'މޯލްޑިވްސް 2.0' ނިޒާމުން މައިގަނޑު 3 ކަމެއް ޙާޞިލުކުރަން ބޭނުން: ރައީސް
ދިވެހިރާއްޖޭގެ ހިންގުމުގެ ނިޒާމާއި އިޤްތިޞާދު ޒަމާނީ ޓެކްނޮލޮޖީއާއެކު މުޅިން އައު ހަރުފަތަކަށް ގެންދިއުމަށް ސަރުކާރުން ފަށާފައިވާ 'މޯލްޑިވްސް 2.0' ނިޒާމުގެ ތެރެއިން މައިގަނޑު ތިން ކަމެއް ޙާޞިލުކުރައްވަން ބޭނުންފުޅުވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާންކުރައްވައިފިއެވެ.
ރައީސުލްޖުމްހޫރިއްޔާ މިކަން ހާމަކުރެއްވީ، ރައްޔިތުންގެ ސަރުކާރަށް ތިން އަހަރު ފުރުން ފާހަގަކުރުމުގެ ގޮތުން މިރޭ ބާއްވަމުންދާ ރަސްމީ ޖަލްސާގައި ޤައުމާ މުޚާޠަބުކުރައްވައި ދެއްކެވި ވާހަކަފުޅުގައެވެ.
މި ޖަލްސާގައި ވާހަކަފުޅު ދައްކަވަމުން އެމަނިކުފާނު ވިދާޅުވީ، 'މޯލްޑިވްސް 2.0' އަކީ ރާއްޖޭގެ ރައްޔިތުންނަށް ފޯރުކޮށްދޭ ޚިދުމަތްތައް ހަލުވިކޮށް، ދެފުށް ފެންނަ ހަރުދަނާ ނިޒާމެއްގެ ތެރެއިން ޤައުމު ތަރައްޤީކުރުމަށް އެޅުއްވި މުހިންމު ފިޔަވަޅެއް ކަމަށެވެ. މި ނިޒާމުގެ ދަށުން މައިގަނޑު ތިން ލަނޑުދަނޑިއެއް ޙާޞިލުކުރުމަށް ސަރުކާރުން ޚާއްޞަ އިސްކަމެއް ދެއްވާނެކަން އެމަނިކުފާނު ފާހަގަކުރެއްވިއެވެ.
Ads by BMLމި ބަދަލާއެކު ދައުލަތުގެ އިދާރާތަކުގެ ހިންގުން ޑިޖިޓަލައިޒްވެ، ރައްޔިތުންނަށް ލިބޭ ޚިދުމަތްތަކުގެ ފެންވަރު މަތިވެގެންދާނެ ކަމަށާއި، ބައިނަލްއަޤްވާމީ މައިދާނުގައި ދިވެހިރާއްޖެއަކީ ޓެކްނޮލޮޖީގެ ގޮތުން ކުރިއަރާފައިވާ ޤައުމަކަށް ހެދުމަކީ މި ސިޔާސަތުގެ އެންމެ ބޮޑު އަމާޒު ކަމަށް ރައީސުލްޖުމްހޫރިއްޔާ ވިދާޅުވިއެވެ.
Ads by MACL
