ބުދަ، 18 ނޮވެމްބަރު 2026
މުނިފޫހިފިލުވުން

ވިޖޭގެ ޖަނަ ނާޔަގަން ރިލީޒްވުމުގެ ކުރިން 1 މިލިއަން ޓިކެޓް ވިއްކައިގެން އިންޑިއާގައި ތާރީޚީ ރެކޯޑެއް ހަދައިފި

ތަމަޅަ ސިނަމާގެ ސުޕަރސްޓާރ ތަލަޕަތީ ވިޖޭ ---
ތަމަޅަ ސިނަމާގެ ސުޕަރސްޓާރ ތަލަޕަތީ ވިޖޭ ---

ތަމަޅަ ސިނަމާގެ ސުޕަރސްޓާރ ތަލަޕަތީ ވިޖޭގެ އެންމެ ފަހު ފިލްމު 'ޖަނަ ނާޔަގަން' ސިނަމާތަކަށް އައުމުގެ ކުރިން ބޮޑު ތާރީޚީ ރެކޯޑެއް ގާއިމުކޮށްފިއެވެ. ފިލްމު ރިލީޒްކޮށް، ފުރަތަމަ ޝޯ ފެށުމުގެ ކުރިންވެސް އޮންލައިން ޓިކެޓް ބުކިންގ ޕްލެޓްފޯމެއްގައި 1 މިލިއަނަށްވުރެ ގިނަ ޓިކެޓް ވަނީ ވިއްކާފައެވެ. މި ބޮޑު ކާމިޔާބީއާ ގުޅިގެން ތަމިޅުނާޑުގެ އިތުރުން އިންޑިއާގެ އެކި ކަންކޮޅުތަކުގައި އޭނާގެ ފޭނުން އަންނަނީ އުފާފާޅުކުރަމުންނެވެ.

މި ކާމިޔާބީއާއެކު ވިޖޭ ވެގެންގޮސްފައިވަނީ އިންޑިއާގެ ފިލްމީ ތާރީޚުގައިވެސް މިފަދަ ރެކޯޑެއް ހޯދި ފުރަތަމަ އެކްޓަރަށެވެ. 'ޖަނަ ނާޔަގަން' އަކީ 'ވާރިސު' އަދި 'ދަ ގްރޭޓެސްޓް އޮފް އޯލް ޓައިމް' (GOAT) އަށްފަހު، ރިލީޒްކުރުމުގެ ކުރިން 1 މިލިއަނަށްވުރެ ގިނަ ޓިކެޓް ވިއްކި ވިޖޭގެ ޖެހިޖެހިގެން ތިންވަނަ ފިލްމެވެ. މިއާއެކު އޭނާ ވަނީ އޮންލައިން ޓިކެޓް ޕްލެޓްފޯމެއްގައި 1 މިލިއަން ޕްރީ-ސޭލްސްގެ ހެޓްރިކެއް ހަދާފައެވެ.

އެޗް. ވިނޯތު ޑައިރެކްޓްކޮށްފައިވާ މި ފިލްމު ރިލީޒްކުރުމުގައި ގިނަ ހުރަސްތަކަކާ ކުރިމަތިލާންޖެހުނެވެ. ސެޓްފިކޭޝަންގެ މައްސަލަތަކާއި ގާނޫނީ ހުރަސްތަކުގެ ސަބަބުން ފިލްމު ރިލީޒްކުރުން ލަސްވެފައިވާއިރު، ރިލީޒްގެ ކުރިން ފިލްމުގެ ނާޖާއިޒު ކޮޕީއެއް އޮންލައިންކޮށް ލީކުވުމުގެ މައްސަލައެއްވެސް ވަނީ ތިލަވެފައެވެ. ނަމަވެސް މި ހުރިހާ ގޮންޖެހުންތަކާއެކުވެސް ފޭނުންގެ ފަރާތުން ފިލްމަށް ލިބުނު ތަރުހީބަށް އެއްވެސް މަޑުޖެހުމެއް އައިސްފައެއް ނުވެއެވެ.

'ޖަނަ ނާޔަގަން' އަކީ ވިޖޭ ސިޔާސީ ދާއިރާއަށް ފުރިހަމައަށް ވަނުމުގެ ކުރިން ކުޅޭ އަލުވިދާ ފިލްމު ކަމަށްވާތީ، މިއީ ފޭނުންނަށް ވަރަށް ޚާއްޞަ ފިލްމެކެވެ. މަލްޓި-ސްޓާރާ މި ފިލްމުގެ މުހިންމު ރޯލުތަކުން ޕޫޖާ ހެގްޑޭ، ބޮބީ ޑިއޯލް، ޕްރަކާޝް ރާޖް، ޕްރިޔާމަނީ، މަމިތާ ބައިޖޫ، ގައުތަމް މޭނަން އަދި ނަރޭން ފަދަ މަޝްހޫރު ތަރިން ފެނިގެންދާއިރު، ފިލްމުގެ މިއުޒިކް ތައްޔާރުކޮށްދީފައިވަނީ އަނިރުދް ރަވިޗަންޑަރއެވެ.

މިހާރު ސިނަމާތަކުގައި ފުލް ހައުސް ޝޯތަކާއެކު މި ފިލްމަށް ވަރަށް ކާމިޔާބު އޯޕަނިންގެއް ލިބިފައިވާއިރު، ކުރިއަށް އޮތް ދުވަސްތަކުގައި ބޮކްސް އޮފީހުގައި މި ފިލްމު ގާއިމުކުރާނެ ރެކޯޑުތަކަށް ސިނަމާގެ ދާއިރާގައި އުޅޭ ފަރާތްތަކުންނާއި ފޭނުން އަންނަނީ ވަރަށް ބޮޑަށް އިންތިޒާރުކުރަމުންނެވެ.

 

މުނިފޫހިފިލުވުން

އިތުރަށް ←