ބުދަ، 18 ނޮވެމްބަރު 2026
ދުނިޔެ

ނޭޕާލަށް ދިމާވި ފެންބޮޑުވުމުގެ ކާރިސާއާ ގުޅިގެން ދިވެހި ރެޑް ކްރެސެންޓުން އެހީގެ ފަންޑެއް ހުޅުވައިފި

ނޭޕާލަށް ދިމާވި ފެންބޮޑުވުމުގެ ކާރިސާއާ ގުޅިގެން ދިވެހި ރެޑް ކްރެސެންޓުން އެހީގެ ފަންޑެއް ހުޅުވައިފި

ނޭޕާލާއި ޓިބެޓް ގުޅޭ ބޯޑަރު ސަރަހައްދުގައި ފަރުބަދައަކުން ގާތަކެއް ވެއްޓި، ކޯރެއް ބަންޑުންވުމުގެ ސަބަބުން ހިނގި ނުރައްކާތެރި ފެންބޮޑުވުމުގެ ކާރިސާގައި ހާލުގައި ޖެހުނު މީހުންނަށް އަވަސް އެހީތެރިކަން ފޯރުކޮށްދިނުމުގެ ގޮތުން މޯލްޑިވިއަން ރެޑް ކްރެސެންޓް (އެމްއާރްސީ) އިން ހާއްސަ ރިލީފް ފަންޑެއް އިފްތިތާހުކޮށްފިއެވެ.

"އެމްއާރްސީ ނޭޕާލް ސޮލިޑަރިޓީ ފަންޑު" ގެ ނަމުގައި ހުޅުވި މި ފަންޑުގެ މައިގަނޑު މަގުސަދަކީ ކުއްލި ހާލަތްތަކުގައި ބޭނުންވާ ޒަރޫރީ އެހީތެރިކަން އަވަހަށް ފޯރުކޮށްދިނުމެވެ. މި ފަންޑަށް ލިބޭ އެންމެހައި އެހީގެ ފައިސާ އިންޓަނޭޝަނަލް ފެޑެރޭޝަން އޮފް ރެޑް ކްރޮސް އެންޑް ރެޑް ކްރެސެންޓް ސޮސައިޓީސް (އައިއެފްއާރްސީ) މެދުވެރިކޮށް ނޭޕާލް ރެޑް ކްރޮސް ސޮސައިޓީއާ ހަވާލުކުރާނެ ކަމަށް އެ ޖަމިއްޔާއިން މައުލޫމާތުދެއެވެ.

މި ހިތާމަވެރި ހާދިސާގައި މިހާތަނަށް 626 އަށް ވުރެ ގިނަ މީހުންގެ ފުރާނަ ގެއްލިފައިވާއިރު، 2،500 އަށް ވުރެ ގިނަ މީހުން ވަނީ ވީނުވީއެއް ނޭނގި ގެއްލިފައެވެ. އަދި މި ކާރިސާގެ އަސަރު އެކި ގޮތްގޮތުން 93،000 އަށް ވުރެ ގިނަ ރައްޔިތުންނަށް ކޮށްފައިވާ ކަމަށާއި އެތައް ހާސް ބައެއްގެ ގެދޮރު އެއްކޮށް ސުންނާފަތިވެފައިވާ ކަމަށް ނޭޕާލް ސަރުކާރުގެ ތަފާސްހިސާބުތަކުން ދައްކައެވެ.

ހާލުގައި ޖެހިފައިވާ މީހުން ހޯދައި ސަލާމަތްކުރުމަށްޓަކައި ޗައިނާ އަދި އިންޑިއާގެ އިމަޖެންސީ ޓީމުތަކުން ދަނީ ކާރިސާ ހިނގި ސަރަހައްދުގައި ފުޅާ ދާއިރާއެއްގައި މަސައްކަތް ކުރަމުންނެވެ. މި އޮޕަރޭޝަންތަކުގައި މިހާތަނަށް 3،700 އަށް ވުރެ ގިނަ މީހުން ވަނީ ރައްކާތެރި ހިސާބުތަކަށް ބަދަލުކުރެވިފައެވެ.

ގެއްލުނު މީހުންގެ ތެރޭގައި ޓިބެޓުގައި އޮންނަ މަގްބޫލު އަޅުކަމުގެ މަންޒިލެއް ކަމަށްވާ މައުންޓް ކައިލާޝްއަށް ޒިޔާރަތްކުރި ގިނަ އަދަދެއްގެ ހިންދޫ ޒިޔާރަތްތެރިންނާއި 770 އަށް ވުރެ ގިނަ ފަތުރުވެރިން ހިމެނެއެވެ.

ހިމާލަޔާ ފަރުބަދަތަކުގެ ނާޒުކު ބިންތަކާއި މޫސުމަށް އަންނަ ބަދަލުތަކުގެ ސަބަބުން މިފަދަ ބިންގަނޑު ކަނޑައިގެން ދިއުމާއި ފެންބޮޑުވުމުގެ ނުރައްކާތެރި ކާރިސާތައް މި ސަރަހައްދުގައި އާންމުކޮށް ހިނގާއިރު، މިއީ ފަހަކަށް އައިސް މި ބޯޑަރު ސަރަހައްދަށް ކުރިމަތިވި އެންމެ ބޮޑު އެއް ގުދުރަތީ ކާރިސާއެވެ.