ބުދަ، 18 ނޮވެމްބަރު 2026
ދުނިޔެ

ފީފާގެ އެތެރޭގެ ކޯޅުން ބޮޑުވެ އިންފަންޓީނޯ އެކަހެރިވަނީ: މެޖޯރިޓީ ނައިބު ރައީސުންގެ އިތުބާރު ގެއްލިއްޖެ

ފީފާގެ އެތެރޭގެ ކޯޅުން ބޮޑުވެ އިންފަންޓީނޯ އެކަހެރިވަނީ: މެޖޯރިޓީ ނައިބު ރައީސުންގެ އިތުބާރު ގެއްލިއްޖެ

ދުނިޔޭގެ ފުޓްބޯޅައިގެ މައި އިދާރާ (ފީފާ) ގެ ލީޑަޝިޕްގެ އެތެރޭގައި އުފެދިފައިވާ ބޮޑެތި ޚިޔާލުތަފާތުވުންތަކާ އެކު، އެ އިދާރާގެ ރައީސް ޖިއާނީ އިންފަންޓީނޯ އަށް އޮތް ތާއީދު ކުޑަވެ، އިސް ވެރިންގެ މެދުގައި އޭނާ އެކަހެރިވާން ފަށައިފި އެވެ. މިގޮތުން ފީފާގެ ނައިބު ރައީސް އަދި ހަންގޭރީގެ ފުޓްބޯޅަ އިދާރާގެ ވެރިޔާ ސެންޑްރޯ ސާނީ ވެސް ވަނީ އިންފަންޓީނޯއަށް ކުރިން އޮތް އިތުބާރު ގެއްލިފައިވާކަން ހާމަކުރައްވައިފަ އެވެ.

ބޭންކިން ދާއިރާގެ މަހުޖަނެއް ކަމަށްވާ ސާނީ ފޮނުއްވި ސިޓީއެއްގައި ބަޔާންކުރައްވާފައި ވަނީ، ފީފާގެ ސީއީއޯ ކެވިން ލެމުއާ މަގާމުން ދުރުކުރަން ނިންމި ނިންމުމަކީ އުސޫލުތަކާ ޚިލާފަށް ނިންމާފައިވާ ނިންމުމެއް ކަމަށެވެ. އެ ސިޓީގެ ކޮޕީއެއް ބައިނަލްއަގުވާމީ މީޑިއާތަކަށް ވެސް ލިބިފައިވާއިރު، މިއީ އިންފަންޓީނޯގެ އިދާރީ ނިންމެވުންތަކަށް ފީފާގެ މަތީ ފަންތިން އަމާޒުވި ވަރުގަދަ ފާޑުކިޔުމެކެވެ.

ފީފާގެ ހިންގާ ކައުންސިލްގެ ނައިބު ރައީސުންގެ ތެރެއިން ގިނަ ބޭފުޅުންތަކެއް މިހާރު ވަނީ އިންފަންޓީނޯއާ ދެކޮޅަށް ސަފު ހަދައިފަ އެވެ. އޭގެ ތެރޭގައި ޔޫއެފާގެ ރައީސް އެލެގްޒެންޑާ ކެފެރިން އާއި ކޮންކާކަފްގެ ރައީސް ވިކްޓަރ މޮންޓާލިއާނީ އާއި އޭއެފްސީގެ ރައީސް ޝައިހް ސަލްމާން ބިން އިބްރާހިމް އަލް ޚަލީފާ އަދި އިނގިރޭސި އެފްއޭގެ ޗެއާޕާސަން ޑެބީ ހިއުއިޓް ހިމެނެ އެވެ.

ޖުމުލަ 37 މެންބަރުންގެ މައްޗަށް އެކުލެވޭ ފީފާ ކައުންސިލުގެ ނައިބު ރައީސުންގެ ތެރެއިން މިހާރު އިންފަންޓީނޯއަށް ތާއީދު އޮތީ ދެކުނު އެމެރިކާގެ އަލެހާންޑްރޯ ޑޮމިންގޭޒް އާއި އެފްރިކާގެ ޕެޓްރިކް މޮސެޕޭގެ އިތުރުން އޯޝިއޭނިއާގެ ލެމްބާޓް މަލްޓޮކްގެ އެކަންޏެވެ.

މި މައްސަލަތައް ފެންމަތިވެފައި މިވަނީ އިންފަންޓީނޯއާ ދެކޮޅަށް ނުފޫޒު ފޯރުވުމާއި ކޮރަޕްޝަންގެ ބޮޑެތި ތުހުމަތުތަކެއް ކުރެވި، އޭނާ އިތުރު ދައުރަކަށް ވާދަކުރެއްވިޔަ ނުދިނުމަށް ފީފާގެ އެތެރޭގައި ވަރުގަދަ ހަރަކާތްތަކެއް ހިނގަމުންދާ ދަނޑިވަޅެއްގަ އެވެ.