ބުދަ، 18 ނޮވެމްބަރު 2026
ދުނިޔެ

ބަންގާޅު ކަނޑުގައި ތޫފާނެއް؛ ރާއްޖޭގެ ބޮޑު ބަޔަކަށް ފެންބޮޑުވުމުގެ ބިރު!

ބަންގާޅު ކަނޑުގައި އުފެދިފައިވާ ތޫފާން ދައްކުވައިދޭ ސެޓެލައިޓް ފޮޓޯއެއް، މި ތޫފާނުގެ ނުސީދާ އަސަރު ރާއްޖޭގެ ބޮޑު ބަޔަކަށް ކުރާނެ ކަމަށް މެޓް އޮފީހުން ވަނީ ލަފާކޮށްފައި -- ފޮޓޯ: ސެޓެލައިޓް ވިއު
ބަންގާޅު ކަނޑުގައި އުފެދިފައިވާ ތޫފާން ދައްކުވައިދޭ ސެޓެލައިޓް ފޮޓޯއެއް، މި ތޫފާނުގެ ނުސީދާ އަސަރު ރާއްޖޭގެ ބޮޑު ބަޔަކަށް ކުރާނެ ކަމަށް މެޓް އޮފީހުން ވަނީ ލަފާކޮށްފައި -- ފޮޓޯ: ސެޓެލައިޓް ވިއު

ބަންގާޅު ކަނޑުގައި މިހާރު އުފެދިފައިވާ ކޮޅިގަނޑު މާދަމާ ތޫފާނަކަށް ބަދަލުވެދާނެ ކަމަށް ލަފާކުރެވޭތީ، ރާއްޖޭގެ ބޮޑު ބަޔަކަށް ބޯކޮށް ވާރޭވެހި ފެންބޮޑުވުމުގެ ފުރުޞަތު އޮތް ކަމަށް މޫސުމާ ބެހޭ ޤައުމީ އިދާރާ (މެޓް އޮފީސް) އިން ހާމަކޮށްފިއެވެ.

މެޓް އޮފީހުން މީޑިއާތަކަށް މަޢުލޫމާތު ދެމުން ބުނެފައިވާ ގޮތުގައި، މި ތޫފާނުގެ ނުސީދާ އަސަރު އެންމެ ބޮޑަށް ކުރާނެ ކަމަށް ބެލެވެނީ ރާއްޖޭގެ އުތުރާއި މެދުރާއްޖެތެރޭގެ އަތޮޅުތަކަށެވެ. މޫސުން ގޯސްވުމުގެ ސަބަބުން މިހާރުވެސް އުތުރުގެ ބައެއް ރަށްރަށަށް ބޯކޮށް ވާރޭވެހި ފެންބޮޑުވުމުގެ ޙާދިސާތައް ވަނީ ހިނގާފައެވެ. އޭގެ ތެރޭގައި ޅ. އަތޮޅާއި ކ. އަތޮޅުގެ ބައެއް ރަށްރަށް ހިމެނެއެވެ.

ކުރިއަށް އޮތް ވަގުތުތަކަށް މޫސުން ލަފާކުރާ ގޮތަށް ބަލާއިރު، މެޓް އޮފީހުން ވަނީ މިރޭ 6:00 އިން 10:00 އަށް ށ. އަތޮޅުން ފެށިގެން ކ. އަތޮޅާ ދެމެދުގެ ސަރަހައްދުތަކަށް ރީނދޫ ސަމާލު ނެރެފައެވެ. މި ވަގުތުތަކުގައި އެ ސަރަހައްދުތަކަށް ގުގުރުމާއެކު ބޯކޮށް ވާރޭވެހޭނެ ކަމަށް ލަފާކުރެއެވެ.

މީގެ އިތުރުން، ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި އިތުރަށް ގަދަވާނެ ކަމަށް މެޓް އޮފީހުން ބުނެއެވެ. ވައިޖެހޭނީ ހުޅަނގުދެކުނާއި ހުޅަނގުން ގަޑިއަކު 8 މޭލާއި 18 މޭލާ ދެމެދުގެ ބާރުމިނުގައެވެ. ނަމަވެސް ވިލާގަނޑުގައި ގަޑިއަކު ގާތްގަނޑަކަށް 40 މޭލަށް ވައިގަދަވުން އެކަށީގެންވެއެވެ. އަދި ރާޅުގެ އުސްމިން ހުންނާނީ 3 ފޫޓާއި 6 ފޫޓާ ދެމެދުގައެވެ.

މި ދުވަސްވަރު ރާއްޖޭގެ މޫސުން އާދަޔާ ޚިލާފަށް ގޯސްވަމުންދަނީ "އެލްނީނޯ" ގެ އަސަރު ގަދަވަމުންދާތީ ކަމަށް މެޓް އޮފީހުން ފާހަގަކުރެއެވެ. އަދި އެލްނީނޯގެ ބާރު އެންމެ ގަދަވާނީ އަންނަ ޑިސެމްބަރު މަހުގެ ތެރޭގައި ކަމަށްވެސް އެ އިދާރާއިން ވަނީ ލަފާކޮށްފައެވެ. އެހެންކަމުން، ކަނޑުދަތުރުކުރާ ފަރާތްތަކުންނާއި އާންމު ރައްޔިތުން މޫސުމަށް ޚާއްޞަ ސަމާލުކަމެއް ދިނުމަށް ކަމާބެހޭ އިދާރާތަކުން އިލްތިމާސްކުރެއެވެ.