ސެއުޓާގެ ބޯޑަރު ހުރަސްކުރަން އުޅުނު ބަޔަކު މޮރޮކޯގެ ސަލާމަތީ ބާރުތަކުން ހުއްޓުވައިފި
މޮރޮކޯއާ އިންވެގެން އޮންނަ ސްޕެއިންގެ ސަރަހައްދެއް ކަމަށްވާ ސެއުޓާއަށް ގަވާއިދާ ޚިލާފަށް އެތެރެވާން އުޅުނު ގިނަ އަދަދެއްގެ ބަޔަކު، މޮރޮކޯގެ ސަލާމަތީ ބާރުތަކުން ކުރިއަށް ގެންދިޔަ އޮޕަރޭޝަނެއްގައި ހުއްޓުވައިފި އެވެ.
ރޮއިޓާސް އަދި ސްޕެއިންގެ ޚަބަރު ފަތުރާ ވަސީލަތްތަކުން ރިޕޯޓުކޮށްފައިވާ ގޮތުގައި، މި އޮޕަރޭޝަން ހިންގާފައިވަނީ ފްނިޑެކް އަވަށުގެ ބޭރުން ބޯޑަރާ ދިމާލަށް ދަތުރުކުރަމުން ދިޔަ 100 އަށް ވުރެ ގިނަ މީހުން ހުއްޓުވުމަށެވެ.
މި ފިޔަވަޅުތައް ވަރުގަދަކޮށްފައި މިވަނީ މީގެ ދެ ހަފުތާއެއްހާ ދުވަސް ކުރިން ކުޑަ ވަގުތުކޮޅެއްގެ ތެރޭގައި ކަނޑުމަގުން 78،000 އެއްހާ މީހުން އެ ސަރަހައްދަށް ވަދެގަތް ނުރައްކާތެރި ހާދިސާއާ ގުޅިގެންނެވެ. އެ ފަހަރުގެ ހާދިސާގައި 100 މީހަކު މަރުވެފައިވާއިރު، އެތެރެވި ގިނަ މީހުން ވަނީ އަލުން އަނބުރާ މޮރޮކޯއަށް ފޮނުވާލާފައި ކަމަށް ސެއުޓާގެ މޭޔަރު ވިދާޅުވެފައިވެ އެވެ.
Ads by BMLސޯޝަލް މީޑިއާގައި ބޯޑަރު ހުރަސްކުރުމަށް ގޮވާލައި ދައުރުވަމުންދާ މެސެޖުތަކާ ގުޅިގެން މި ހަފުތާ ބަންދުގައި އިތުރު ބަޔަކު އެއްފަހަރާ އެތެރެވާން މަސައްކަތް ކޮށްފާނެ ކަމަށް ބަލައި ސަލާމަތީ ބާރުތައް ވަނީ ފުރިހަމަ ތައްޔާރީ ހާލަތަކަށް ގެނެސްފަ އެވެ.
މޮރޮކޯ ސަރުކާރުން ބުނެފައިވަނީ ހޮނިހިރު ދުވަހު ގަވާއިދާ ޚިލާފަށް ބޯޑަރު ހުރަސްކުރުމަށް ރާވައި، މީހުން އެއްކުރުމަށް ސޯޝަލް މީޑިއާގައި ހިންގާ ހަރަކާތްތައް ވަރަށް ގާތުން ބަލަމުންދާ ކަމަށެވެ.
އަދި އެފަދަ ކަންކަން ރާވާ ފަރާތްތަކަށާއި އޭގައި އަމަލީ ގޮތުން ބައިވެރިވާ އެންމެހައި ފަރާތްތަކާ މެދު ގާނޫނީ ގޮތުން އެޅެން އޮތް އެންމެ ހަރުކަށި ފިޔަވަޅު އަޅާނެ ކަމުގެ އިންޒާރު ވެސް އެ ގައުމުން ވަނީ ދީފަ އެވެ.
Ads by MACL
