ބުދަ، 18 ނޮވެމްބަރު 2026
ދުނިޔެ

ޖަޕާނުގެ ތާރީޚުގައި ފުރަތަމަ އަންހެން ބޮޑުވަޒީރަކު އިންތިޚާބުކޮށްފި

ޖަޕާނުގެ ތާރީޚުގައި ފުރަތަމަ އަންހެން ބޮޑުވަޒީރަކު އިންތިޚާބުކޮށްފި

ޖަޕާނުގެ ތާރީޚުގައި ފުރަތަމަ ފަހަރަށް އަންހެން ބޮޑުވަޒީރެއްގެ ގޮތުގައި ސަނާއޭ ޓަކައީޗީ އެ ގައުމުގެ ޕާލިމެންޓުން އިންތިޚާބުކޮށްފިއެވެ. ވެރިކަން ކުރާ ލިބަރަލް ޑިމޮކްރެޓިކް ޕާޓީ (އެލްޑީޕީ) ގެ ލީޑަރުގެ ގޮތުގައި ހުންނެވި، އުމުރުން 64 އަހަރުގެ ޓަކައީޗީ ހޯމަ ދުވަހު ވަނީ އެ ގައުމުގެ ބާރުގަދަ މަޖިލީހުގެ ތިރި ގެއިން 237 ވޯޓާއި މަތި ގެއިން 125 ވޯޓު ހޯއްދަވައި މަޖިލީހުގެ އަޣުލަބިއްޔަތުން މަގާމަށް އިންތިޚާބުވެފައެވެ. ޖަޕާނުގެ ސިޔާސީ އުސްތިލައަށް އާ ތާރީޚެއް ގެނެސްދެމުން، ޓަކައީޗީ މި ވަނީ ގިނަ ގޮންޖެހުންތަކެއްގެ ތެރެއިން ގައުމުގެ ހަޅަފަތްގަނޑު ހިފައިފައެވެ.

ކުރީގެ އިނގިރޭސި ބޮޑުވަޒީރު މާގަރެޓް ތެޗަރަށް ވަރަށް ބޮޑަށް ތާއީދުކުރައްވާ ކޮންޒަވޭޓިވް ބޭފުޅެއް ކަމަށްވާ ޓަކައީޗީ މަޤާމާ ހަވާލުވެވަޑައިގަންނަވާ މި ދަނޑިވަޅަކީ، ޖަޕާނުގައި ދިރިއުޅުމުގެ އަގު ބޮޑުވެ، ރައްޔިތުންގެ ނުރުހުން އިތުރުވެފައިވާ ދަނޑިވަޅެކެވެ. މިއީ ދުނިޔޭގެ ހަތަރުވަނަ އަށް އެންމެ ބޮޑު އިޤްތިޞާދަށް ވެސް ޔަޤީންކަން ކުޑަ ދުވަސްވަރެކެވެ.

ޓަކައީޗީ އަކީ ވޭތުވެދިޔަ ފަސް އަހަރު ތެރޭގައި ޖަޕާނު ދެކޭ ހަތަރުވަނަ ބޮޑުވަޒީރެވެ. އޭނާގެ ކުރީގެ ބޮޑުވަޒީރުންގެ ދައުރު ކުރުވެގެން ދިޔައީ ރޭޓިންގ ދަށްވުމާއި ތަފާތު މައްސަލަތަކާ ހުރެއެވެ.

