ކުންފުނިތަކުގެ ފައިދާ 1.1 ބިލިއަނަށް އަރައި، ދައުލަތުގެ ޖުމްލަ އާމްދަނީ 36 ބިލިއަން ރުފިޔާއަށް!
މި އަހަރުގެ ނޮވެމްބަރު މަހުގެ 12 ވަނަ ދުވަހުގެ ނިޔަލަށް ދައުލަތަށް ލިބުނު ޖުމްލަ އާމްދަނީއާއި ހިލޭ އެހީގެ މިންވަރު 36.0 ބިލިއަން (35.96 ބިލިއަން) ރުފިޔާއަށް އަރައި، މިދިޔަ އަހަރުގެ މި މުއްދަތާ އަޅާބަލާއިރު 8.0 އިންސައްތައިގެ ކުރިއެރުމެއް ހޯދައިފިއެވެ.
މިނިސްޓްރީ އޮފް ފައިނޭންސް އެންޑް ޕަބްލިކް އެންޓަޕްރައިޒަސް އިން އާންމުކޮށްފައިވާ އެންމެ ފަހުގެ 'ވީކްލީ ފިސްކަލް ޑިވެލޮޕްމަންޓްސް' ރިޕޯޓުން ދައްކާގޮތުގައި، 2025 ވަނަ އަހަރުގެ މި މުއްދަތުގައި ދައުލަތަށް ލިބިފައިވަނީ 33.3 ބިލިއަން ރުފިޔާއެވެ. މި އަހަރުގެ އާމްދަނީ އިތުރުވުމުގައި އެންމެ ބޮޑު ދައުރެއް އަދާކޮށްފައިވަނީ ސަރުކާރު ހިއްސާވާ ކުންފުނިތަކުން (އެސް.އޯ.އީ) ދައުލަތަށް ދެއްކި ފައިދާގެ ހިއްސާ ނުވަތަ ޑިވިޑެންޑެވެ. އެގޮތުން، މިދިޔަ އަހަރު ކުންފުނިތަކުގެ ފައިދާގެ ގޮތުގައި ލިބުނު 654.7 މިލިއަން ރުފިޔާއާ އަޅާބަލާއިރު، މި އަހަރު ވަނީ 61.3 އިންސައްތައިގެ ބޮޑު އިތުރުވުމަކާއެކު 1.1 ބިލިއަން ރުފިޔާ ލިބިފައެވެ. ޚާއްޞަކޮށް ފާއިތުވެދިޔަ ހަފުތާގެ އާމްދަނީ އުފުލިގެންދިޔަ މައިގަނޑު ސަބަބަކީ މާލެ ވޯޓަރ އެންޑް ސްވަރޭޖް ކޮމްޕެނީ (އެމް.ޑަބްލިއު.އެސް.ސީ) އިން ދެއްކި 572.7 މިލިއަން ރުފިޔާ ކަމަށް އެ ރިޕޯޓުގައި ފާހަގަކޮށްފައިވެއެވެ.
Ads by BMLޓެކްސްގެ ގޮތުގައި ދައުލަތަށް ލިބުނު އާމްދަނީއަށް ބަލާއިރު، މިދިޔަ އަހަރުގެ 24.8 ބިލިއަން ރުފިޔާއިން 10.3 އިންސައްތަ އިތުރުވެ، މި އަހަރު ވަނީ 27.4 ބިލިއަން ރުފިޔާ ލިބިފައެވެ. ޓެކްސް އާމްދަނީގެ ތަފްޞީލުތަކަށް ބަލާއިރު:
ޖީ.އެސް.ޓީ: 6.2 އިންސައްތަ އިތުރުވެ 14.4 ބިލިއަން ރުފިޔާއަށް އަރާފައިވެއެވެ.
ވިޔަފާރިއާއި މުދަލުން ނަގާ ޓެކްސް: 22.9 އިންސައްތަ އިތުރުވެ 6.1 ބިލިއަން ރުފިޔާ ލިބިފައިވެއެވެ.
އިމްޕޯޓް ޑިއުޓީ: 13.5 އިންސައްތަ އިތުރުވެ 3.0 ބިލިއަން ރުފިޔާއަށް އަރާފައިވެއެވެ.
މީގެ އިތުރުން، ޓެކްސް ނޫން އާމްދަނީގެ ބައިން މުދަލާއި ގޯތިގެދޮރުން ލިބުނު އާމްދަނީ 29.4 އިންސައްތަ އިތުރުވެ 2.3 ބިލިއަން ރުފިޔާއަށް އަރާފައިވާއިރު، ހިލޭ އެހީގެ ގޮތުގައި ލިބުނު މިންވަރު ވަނީ 64.9 އިންސައްތަ އިތުރުވެ 528.2 މިލިއަން ރުފިޔާއަށް އަރާފައެވެ. އެހެންނަމަވެސް، ޖުމްލަ ޓެކްސް ނޫން އާމްދަނީ ވަނީ މިދިޔަ އަހަރާ އަޅާބަލާއިރު 1.2 އިންސައްތަ ދަށްވެ 8.1 ބިލިއަން ރުފިޔާއަށް ތިރިވެފައެވެ.
