މަސްތުވާތަކެތި އެތެރެކުރާ މީހުންނަށް މަރުގެ އަދަބު ވަނީ ކަނޑައަޅާފައި: ރައީސް
ދިވެހިރާއްޖެއަށް މަސްތުވާތަކެތި އެތެރެކުރާ ފަރާތްތަކަށް ޤާނޫނީ ގޮތުން މަރުގެ އަދަބު ދެވޭނެ އުސޫލު މިހާރު ކަނޑައެޅިފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ، ރައްޔިތުންގެ ސަރުކާރަށް ތިން އަހަރު ފުރުން ފާހަގަކުރުމުގެ ގޮތުން މިރޭ ބޭއްވި ރަސްމީ ޖަލްސާގައި ޤައުމާ މުޚާޠަބުކުރައްވައި ދެއްކެވި ވާހަކަފުޅުގައެވެ.
މި ޖަލްސާގައި ވާހަކަފުޅު ދައްކަވަމުން އެމަނިކުފާނު ވިދާޅުވީ، މަސްތުވާތަކެތީގެ ވަބާއިން ދިވެހި މުޖުތަމަޢު ސަލާމަތްކޮށް، ޤައުމުގެ ޒުވާން ޖީލު އެ ނުރައްކަލުން ހިމާޔަތްކުރުމަކީ މި ސަރުކާރުގެ އެންމެ މުހިންމު އެއް އަމާޒު ކަމަށެވެ. މިގޮތުން، ވޭތުވެދިޔަ ތިން އަހަރުގެ ތެރޭގައި އެޅުއްވި މުހިންމު ފިޔަވަޅުތަކަށް އަލިއަޅުއްވާލައްވަމުން ރައީސް ވިދާޅުވީ، މަސްތުވާތަކެއްޗާ ބެހޭ ޤާނޫނަށް ގެނެވުނު އިޞްލާޙުތަކުގެ ދަށުން ރާއްޖެއަށް މަސްތުވާތަކެތި އެތެރެކުރުމުގެ ބޮޑެތި ކުށްތަކަށް އަރައިގަންނަ ފަރާތްތަކަށް އެންމެ ހަރުކަށި އަދަބު ކަމުގައިވާ މަރުގެ އަދަބު ކަނޑައެޅި، އެކަން ތަންފީޒުކުރުމުގެ ޤާނޫނީ ބާރު މިހާރު ލިބިދީފައިވާ ކަމަށެވެ.
Ads by BMLމީގެ އިތުރުން، މަސްތުވާތަކެތީގެ ވިޔަފާރިކުރާ ފަރާތްތައް ހޯދައި ޤާނޫނުގެ ކުރިމައްޗަށް ގެނައުމަށް ތަންފީޒީ އިދާރާތަކުން ކުރަމުންދާ މަސައްކަތްތައް އިތުރަށް ހަރުދަނާކުރައްވާނެ ކަމުގެ ޔަޤީންކަން ރައީސުލްޖުމްހޫރިއްޔާ ދެއްވިއެވެ. އަދި މަސްތުވާތަކެތީގެ މައްސަލައަށް ދާއިމީ ޙައްލެއް ހޯދުމަށްޓަކައި ޤާނޫނު ތަންފީޒުކުރުމުގައި އެއްވެސް ފަރާތަކަށް އިސްތިސްނާއެއް ނޯންނާނެ ކަމަށްވެސް ސަރުކާރަށް ތިން އަހަރު ފުރުމުގެ ރަސްމީ ޖަލްސާގައި ރައީސް ވިދާޅުވިއެވެ.
Ads by MACL