އޮކްޓޯބަރު މަހު އޮތް އެލްޑީޕީގެ ލީޑަރު ހޮވުމުގެ އިންތިޚާބުގައި ހަތަރު ފިރިހެނުން ބަލިކުރެއްވި ނަމަވެސް، އެލްޑީޕީ ގެ ދިގު މުއްދަތުގެ ކޯލިޝަން ޕާޓީ ކަމުގައިވާ ކޮމެއިޓޯ ޕާޓީ އިން ތާއީދު އަނބުރާ ގެންދިއުމާއެކު އޭނާ ބޮޑުވަޒީރު ކަމުގެ މަގާމަށް ވަޑައިގަތުމުގައި ހުރަސްތައް ކުރިމަތިވިއެވެ. ނަމަވެސް ހޯމަ ދުވަހުގެ ރޭ އެހެން އިދިކޮޅު ޕާޓީއަކާ އެކު ވެވުނު އެއްބަސްވުމެއްގެ ސަބަބުން އޭނާ އަށް މަގާމު ހޯއްދެވޭނެ މަގު ތަނަވަސްވިއެވެ.

ޓަކައީޗީ އަކީ ޖަޕާނުގެ ސިޔާސީ މައިދާނަށް އާ ފަރާތެއް ނޫނެވެ. ކުރީގެ ބޮޑުވަޒީރު އަބޭ ގެ ގާތް އެކުވެރިއެއް ކަމަށް ވުމުގެ އިތުރުން އޭނާ ވަނީ އެތައް މިނިސްޓަރު ކަމެއް ކުރައްވާފައެވެ. އަދި ކުރިން ވެސް ބޮޑުވަޒީރު ކަމަށް ކުރިމަތިލައްވާފައިވެއެވެ. ތެޗަރަށް ކުރާ ތާއީދުގެ ސަބަބުން ޖަޕާނުގައި ޓަކައީޗީ މަޝްހޫރުވެފައިވަނީ "އަޔަން ލޭޑީ" ގެ ނަމުންނެވެ.

އޭނާގެ ކުރިމަތީގައި އޮތް އެންމެ ބޮޑު އެއް ގޮންޖެހުމަކީ އެލްޑީޕީ އަށް ރައްޔިތުންގެ އިތުބާރު އަލުން ހޯދުމެވެ. މި ޕާޓީން ވޭތުވެދިޔަ ހަތް ދިހަ އަށް ވުރެ ގިނަ އަހަރު ޖަޕާނު ވެރިކަން ކޮށްފައިވީ ނަމަވެސް، ކުރީގެ ބޮޑުވަޒީރު އިޝިބާ ގެ ވެރިކަމުގައި މިދިޔަ 15 އަހަރުގެ ތެރޭގައި ފުރަތަމަ ފަހަރަށް ދަށު ގޭގެ މަޖިލީހުގެ މެޖޯރިޓީ ގެއްލުނެވެ. އެއާއެކު އޭނާގެ މައްޗަށް ކުރެވުނު ޚިޔާނާތުގެ ތުހުމަތުތަކާ ގުޅިގެން އުފެދުނު ރައްޔިތުންގެ ރުޅިވެރިކަމުގެ ތެރޭގައި ޖުލައި މަހު މަތި ގޭގެ މެޖޯރިޓީ ވެސް ގެއްލުނެވެ.

މިކަން މިހެން އޮތް ނަމަވެސް އެންމެ ފުރަތަމަ ޓަކައީޗީ އަށް ސަމާލުކަން ދެއްވަން ޖެހެނީ އަގުތައް މައްޗަށް ދިއުމާ ގުޅިގެން އުފެދިފައިވާ ރައްޔިތުންގެ ރުޅިވެރިކަމަށެވެ. ހަނޑުލުގެ ދަތިކަމުގެ ސަބަބުން ޖަޕާނުގެ މައިގަނޑު ކާނާގެ އަގު ވަނީ ރެކޯޑު އަގަކަށް އަރާފައެވެ.

ޖަޕާނުގެ އިތުރުވަމުންދާ ދަރަންޏާއި އިގުތިސާދީ ދުވެލި ދަށްވެފައިވާ ކަންބޮޑުވުން އިންވެސްޓަރުންނަށް އޮތް ނަމަވެސް، އޭނާގެ ކާމިޔާބީން މާކެޓްތަކަށް ކޮންމެވެސް ވަރެއްގެ އުންމީދެއް ލިބުނު ކަމަށް ފެނެއެވެ.