ބިލެތްފަހީ ސްކޫލުގެ އައު ޢިމާރާތުގެ މަސައްކަތް ބާރުމިނުގައި ކުރިއަށް
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ށ. ބިލެތްފަހީ ސްކޫލުގައި ތަރައްޤީކުރާ 4 ކްލާސްރޫމާއި މަލްޓިޕާޕަސް ހޯލުގެ މަސައްކަތް ބާރުމިނުގައި ކުރިއަށްދާ ކަމަށް އެ ކުންފުނިން ހާމަކޮށްފިއެވެ. މި މަޝްރޫޢުގެ ދަށުން މިހާރު ސައިޓުގައި ކުރިއަށްދަނީ ސްލެބް ޝަޓަރިންގ އަދި ދަގަނޑު ބަނުމުގެ މަސައްކަތެވެ.
މި މަޝްރޫޢަކީ ކުރިން އެހެން ފަރާތަކާ ހަވާލުކޮށްގެން ފެށި ނަމަވެސް، އެކި ސަބަބުތަކާހުރެ މަސައްކަތް ހުއްޓިފައި އޮތް މަޝްރޫޢެކެވެ. ރާއްޖޭގެ 18 ރަށެއްގެ ސްކޫލުތަކުގައި ހުއްޓިފައި ހުރި މަސައްކަތްތައް ނިންމުމަށް ސަރުކާރުން ސަރުކާރު ހިއްސާވާ ކުންފުނިތަކާ ހަވާލުކުރި 114.9 މިލިއަން ރުފިޔާގެ މަޝްރޫޢުތަކުގެ ތެރެއިން، ބިލެތްފަހީ ސްކޫލުގެ މަސައްކަތް އެމްޓީސީސީއާ ހަވާލުކޮށްފައިވަނީ 2025 ވަނަ އަހަރުގެ އޭޕްރީލް މަހުގެ 7 ވަނަ ދުވަހުއެވެ.
Ads by BMLފައުންޑޭޝަނުން ފެށިގެން ގްރޭޑް 10 އަށް ކިޔަވައިދޭ ބިލެތްފަހީ ސްކޫލުގައި މި 4 ކްލާސްރޫމާއި މަލްޓިޕާޕަސް ހޯލު އިމާރާތްކޮށް ނިމުމުން، ސްކޫލަށް ދިމާވެފައިވާ ޖާގައިގެ ދަތިކަމަށް ދާއިމީ ހައްލެއް ލިބިގެންދާނެއެވެ. ޚާއްޞަކޮށް، ދަރިވަރުންނަށް ޒަމާނީ ފެންވަރުގެ ތަނަވަސް މާޙައުލެއްގައި އުނގެނުމުގެ ފުރުޞަތު ފަހިވެ، އެއް ދަންފަޅިއަށް ކިޔަވައިދިނުމުގެ އިންތިޒާމުތައް އިތުރަށް ހަރުދަނާވެގެންދާނެއެވެ.
މީގެ އިތުރުން، މަލްޓިޕާޕަސް ހޯލުގެ މަސައްކަތް ނިމުމާއެކު، ސްކޫލުގެ އެސެމްބްލީތަކާއި، އިންޑޯ ކުޅިވަރުތަކުގެ އިތުރުން އިތުރު ޙަރަކާތްތައް ބޭއްވުމަށް ބޮޑު ލުއިފަސޭހަކަމެއް ލިބިގެންދާނެއެވެ. އަދި ސްކޫލުގެ އިތުރުން، ރަށުގެ އިޖުތިމާޢީ އަދި ރަސްމީ އެކިއެކި ޖަލްސާތަކާއި ޙަފްލާތައް ބޭއްވުމަށްވެސް މި ހޯލުގެ ސަބަބުން ރަށުގެ ރައްޔިތުންނަށް ބޮޑު މަންފާއެއް ކުރާނެއެވެ.
Ads by MACL