ދައުލަތުގެ ޚަރަދުތަކަށް ބަލާއިރު، ނޮވެމްބަރު 12 ގެ ނިޔަލަށް ޖުމްލަ ޚަރަދު ވަނީ މިދިޔަ އަހަރާ އަޅާބަލާއިރު 14.9 އިންސައްތަ އިތުރުވެ 39.8 ބިލިއަން ރުފިޔާއަށް އަރާފައެވެ. މީގެ ތެރެއިން ހިންގުމުގެ ޚަރަދު ނުވަތަ ރިކަރަންޓް ޚަރަދަށް 34.3 ބިލިއަން ރުފިޔާ (15.4 އިންސައްތައިގެ އިތުރުވުމެއް) ހޭދަކޮށްފައިވާއިރު، ކެޕިޓަލް ޚަރަދުގެ ގޮތުގައި 5.5 ބިލިއަން ރުފިޔާ (12.3 އިންސައްތައިގެ އިތުރުވުމެއް) ވަނީ ހޭދަކޮށްފައެވެ. ކެޕިޓަލް ޚަރަދުގެ ތެރެއިން ބިމާއި އިމާރާތްތަކަށް ކުރި ހޭދަ 40.7 އިންސައްތަ އިތުރުވެ 1.8 ބިލިއަން ރުފިޔާއަށް އަރާފައިވާއިރު، ފާއިތުވެދިޔަ ހަފުތާގައި އެންމެ ބޮޑު ހޭދައެއް ކުރަންޖެހުނީ ސަބްސިޑީތަކަށެވެ. އެގޮތުން ސަބްސިޑީއަށް ކުރި ޚަރަދު ވަނީ މިދިޔަ އަހަރުގެ 3.0 ބިލިއަން ރުފިޔާއިން 51.2 އިންސައްތަ އިތުރުވެ 4.6 ބިލިއަން ރުފިޔާއަށް އަރާފައެވެ.
އެހެނިހެން މައިގަނޑު ޚަރަދުތަކުގެ ތެރޭގައި މުސާރައާއި އިނާޔަތްތަކަށް ކުރި ހޭދަ 10.7 އިންސައްތަ އިތުރުވެ 13.4 ބިލިއަން ރުފިޔާއަށް އަރާފައިވާއިރު، އިދާރީ އަދި ހިންގުމުގެ ޚަރަދުތަކަށް 20.9 ބިލިއަން ރުފިޔާ (18.4 އިންސައްތައިގެ އިތުރުވުމެއް) އަދި ދައުލަތުން ދޭ އެހީއާއި ސަބްސިޑީތަކަށް 11.2 ބިލިއަން ރުފިޔާ (30.9 އިންސައްތައިގެ އިތުރުވުމެއް) ވަނީ ހޭދަކޮށްފައެވެ. ނަމަވެސް، ދަރަންޏަށް ދެއްކި އިންޓްރެސްޓާއި ފައިނޭންސިންގ ޚަރަދު ވަނީ 2.4 އިންސައްތަ ދަށްވެ 4.2 ބިލިއަން ރުފިޔާއަށް ތިރިވެފައެވެ.
އާމްދަނީއާއި ޚަރަދުގެ ހިސާބުތަކަށް ބަލާއިރު، 12 ނޮވެމްބަރު 2026 ގެ ނިޔަލަށް ދައުލަތުގެ ބަޖެޓް ވަނީ 3.8 ބިލިއަން ރުފިޔާއިން ޑެފިސިޓްވެފައެވެ. މިއީ މިދިޔަ އަހަރުގެ މި މުއްދަތުގައި ހުރި 1.3 ބިލިއަން ރުފިޔާގެ ޑެފިސިޓާ އަޅާބަލާއިރު އިތުރު އަދަދެކެވެ. އެހެންނަމަވެސް، ދަރަންޏަށް ދައްކާ އިންޓްރެސްޓާއި ފައިނޭންސިންގ ޚަރަދު ނުހިމަނައި ބަލާއިރު، ދައުލަތުގެ ބަޖެޓުގައި 360.0 މިލިއަން ރުފިޔާގެ ޕްރައިމަރީ ސާޕްލަސްއެއް ވަނީ ރެކޯޑުކުރެވިފައެވެ.
Ads by MACL
