ބުދަ، 18 ނޮވެމްބަރު 2026
ދުނިޔެ

މެދުއިރުމަތީގެ މަޝްރަހު ގޯސްވެ، ތެލުގެ އަގު އުފުލި ދަތުރުފަތުރަށް ބުރޫއަރައިފި

މެދުއިރުމަތީގެ މަޝްރަހު ގޯސްވެ، ތެލުގެ އަގު އުފުލި ދަތުރުފަތުރަށް ބުރޫއަރައިފި

މެދުއީރުމަތީގެ ސަރަހައްދީ ނުތަނަވަސްކަން ބޮޑުވެ، މަޝްރަހު އިތުރަށް ގޯސްވުމާ ގުޅިގެން ސައޫދީ އަރަބިއްޔާގެ އެއާޕޯޓުތަކަށް ހަމަލާތަކެއް އަމާޒުވެ، ތެލުގެ ބައިނަލްއަގުވާމީ އަގުތައް ވަރަށް ބޮޑަށް އުފުލިއްޖެއެވެ.

ޔަމަނުގެ ހޫތީން ސައޫދީ އަރަބިއްޔާގެ ރިޔާޟްގައި އޮންނަ ކިންގް ޚާލިދު އިންޓަނޭޝަނަލް އެއާޕޯޓަށާއި އަބްހާ އިންޓަނޭޝަނަލް އެއާޕޯޓަށް މިސައިލާއި ډްރޯން ބޭނުންކޮށްގެން ދިން ހަމަލާތަކުގައި ތިން މީހުން މަރުވެ 36 މީހުން ވަނީ ޒަޚަމްވެފައެވެ.

މި ހަމަލާތަކާ ގުޅިގެން ސަރަހައްދީ ވައިގެ ދަތުރުފަތުރަށް ބޮޑެތި ބުރޫތަކެއް އަރާފައިވާއިރު، އެއާ އިންޑިއާ، އިންޑިގޯ އަދި އާކާސާ އެއާ އިން ވަނީ ރިޔާޟަށް ކުރަން ހަމަޖެހިފައިވާ ގިނަ ފްލައިޓްތަކެއް ކެންސަލްކޮށް، ބައެއް ފްލައިޓްތައް ވައިގެ ތެރެއިން އަނބުރާލައި ނުވަތަ އެހެން އެއާޕޯޓުތަކަށް މިސްރާބު ބަދަލުކޮށްފައެވެ. މީގެ ތެރޭގައި ދިއްލީން ރިޔާޟަށް ދަތުރުކުރި އެއާ އިންޑިއާގެ ފްލައިޓެއް އަނބުރާ ދިއްލީއަށް ޖައްސާފައިވާއިރު، ހައިދަރުއާބާދުން ދަތުރުކުރި އިންޑިގޯ ފްލައިޓެއް ވަނީ ދައްމާމަށް މިސްރާބު ބަދަލުކޮށްފައެވެ.

އެއާޕޯޓުތަކަށް ދެވުނު ހަމަލާތަކުގެ އިތުރުން، ހުރުމުޒު ކަނޑުއޮޅި ފަދަ މުހިންމު ކަނޑުގެ މަގުތަކުގައި ސެކިއުރިޓީ ނުރައްކާތައް ބޮޑުވެ، ކާގޯ ބޯޓުފަހަރާއި ތެޔޮ އުފުލާ އުޅަނދުފަހަރަށް ކުރިމަތިވެފައިވާ ގޮންޖެހުންތައް ވަނީ އިތުރުވެފައެވެ. ކަނޑުމަގުން ކުރާ ދަތުރުފަތުރުގެ ނުރައްކާ ބޮޑުވުމުގެ ސަބަބުން ކަނޑުގެ އުޅަނދުފަހަރުގެ އިންޝުއަރެންސް ފީތައް ވަނީ އިންތިހާއަށް އުފުލި، އޮޕަރޭޝަންތަކަށް ބަދަލުތައް އަންނަން ފަށާފައެވެ.

މެދުއީރުމަތީގެ ހަމަނުޖެހުންތަކާ ގުޅިގެން ތެޔޮ ސަޕްލައިކުރުމަށް ހުރަސްތަކެއް ކުރިމަތިވެދާނެކަމުގެ ބިރު ބޮޑުވެ، ބައިނަލްއަގުވާމީ ދުނިޔޭގައި ތެލުގެ އަގު ވަނީ ފީފާއެއް 100 ޑޮލަރަށްވުރެ މައްޗަށް އުފުލިފައެވެ. އެގޮތުން ބްރެންޓް ކްރޫޑް ފީފާއެއްގެ އަގު 102.28 ޑޮލަރަށް އަރާފައިވާއިރު، އެމެރިކާގެ ވެސްޓް ޓެކްސަސް އިންޓަމީޑިއޭޓް (ޑަބްލިއުޓީއައި) ކްރޫޑް ފީފާއެއްގެ އަގު ވަނީ 89.94 ޑޮލަރަށް މައްޗަށް ގޮސްފައެވެ.

މި ހަމަލާތަކާ ގުޅިގެން ސައޫދީ އިސްވެއޮންނަ ކޯލިޝަނުން ވަނީ ޔަމަނުގެ ހަތަރު ޕްރޮވިންސެއްގައި ހުރި ހޫތީންގެ 82 އަމާޒަކަށް ހަމަލާދީ ނައްތާލާފައިވާކަމަށް ބުނެފައެވެ. މައިގަނޑު ސިވިލް އިންފްރާސްޓްރަކްޗަރަށް އަމާޒުކޮށް ދޭ ހަމަލާތަކަކީ ބަލައިގަނެވޭނެ ކަމެއް ނޫންކަމަށް ބުނެ ގިނަ ގައުމުތަކަކުން ވަނީ މި ހަމަލާތައް ކުށްވެރިކޮށްފައެވެ.