ޞިއްޙީ ޚިދުމަތްތެރިންގެ ކަރުދާހުގެ ބުރައަށް ނިމުމެއް؛ ލައިސަންސާއި ހުއްދަތައް ޑިޖިޓަލް އެއް ވިއުގައަކަށް!
ޞިއްޙީ ޚިދުމަތްތެރިންނަށް ޞިއްޙީ ކައުންސިލްތަކުން ފޯރުކޮށްދޭ ޚިދުމަތްތައް ޒަމާނީކޮށް، އެއް ވިއުގައަކުން ފަސޭހަކަމާއެކު ލިބޭނެ އިންތިޒާމު ހަމަޖެއްސުމަށްޓަކައި ޚާއްޞަ ޑިޖިޓަލް ޕްލެޓްފޯމެއް މިއަދު ރަސްމީކޮށް ތަޢާރަފުކޮށްފިއެވެ.
މި ޕްލެޓްފޯމް އިފްތިތާޙުކުރުމަށް ބޭއްވި ޚާއްޞަ ރަސްމިއްޔާތުގައި ވާހަކަފުޅު ދައްކަވަމުން، މިނިސްޓްރީ އޮފް ހެލްތު، ފެމިލީ އެންޑް ވެލްފެއާގެ އިސްވެރިޔާ ވިދާޅުވީ މިއަދު ތަޢާރަފުކުރެވުނު މި ނިޒާމަކީ ޞިއްޙީ ޚިދުމަތްތެރިންނަށް ދެވޭ ޚިދުމަތްތައް ހަރުދަނާކުރުމަށް އެޅިގެންދިޔަ މުހިންމު ބިންގަލެއް ކަމަށެވެ. މި ޕްލެޓްފޯމުގެ ސަބަބުން ލައިސަންސް އައުކުރުމާއި، ރަޖިސްޓްރީވުމާއި، އެކިއެކި ހުއްދަތައް ހޯދުމުގައި ކުރިން ދިމާވި އިދާރީ ދަތިތަކަށް ނިމުމެއް އައިސް، ކަރުދާހަށް ބަރޯސާވާ މިންވަރު ކުޑަވެގެންދާނެ ކަމަށް އެ ބޭފުޅާ ފާހަގަކުރެއްވިއެވެ.
މި ޕްލެޓްފޯމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ "މޯލްޑިވްސް 2.0" އަދި "ޑިޖިޓަލް ފަސްޓް ނޭޝަން" ސިޔާސަތުގެ ދަށުން، ދައުލަތުގެ ޚިދުމަތްތައް ލާމަރުކަޒުކޮށް ޑިޖިޓަލައިޒް ކުރުމަށް ކުރެވޭ މަސައްކަތުގެ މުހިންމު ބައެކެވެ. އަދި މިއީ މިއަހަރު މިނިސްޓްރީން އިފްތިތާޙުކުރި "މޯލްޑިވްސް ޑިޖިޓަލް ހެލްތު ބްލޫޕްރިންޓް 2026-2030" ގައި ހިމެނޭ ޤައުމީ ތަޞައްވުރު ޙަޤީޤަތަކަށް ހެދުމަށް އެޅުނު މައިގަނޑު އެއް ފިޔަވަޅެވެ.
Ads by BMLއަލަށް ތަޢާރަފުކުރެވުނު ޕްލެޓްފޯމުގެ މައިގަނޑު ފައިދާތައް:
• އީފާސްއާ ގުޅާލެވިފައިވުން: ތަކުރާރުކޮށް މަޢުލޫމާތު ފުރަން ނުޖެހި، ރައްކާތެރިކަމާއެކު އެއް އައިޑީއަކުން ހުރިހާ ޚިދުމަތަކަށް ވާސިލުވެވޭނެއެވެ.
• ޤައުމީ ދަފުތަރެއް އެކުލަވާލުން: މި ނިޒާމުގެ ތެރެއިން ޞިއްޙީ ޚިދުމަތްތެރިންގެ ޤައުމީ ދަފުތަރެއް އެކުލަވާލެވި، ހެލްތު އިންފޮމޭޝަން ސިސްޓަމްތަކާ ގުޅުވާލެވިގެންދާނެއެވެ.
• އަވަސް އަދި ދެފުށް ފެންނަ ޚިދުމަތް: ޚިދުމަތް ދިނުމުގައި އިދާރީ ގޮތުން ނަގާ ވަގުތު އެތައް ގުނައަކަށް ކުޑަވެ، ޚިދުމަތުގެ ފެންވަރު ރަނގަޅުވެގެންދާނެއެވެ.
މި ރަސްމިއްޔާތުގައި އިތުރަށް ވިދާޅުވީ، މިނިސްޓްރީގެ އަމާޒަކީ ކުރިއަށް އޮތް ދެ އަހަރު ދުވަހުގެ ތެރޭގައި ޞިއްޙީ ދާއިރާއިން ދެވޭ ހުރިހާ ޚިދުމަތްތަކަކީ ޑިޖިޓަލް ވަސީލަތްތަކުގެ އެހީގައި ރައްޔިތުންނަށް ފަސޭހައިން ވާސިލުވެވޭ، ރައްކާތެރި ޚިދުމަތްތަކަކަށް ހެދުން ކަމަށެވެ. އަދި މި މަސައްކަތް ކާމިޔާބުކަމާއެކު ނިންމާލުމުގައި މިނިސްޓްރީގެ ޓެކްނިކަލް ޓީމާއި ކައުންސިލްތަކުން ކުރެއްވި ބުރަ މަސައްކަތަށް ޚާއްޞަ ޝުކުރެއް އަދާކުރެއްވިއެވެ.
މި ޕްލެޓްފޯމް ތަޢާރަފުކުރުމުގެ ރަސްމިއްޔާތުގައި މިނިސްޓްރީގެ އިސްވެރިންނާއި، ހޮސްޕިޓަލުތަކުގެ ވެރިންގެ އިތުރުން ޞިއްޙީ ކައުންސިލްތަކުގެ މެންބަރުންނާއި މުވައްޒަފުން ބައިވެރިވެވަޑައިގެންނެވިއެވެ.
Ads by MACL
