އަފްޣާނިސްތާނުގައި ސޯޝަލް މީޑިއާ ބޭނުންކުރުން ހަނިކޮށްފި
އަފްޣާނިސްތާނުގެ ޠާލިބާން ސަރުކާރުން އެ ޤައުމުގައި ސޯޝަލް މީޑިއާ ބޭނުންކުރެވޭ މިންވަރު ހަނިކޮށްފިއެވެ.
އިންޓަނެޓާއި މޯބައިލް ފޯނުގެ ޚިދުމަތް ކަނޑާލުމަށް ފަހު އަލުން ދޭން ފެށިތާ އެއް ހަފުތާ ވެފައިވާ މި ދަނޑިވަޅުގައި، މިފަދަ ފިޔަވަޅެއް އެޅީ ފޭސްބުކް، އިންސްޓަގްރާމް، އަދި ސްނެޕްޗެޓް ފަދަ ޕްލެޓްފޯމްތަކަށް ވެސް އަސަރުކުރާ ގޮތަށެވެ. ޓާލިބާނުންގެ މި އަމަލަކީ އެ ޤައުމުގެ ރައްޔިތުންނަށް މައުލޫމާތު ލިބޭނެ ގޮތްތައް އިތުރަށް ހަނިކުރުން ކަމަށް ބެލެވެއެވެ.
ނެޓްބްލޮކްސްއިން އޭއެފްޕީއަށް ދިން މައުލޫމާތަށް ބަލާއިރު، ސޯޝަލް މީޑިއާގެ ޚިދުމަތްތައް ބޭނުންކުރެވޭ މިންވަރު ވަނީ ވަކިވަރަކަށް ހިފަހައްޓާފައެވެ. އެ ޤައުމުގައި ތިބި އޭއެފްޕީގެ ރިޕޯޓަރުން ބުނެފައިވާ ގޮތުގައި، އިއްޔެއިން ފެށިގެން ސޯޝަލް މީޑިއާގެ ޚިދުމަތް ލިބެނީ ކެނޑިކެނޑިގެން ބައެއް ވަގުތުތަކުގައެވެ. މިއީ ޓާލިބާނުން ވެރިކަމަށް އައި ފަހުން އެޅި މިފަދަ ފުރަތަމަ ފިޔަވަޅެއް ނޫނެވެ.
Ads by BMLމިދިޔަ މަހުގެ 30 ވަނަ ދުވަހު "ފާހިޝް އަމަލުތައް ހުއްޓުވަން" ކަމަށް ބުނެ މޯބައިލް ފޯނާއި އިންޓަނެޓްގެ ޚިދުމަތް މުޅި އަފްޣާނިސްތާނުން ވަނީ ކަނޑާލާފައެވެ. ޓާލިބާނުން ވެރިކަމަށް އައުމަށް ފަހު ވަނީ އެތައް ކަމެއް ބަދަލުކޮށްފައެވެ. ޓެލެފޯންގެ ޚިދުމަތް ވެސް އިންޓަނެޓް ޚިދުމަތް ދިނުމަށް ބޭނުންކުރާ ކޭބަލްތައް މެދުވެރިކޮށް ދޭތީ، އިންޓަނެޓް ކަނޑާލުމުން ފޯނު ޚިދުމަތަށް ވެސް ބޮޑެތި ބަދަލުތަކެއް އައެވެ.
މިދިޔަ މަހުގެ ކުރީކޮޅު ޓާލިބާން ސަރުކާރުން ވަނީ އެކި ސަރަހައްދުތަކުން ހައި ސްޕީޑް އިންޓަނެޓް ކަނޑާލާފައެވެ. ބަލްޚް ޕްރޮވިންސްގެ ތަރުޖަމާން އަތައުﷲ ޒައިދު މިދިޔަ މަހުގެ 16 ވަނަ ދުވަހު ވިދާޅުވެފައިވާ ގޮތުގައި، ޓާލިބާނުންގެ ލީޑަރުގެ އަމުރަށް، އުތުރު ޕްރޮވިންސްގައި ފައިބަ އޮޕްޓިކް އިންޓަނެޓް އެއްކޮށް މަނާކޮށްފައި ވެއެވެ. އޭނާ ވިދާޅުވީ މިއީ "ފާހިޝް އަމަލުތައް ހުއްޓުވަން" އެޅި ފިޔަވަޅެއް ކަމަށާއި، ޚިދުމަތް ދިނުމަށް އެހެން ގޮތެއް ހޯދައި، އަލުން ޤައުމަށް ޚިދުމަތް ލިބޭނެ ގޮތް ހަދާނެ ކަމަށެވެ.
ކުރިން އޮތް އެމެރިކާގެ ތާއީދުގައި ހިންގި ސަރުކާރުން 2024 ވަނަ އަހަރު ކާބުލްގައި 9،350 ކިލޯމީޓަރުގެ ފައިބަ އޮޕްޓިކް ނެޓްވޯކެއް ގާއިމުކޮށް ޚިދުމަތް ދީފައި ވެއެވެ. ނަމަވެސް ޓާލިބާނުން އަލަށް ވެރިކަމަށް އައުމަށް ފަހު، މިފަދަ ގިނަ ކަންތައްތަކަށް ވަނީ ބަދަލުތަކެއް ގެނެސްފައެވެ. އަފްޣާނިސްތާނުގެ ރައްޔިތުންނަށް އިންޓަނެޓް ބޭނުންކުރުން ހަނިކުރުމަކީ އެ ޤައުމުގެ މައުލޫމާތީ މިނިވަންކަމަށް އޮތް ނުރައްކަލެއް ކަމަށް ގިނަ ބަޔަކު ދެކެއެވެ.
Ads by MACL
