ސްޕެއިނަށް ފަތާފައި އެރި ރެފިއުޖީންގެ މައްސަލައިގައި އީޔޫގެ ވަޒީރުންގެ ކުއްލި ބައްދަލުވުމެއް ބާއްވަނީ
އުތުރު އެފްރިކާގައި އޮންނަ ސްޕެއިންގެ ސެއުތާއަށް 50،000 އަށްވުރެ ގިނަ ރެފިއުޖީން އެތެރެވުމާ ގުޅިގެން އުފެދިފައިވާ ސިޔާސީ ނުވަތަނަވަސްކަމާ ހުރެ، ޔޫރަޕިއަން ޔޫނިއަން (އީޔޫ) ގައުމުތަކުގެ އެތެރޭގެ ކަންކަމާ ބެހޭ ވަޒީރުންގެ ކުއްލި ބައްދަލުވުމެއް އަންގާރަ ދުވަހު ބޭއްވުމަށް ނިންމައިފިއެވެ.
މޮރޮކޯ މަގުން ސެއުތާއަށް އެތެރެވާން އުޅުނު މީހުންގެ ތެރެއިން މަދުވެގެން 67 މީހުން މަރުވެފައިވާކަން ސްޕެއިނުން ކަށަވަރުކޮށްދީފައިވެއެވެ. މީގެ ތެރެއިން ބައެއް މީހުން މަރުވީ މޫދަށް ގެނބިގެން ކަމަށްވާއިރު، އަނެއްބައި މީހުން މަރުވީ ބޯޑަރު ކައިރީގައި އުފެދުނު ފިއްތުންތަކުގެ ތެރޭގައެވެ. މި ހާދިސާއަށްފަހު ސްޕެއިންގެ ފުލުހުން ވަނީ މޮރޮކޯއާ ގުޅޭ ބޯޑަރު ސަރަހައްދުގައި 500 މީޓަރުގެ ފްލޯޓިން ބެރިއަރެއް ހަރުކުރަން ފަށާފައެވެ.
ސްޕެއިންގެ ސިފައިން ނުކުމެ ކުރި މަސައްކަތުން މީހުން އެތެރެވުން ހުއްޓުވާފައިވާއިރު، އެ ގައުމަށް އެތެރެވި މީހުންގެ ތެރެއިން 48،000 އަށްވުރެ ގިނަ މީހުން ވަނީ އަނބުރާ މޮރޮކޯއަށް ފޮނުވާލާފައެވެ. ނަމަވެސް ސެއުތާގެ ރައީސް ހުއާން ހެސޫސް ވިވާސް ވިދާޅުވި ގޮތުގައި އަދިވެސް އެތައް ހާސް މީހުން އެ ސަރަހައްދުގައި އެބަތިއްބެއެވެ.
މި މައްސަލައިގައި އީޔޫގެ ގައުމުތަކުގެ މެދުގައި ވަނީ ބޮޑެތި ޚިޔާލުތަފާތުވުންތަކެއް އުފެދިފައެވެ. އިޓަލީން ވަނީ ސްޕެއިނާއެކު އޮންނަ ޝެންގެން އުސޫލުތައް މަހެއްހާ ދުވަހަށް ސަސްޕެންޑްކޮށްފައެވެ. އިޓަލީގެ ޚާރިޖީ ވަޒީރު އެންޓޯނިއޯ ތަޖާނީ ތުހުމަތު ކުރެއްވި ގޮތުގައި މި ހާދިސާ ހިނގަން މެދުވެރިވީ ސްޕެއިންގެ ސަރުކާރުން ގަވާއިދާ ޚިލާފަށް އުޅޭ މީހުން ގާނޫނީ އިމުގެ ތެރެއަށް ގެނައުމަށް ގެންގުޅުނު ސިޔާސަތުގެ ސަބަބުންނެވެ.
ސްޕެއިންގެ ބޮޑުވަޒީރު ޕެޑްރޯ ސާންޗޭޒް ވަނީ މި ތުހުމަތުތައް ދޮގުކުރައްވައި، އިޓަލީން ފަތުރަނީ ދޮގު މައުލޫމާތު ކަމަށް ވިދާޅުވެފައެވެ. އަދި އީޔޫގެ އެހެން ގައުމުތަކުން ސްޕެއިނާއެކު އެއްބައިވަންތަކަން ދެއްކުމަށް އޭނާ އެދިވަޑައިގެންނެވިއެވެ. މިދަނޑިވަޅުގައި ފްރާންސުން ވަނީ ސްޕެއިން ޝެންގެން ސަރަހައްދުން ސަސްޕެންޑް ކުރުމަށް ތާއީދު ނުކުރާނެ ކަމަށް ބުނެފައެވެ.
މި ފަހަރުގެ އޮއިވަރަކީ 2021 ވަނަ އަހަރަށްފަހު ސެއުތާގެ ބޯޑަރުން މިހާ ގިނަ އަދަދަކަށް މީހުން އެތެރެވާން މަސައްކަތްކުރި ފުރަތަމަ ފަހަރެވެ. ސްޕެއިންގެ ސަރުކާރުން ބުނާ ގޮތުގައި މިކަމުގެ ފަހަތުގައިވަނީ އިންސާނީ ވަގުފާރިކުރާ ގުރޫޕްތަކެވެ.
Ads by MACL
