގަސް ބަދަލުކުރުމުގެ އެންމެ ހާއްސަ އަދި ސިއްރު މަސައްކަތްތައް ހިނގަނީ ބޮޑެތި މެޝިނަރީތަކާއި ކްރޭންތައް ގެނައުމުގެ މާ ކުރިންނެވެ. މާހިރުން އެންމެ ފުރަތަމަ ގަހުގެ މޫތައް މަޑުމަޑުން ކޮށައި ތައްޔާރުކުރަން ފަށައެވެ. އެއްފަހަރާ ހުރިހާ މޫތަކެއް ނުނަގައި، ވަށައިގެންވާ ބައެއް މޫތައް ކަނޑާލުމަށްފަހު، ގަހުގެ ބޮޑު ގަނޑާ ކައިރިން ފެނާއި ބޭނުންވާ މާއްދާތައް އެންމެ ގިނައިން ނަގައިދޭ އައު ހިމަ މޫތައް ނުވަތަ "ފީޑާ ރޫޓްސް" އުފެދޭނެ ގޮތް ހަދައެވެ. މިގޮތަށް ތައްޔާރުކުރުމުން ގަސް އެހެން ތަނަކަށް ބަދަލުކުރާއިރު ލިބޭ ޝޮކް ކުޑަވެ، ގަސް ދިރިހުރުމުގެ ފުރުޞަތު ބޮޑުވެގެންދެއެވެ. ގަހުގެ ބޮޑުމިނާއި ވައްތަރަށް ބަލައި މި ތައްޔާރުވުމަށް 6 މަހާއި 1 އަހަރަށްވުރެ ގިނަ ދުވަސް ވެސް ނަގައެވެ.

މޫ ތައްޔާރުކުރުމުގެ މި ހާއްސަ ޓެކްނިކަށް ޖަޕާނު ބަހުން ކިޔަނީ "ނެމަވާށި" އެވެ. މީގެ މާނައަކީ "މޫ ވަށައިގެން ދިއުން" އެވެ. މިއީ ސަތޭކަ އަހަރުވީ ބަގީޗާ ހެއްދުމުގެ ޢިލްމުން އުފެދިފައިވާ ކަމެއް ނަމަވެސް، ފަހުން މި ލަފުޒު ޖަޕާނުގެ ވިޔަފާރި އަދި ސިޔާސީ ދާއިރާގައި ވެސް ވަރަށް މަޝްހޫރުވެގެން ދިޔައެވެ. އެއީ ބޮޑު ބަދަލެއް ގެނައުމުގެ ކުރިން ހިމޭންކަމާއެކު ބިންގާ ތައްޔާރުކުރުމުގެ ނިޝާނެއްގެ ގޮތުގައެވެ. ގަސް ބަދަލުކުރުމުގެ ފަލްސަފާ ވެސް ބިނާވެފައިވަނީ މިގޮތުގެ މައްޗަށެވެ.

ގަހުގެ މޫތައް މުޅިން ތައްޔާރުވުމުން، ގަސް ވަށައިގެން ކޮނެ، ތައްޔާރުކުރެވުނު މޫ ގުޅަގަނޑު ރައްކާތެރިކަމާއެކު ބަސްތާފަތި ފަދަ އެއްޗަކުން އޮޅާލައެވެ. އަދި ގަހުގެ ގަނޑާއި ގޮފިތައް ވެސް ރައްކާތެރިކުރުމަށްފަހު، ކްރޭނާއި ހައިޑްރޯލިކް ލިފްޓް ފަދަ ޚާއްޞަ ވެހިކަލްތައް ބޭނުންކޮށްގެން އައު މަންޒިލަށް ގެންދެއެވެ. އެއަށްފަހު، ކުރިން ތައްޔާރުކޮށްފައިވާ ވަޅަށް ގަސް އިންދައި، ވެއްޓިނުދާނެހެން ހަރުކޮށް، އަލުން ގަސް ހެދި ފަޅަން ފަށަންދެން ޚާއްޞަ އަޅާލުމެއް ދެއެވެ.