ގައުމީ ޚިދުމަތުގައި ގެއްލުނު ސިފައިންގެ އޮފިސަރުގެ ހަނދާނުގައި ބަންގްލަދޭޝްގައި މިސްކިތެއް ބިނާކުރަނީ
އެހެން މީހުންގެ ފުރާނަ ސަލާމަތްކުރުމުގެ މަތިވެރި ގައުމީ ވާޖިބުގައި ހުވަދޫ ކަނޑުގެ އޮއިވަރުގެ ތެރެއަށް ގެއްލިގެން ދިޔަ ހިތްވަރުގަދަ ސިފައިންގެ އޮފިސަރު، އިބްރާހިމް އަހުމަދުގެ ހަނދާން ދާއިމަށް ދެމެހެއްޓުމަށްޓަކައި ބަންގްލަދޭޝްގައި މިސްކިތެއް ބިނާކުރުމަށް ނިންމައި، އެ މާތް މަޝްރޫއަށް އާންމުންގެ އެހީތެރިކަމަށް ހުޅުވާލައިފިއެވެ.
ގދ. ތިނަދޫގައި އިޖުތިމާއީ އެކި ހަރަކާތްތަކާއި ފުޓްސަލް މުބާރާތްތައް އިންތިޒާމުކުރާ "ލޮކާސް" އިން ސޯޝަލް މީޑިއާ މެދުވެރިކޮށް ރޭ ކުރި އިއުލާނެއްގައި ބުނީ، އިބްރާހިމް އަހުމަދުގެ ނަމުގައި ބިނާކުރާ މި މިސްކިތަކީ އޭނާގެ ހެޔޮ ހަނދާންތައް އާކޮށް، އަންނަން އޮތް ޖީލުތަކަށް އޭގެ ސަވާބާއި މަންފާ ލިބޭނެ ފަދަ ދެމެހެއްޓެނިވި ސަދަގާތެއްގެ ގޮތުގައި ކުރިއަށްގެންދާ ކަމެއް ކަމަށެވެ. 120 މީހުންގެ ޖާގައިގެ މި މިސްކިތް ބިނާކުރުމަށް ޖުމްލަ 300,000 ރުފިޔާ ހަރަދުވާނެ ކަމަށް ލަފާކުރެވޭއިރު، މި ހެޔޮ ކަމުގައި ބައިވެރިވުމުގެ ފުރުސަތު މިހާރު ވަނީ އާންމުންނަށް ހުޅުވާލާފައެވެ. ތިނަދޫގައި މަސައްކަތް ކުރެއްވި އިބްރާހިމް އަހުމަދަކީ "ލޮކާސް" އިން ބާއްވާ ފުޓްސަލް މުބާރާތްތަކުގައި ކުޅެ، މޮޅު ކުޅުންތެރިޔާގެ މަގާމުވެސް ހާސިލުކޮށްފައިވާ، އެ ރަށުގެ ރައްޔިތުންގެ ލޯބި ހޯދާފައިވާ ޒުވާނެކެވެ.
Ads by BMLމުޅި ގައުމު ރޮއްވާލި މި ހިތާމަވެރި ހާދިސާ ހިނގާފައިވަނީ މިދިޔަ އޮގަސްޓު މަހުގެ 5 ވަނަ ދުވަހުގެ ރޭ ހުވަދޫ ކަނޑުގައެވެ. އަޑިއަށް ދަމުން ދިޔަ ސަޕްލައި ދޯންޏަކުން ދަތުރުކުރި ކައްޕި މުހައްމަދު ހަމްދޫނާއި ހަތް ބިދޭސީންގެ ތެރެއިން ހަމްދޫން ފިޔަވައި އެހެން އެންމެން ވަނީ ސަލާމަތްކުރެވިފައެވެ. އިބްރާހިމް އަހުމަދާއި، އޭރު ފުލުހެއްގެ ވަޒީފާގައި ހުންނެވި އަލީ ނާފިއު ގެއްލިފައިވަނީ ދިޔަވަމުން ދިޔަ ދޯނީގެ ދިޔަ ހިއްކައި، އެ އުޅަނދު ސަލާމަތްކުރުމުގެ ބުރަ މަސައްކަތުގައި އުޅެނިކޮށް ދޯނި އޮލަނބަށް ކަނޑުގެ އަޑިއަށް ދިއުމުގެ ތެރޭގައެވެ.
ގެއްލުނު ތިން މީހުން ހޯދުމަށް އެމެރިކާގެ ނޭވީގެ މަތިންދާބޯޓެއްގެ އެހީތެރިކަމާއެކު ކަނޑާއި ވައިގެ މަގުން ފުޅާ ދާއިރާއެއްގައި ހާއްސަ އޮޕަރޭޝަނެއް ހިންގާފައިވެއެވެ. ނަމަވެސް، ދޯނި އަޑިއަށް ދިޔަ ސަރަހައްދަކީ 1,600 މީޓަރަށް ވުރެ ފުން ސަރަހައްދެއް ކަމަށާއި، އެއީ އިންސާނުންނަށް ޑައިވް ކުރެވޭނެ ނުވަތަ އަސްކަރީ ސަބްމެރިންތަކަށް ވެސް އޮޕަރޭޓް ކުރެވޭނެ ފުންމިނެއް ނޫން ކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ވަނީ ހާމަކޮށްފައެވެ. އަދި ސަލާމަތްވި މީހުންގެ ބަޔާންތަކާއި ހޯދި ހޯދުންތަކަށް ބަލާއިރު، ގެއްލުނު މީހުން ކަނޑުމަތިން ފެނުމުގެ ފުރުސަތު ކުޑަކަމަށް ވެސް އެ އިދާރާއިން ވަނީ ބުނެފައެވެ.
އެހެންނަމަވެސް، ގައުމީ ޚިދުމަތުގައި އިބްރާހިމް އަހުމަދު ދެއްކެވި މަތިވެރި ގުރުބާނީގެ ހަނދާންތައް ފަނޑުވުމެއް ނެތި ދިރުވުމަށް ކުރެވޭ މި މަސައްކަތަކީ، އޭނާގެ ފުރާނައަށް ހެޔޮ ރަހުމަތް ލެއްވުން އެދި ދިވެހިން ކުރާ ދުއާތަކާއެކު ބިނާކުރެވޭ އަގުހުރި ބިނާއެކެވެ.
Ads by MACL
