ނޭޕާލަށް ކުރިމަތިވި ފެންބޮޑުވުމުގެ ކާރިސާގައި އެއްވެސް ދިވެއްސަކަށް ގެއްލުމެއް ނުވޭ
ނޭޕާލުގެ ހިމާލިޔާ ފަރުބަދަތަކުގެ ސަރަޙައްދުގައި އޮންނަ ކޯރެއް ފުރި ބަންޑުންވެގެން ހިނގި ފެންބޮޑުވުމުގެ ބޮޑު ކާރިސާއާ ގުޅިގެން، އެ ޤައުމުގައި އުޅޭ އެއްވެސް ދިވެހި ރައްޔިތަކަށް މިހާތަނަށް އެއްވެސް އަސަރެއް ކޮށްފައި ނުވާކަން ދިވެހިރާއްޖޭގެ ޚާރިޖީ ވުޒާރާއިން ކަށަވަރުކޮށްދީފިއެވެ.
ފޮރިން މިނިސްޓްރީން ބުނީ ކާރިސާ ހިނގި ސަރަޙައްދުގައި އެއްވެސް ދިވެއްސަކު ހުރިކަމުގެ މަޢުލޫމާތު މިހާތަނަށް ލިބިފައި ނުވާ ކަމަށެވެ. އަދި އިންޑިއާގައި ހުންނަ ދިވެހި ހައިކޮމިޝަނާއި ކަތުމަންޑޫގައި ހުންނަ ދިވެހިރާއްޖޭގެ އޮނޮރަރީ ކޮންސުލް މެދުވެރިކޮށް ބެލިބެލުމުން ވެސް އެ ޤައުމުގައި ދިރިއުޅޭ ދިވެހިންގެ ޙާލު ރަނގަޅުކަން ވަނީ ސާފުވެފައެވެ.
މި ކާރިސާއާ ގުޅިގެން ނޭޕާލުގައި ތިބި ދިވެހިންގެ ތެރެއިން އެއްވެސް ފަރާތަކުން އެހީތެރިކަމެއް ނުވަތަ މަޢުލޫމާތެއް ބޭނުންވާނަމަ، ވުޒާރާގެ ހޮޓްލައިން ނަންބަރު 7983400+ އަށް ގުޅުމަށް ނުވަތަ [email protected] އަށް އީމެއިލް ކުރުމަށް ފޮރިން މިނިސްޓްރީން ވަނީ އިލްތިމާސްކޮށްފައެވެ.
Ads by BMLމި ކާރިސާގައި މަގުތަކާއި ބްރިޖުތަކުގެ އިތުރުން ހައިޑްރޯޕަވަރ އިންޖީނުގެތަކަށް ބޮޑެތި ގެއްލުންތަކެއް ލިބިފައިވާއިރު، ފެންބޮޑުވުމާއި ބިންގަނޑު ކަނޑައިގެން ދިއުމުގެ ސަބަބުން މިހާތަނަށް 270 އަށް ވުރެ ގިނަ މީހުން ވަނީ މަރުވެފައެވެ. އަދި 800 އަށް ވުރެ ގިނަ މީހުން ގެއްލިގެން ރިޕޯޓުކޮށްފައިވާއިރު، އޭގެ ތެރޭގައި އެ ޤައުމަށް ޒިޔާރަތްކުރި ބޭރުގެ ފަތުރުވެރިންނާއި ސަލާމަތީ ބާރުތަކުގެ އޮފިސަރުން ވެސް ހިމެނެއެވެ.
ފެންގަނޑު އާދަޔާ ޚިލާފަށް ބޮޑުވެފައިވާ ރަސުވާ އަދި ނުވާކޯޓް ޑިސްޓްރިކްޓް ފަދަ ސަރަޙައްދުތަކުގައި މީހުން ސަލާމަތްކުރުމަށް ހެލިކޮޕްޓަރު ޖެއްސުމުގައި ބޮޑެތި ގޮންޖެހުންތަކެއް ވަނީ ކުރިމަތިވެފައެވެ. އެ ސަރަޙައްދުގެ އިދާރާތަކުން ބުނާ ގޮތުގައި މަރުވި މީހުންގެ ޢަދަދު އަދިވެސް އިތުރުވުމުގެ ފުރުޞަތު އޮތުމާއެކު، ކޯރުތަކުގެ އައްސޭރީގައި ދިރިއުޅޭ މީހުން ވަގުތުން ރައްކާތެރި އުސް ސަރަޙައްދުތަކަށް ބަދަލުވުމަށް އަންގާފައިވެއެވެ.
ނޭޕާލަކީ ދެކުނު އޭޝިއާގެ މޫސުމީ ވިއްސާރައިގެ (މޮންސޫން) ދުވަސްވަރު ފަރުބަދަމަތީގެ ކޯރުތައް ފުރިގެން އަންނަ ފެންބޮޑުވުމާއި ބިންގަނޑު ކަނޑައިގެން ދިއުމުގެ ނުރައްކާ އަބަދުވެސް ބޮޑު ޤައުމެކެވެ. މީގެ އިތުރުން ނޭޕާލަކީ މަތީ ތަޢުލީމު ހާސިލުކުރުމަށް، ޚާއްޞަކޮށް މެޑިސިން ދާއިރާއިން ކިޔެވުމަށް ގިނަ ޢަދަދެއްގެ ދިވެހި ދަރިވަރުން ދިރިއުޅޭ ޤައުމެކެވެ.
Ads by MACL
