ދުނިޔެއިން ނެތިދިއުމުގެ ނުރައްކާ އެންމެ ބޮޑު ދިރޭތަކެތީގެ 100 ވައްތަރެއް ސަލާމަތްކުރުމަށްޓަކައި 200 މިލިއަން އެމެރިކާ ޑޮލަރުގެ ބޮޑު މަޝްރޫއެއް
މަޝްހޫރު ފިލްމީ ތަރި ލިއޮނާޑޯ ޑިކާޕްރިއޯ އާއި އެމެޒޯންގެ ބާނީ ޖެފް ބެޒޮސް ގުޅިވަޑައިގެން، ދުނިޔެއިން ނެތިދިއުމުގެ ނުރައްކާ އެންމެ ބޮޑަށް ހުށަހެޅިފައިވާ ދިރޭތަކެތީގެ 100 ވައްތަރެއް ސަލާމަތްކުރުމަށްޓަކައި 200 މިލިއަން އެމެރިކާ ޑޮލަރުގެ ބޮޑު މަޝްރޫއެއް އިފްތިތާހުކޮށްފިއެވެ.
"ފީނިކްސް ސްޕީޝީޒް ޕްރޮޖެކްޓް" ގެ ނަމުގައި ފެށި މި މަޝްރޫއަކީ ނެތިދިއުމުގެ ބިރުބޮޑުވެފައިވާ ވައްތަރުތައް އަލުން އާލާކުރުމަށް އެއް ފަހަރާ ދޫކުރެވުނު އެންމެ ބޮޑު މާލީ އެހީއެވެ. މި މަޝްރޫއު ކުރިއަށްގެންދަނީ ޑިކާޕްރިއޯގެ "ރީ ވައިލްޑް" ޖަމިއްޔާއާއި ބެޒޮސްގެ "ބެޒޮސް އާރތު ފަންޑް" ގުޅިގެންނެވެ.
މި މަޝްރޫއުގެ މަޝްވަރާތައް 2021 ވަނަ އަހަރުން ފެށިގެން ކުރިއަށްގޮސްފައިވާއިރު، މީގެ ތެރޭގައި ތިމާވެށި ރައްކާތެރިކުރާ އެކި ޖަމިއްޔާތަކާއި، އަސްލު ރަށްވެހިންގެ އިތުރުން އެކި ގައުމުތަކުގެ ސަރުކާރުތައް ބައިވެރިވެފައިވެއެވެ. އާންމުކޮށް ހިންގާ ބޮޑެތި ތިމާވެށީގެ ޕްރޮގްރާމްތަކަށް ފައިސާ ބެހުމުގެ ބަދަލުގައި، މި މަޝްރޫއުގެ މައިގަނޑު އަމާޒަކީ މިހާރުވެސް އަދަދު ވަރަށް މަދުވެ، ޚާއްސަ ހިމާޔަތެއް ބޭނުންވާ ވައްތަރުތަކަށް ސީދާ އެހީތެރިކަން ފޯރުކޮށްދިނުމެވެ.
Ads by BMLމި މަޝްރޫއުގެ ދަށުން ސަލާމަތްކުރަން އަމާޒުކޮށްފައިވާ ދިރޭތަކެތީގެ ތެރޭގައި މެޑަގަސްކަރުގެ ގޯލްޑަން-ކްރައުންޑް ސިފާކާ ލެމާ، އެމެރިކާގެ ހިކަރީ ނަޓް ގޯރޖް ގްރީން ސެލަމޭންޑާ، ފިލިޕީންސްގެ ވިސަޔަން ވޯޓީ ޕިގް އަދި ގަލަޕާގޮސްގެ ޕިންކް ލޭންޑް އިގުއާނާ ހިމެނެއެވެ. މީގެއިތުރުން ވަގަށް ޓްރޭޑްކުރެވޭ މަލަޔަން ޕެންގޮލިން، ޓެންޒޭނިއާގެ ޕެންކޭކް ޓޯޓަސް އަދި ނިއު ގިނީގެ އެޓެންބަރޯގެ ލޯންގް-ބީކްޑް އެކިޑްނާ ފަދަ ނާދިރު ސޫފިޕުޅިތައްވެސް ހިމެނެއެވެ.
މި މަޝްރޫއުގެ އަނެއް ބޭނުމަކީ ތިމާވެށި ހިމާޔަތްކުރަން މިހާރުވެސް ކުރަމުންދާ މަސައްކަތްތައް ބަދަލުކުރުމުގެ ބަދަލުގައި، އެ މަސައްކަތްތަކަށް މާލީ އަދި ޓެކްނިކަލް އެހީތެރިކަން ދީގެން އިތުރަށް ވަރުގަދަކުރުމެވެ.
މި ފަންޑުގެ ސަބަބުން ކުދި ބަޖެޓްތަކުގައި ގިނަ ދުވަސްތަކެއް ވަންދެން މަސައްކަތްކުރަމުންއައި ޖަމިއްޔާތަކަށް ބޮޑު ކުރިއެރުމެއް ލިބި، ނެތިދިއުމުގެ ބިރު އޮތް ދިރޭތަކެތި ރައްކާތެރިކުރުމުގެ މުޅި މިސްރާބު ބަދަލުވެގެންދާނެއެވެ.
Ads by MACL
